لاهای | تیرمەهـا ٢٠٢٦ـێ | نڤیسینگەها راگەهاندنا زانکۆیێ (UNPO) –

زانکۆیا دهۆک (UOD) دەستکەڤتەکێ ئەکادیمی یێ بەرچاڤ د ١٣ـەمین بەریكانا دادگەها

گریمانەیی یا دادگەها تاوانێن ناڤدەولەتی (ICC) یا سەر ب رێکخراوا پارێزەرێن ناڤدەولەتی (IBA) ڤە کو ل لاهای ل هۆلەندا ژ ١٢ تا ١٩ خزیرانا ٢٠٢٦ـێ هاتیە ئەنجامدان، بدەستڤەئینا. ب نوینەراتیا زانکۆیا دهۆک و عیراقێ، تیمێ کۆلیژا یاسا ئاستەکێ نایاب د ئێک ژ ب ناڤودەنگترین بەریكانەیێن ناڤدەولەتی یێن بەرەڤانیکرنا یاسایی ل جیهانێ نیشان دا.

د هەڤڕکیێ دا دگەل تیمێن زانکۆیێن پێشەنگ ژ سەرانسەری جیهانێ، تیمێ زانکۆیا دهۆک ل قۆناغێن دەستپێکی پلەیا ٧٨ـێ ب دەستڤەئینا، کو ئەڤ چەندە ژی ئامادەکاریێن ب هێز یێن تیمێ و پێگیریا وان ب سەرکەڤتنێ د پەروەردەیا یاسایا ناڤدەولەتی و بەرەڤانیکرنێ دا دیار دکەت.

یاداشتێن نڤیسکی یێن تیمێ هەلسەنگاندنێن گەلەک ئەرێنی ژ لایێ لیژنەیێن دادوەری یێن ناڤدەولەتی ڤە وەرگرتن. یاداشتا بەرەڤانیێ نمرەیەکا نایاب ٩٠/١٠٠ بدەستڤە ئینا و هەلسەنگاندنا "نایاب" (Excellent) وەرگرت، د دەمەکێ دا کو یاداشتا حکومەتێ نمرەیا٧١.٣/١٠ و یاداشتا داواکاریا گشتی نمرەیا ٧٥/١٠٠ بدەستڤەئینا، کو هەردوویان هەلسەنگاندنا "باش" (Good) وەرگرت.

پێشکێشکرنا زارەکی یا تیمێ زانکۆیا دهۆک هەروەسا شیانێن ب هێز یێن بەلگەئینانا یاسایی و هزرکرنا ناڤ هۆلا دادگەهێ نیشان دان. تیمێ نمرەیا ٦٧.٥/١٠٠ د رۆلێ حکومەتێ دا، و

٦٥/١٠٠ د رۆلێ داواکاریا گشتی دا، و ٧٢.٣/١٠٠ د رۆلێ بەرەڤانیێ دا بدەستڤەئینا، کو بەریكانەیا بەرەڤانیێ بلندترین هەلسەنگاندن د ناڤبەرا هەر سێ قۆناغان دا وەرگرت.

شاندێ زانکۆیا دهۆک پێکهاتبوو ژ د. ئەڤین خالد عەبدولرەحمان، راگرا کۆلیژا یاسا، و د. ئاری عارف عەبدولعەزیز، رێڤەبەرێ کلینیکا یاسایی، کو سەرپەرشتی و راهێنانا قوتابیێن پشکدار کرن، ئەو ژی: هشیار جانگیر عەگید، شاناز شەعبان محەمەد، و عەمار جاسم ئەحمەد.

ئەڤ دەستکەڤتە پێگیریا بەردەوام یا زانکۆیا دهۆک ب ئارمانجێن پلانا وێ یا ستراتیژی (٢٠٢٣-٢٠٣٨) دیار دکەت، ب تایبەتی د پێشخستنا ناڤدەولەتیکرنێ، ژێهاتیبوونا قوتابیان، فێربوونا ب سەربۆڕ و پشکداریا ئەکادیمی یا جیهانی دا. پشکداریکرن د بەریكانەیێن دادگەهێن گریمانەیی یێن ناڤدەولەتی دا، شیانێن پێشکەڤتی یێن ڤەکۆلینا یاسایی، بەرەڤانیکرن، هزرکرنا رەخنەیی و یاسایا تاوانێن ناڤدەولەتی ل دەڤ قوتابیان پێشدئێخیت، هەروەسا پێگەهێ زانکۆیێ وەک دامەزراوەیەکا پێشەنگ د خواندنا یاسایی دا ل عیراقێ و هەرێما کوردستانێ ب هێز دکەت.

ڤێرێ کلیک بکە بۆ دیتنا وێنەیان

نڤیسینگەها راگەهاندنا زانکۆیێ، تیرمەهـ، ٢٠٢٦

راپۆرت ژ لایێ: فاطمە محمود عەلی

پەیڤێن سەرەکی: کۆلیژا یاسا زانکۆیا دهۆک، بەریكانا دادگەها گریمانەیی

IBA ICC ٢٠٢٦، دادگەها گریمانەیی یا دادگەها تاوانێن ناڤدەولەتی، پەروەردەیا یاسایا

ناڤدەولەتی، دەستکەڤتێن ناڤدەولەتی یێن زانکۆیا دهۆک