زانکۆیا دهۆك، ٤ـی چریا دووێ ٢٠٢٦ | نڤێسینگەها راگەهاندنا زانکۆیێ (UNPO) — د دەستپێشخەریەکێ دا بۆ بهێزکرنا پرێن هەڤکاریێ د ناڤبەرا سازیێن ئەکادیمی و کەرتێ تایبەت دا و گرنگیدان ب فێرکرنا پراکتیکی، کۆليژا زانستێن ئەندازیاریا چاندنێ ل زانكۆیا دهۆك، رۆژا ئێکشەمبی (١ـی چریا دووێ ٢٠٢٦)، د ڕێورەسمەکێ فەرمی دا ل کۆلیژێ، ڕێزلێنان ل ٣٦ کۆمپانی و دەزگەهێن هەڤپشك گرت یێن کو پشتەڤانیا بەرنامێ راهێنانا مەیدانی (Internship) یێ سالا ٢٠٢٦ـێ کرین.

ئەڤ ئاهەنگە وەك پێزانینەکا پڕ بها بوو بۆ بلند نرخاندنا رۆلێ کارا و بەرهەمدارێ کۆمپانی و سازیێن هەڤپشك د دابینکرنا دەرفەتێن راستەقینە یێن کاری دا بۆ قوتابیان، دا کو ژ نێزیك ئاشنای ژینگەها کاری یا پیشەیی ببن.

بەرنامێ راهێنانا مەیدانی پشکەکا سەرەکی و بنەرەتی یە ژ قۆناغا پێگەهاندنا ئەکادیمی یا قوتابیێن کۆلیژێ؛ ب ئاوایەکی کو پێدڤیە هەر قوتابیەک د ماوێ خواندنا خۆ دا ١٢٠ دەمژمێرێن راهێنانا پراکتیکی یا ب تەمام بکەت. ب ڤێ پێنگاڤێ، دەرفەت بۆ قوتابیان دهێتە رەخساندن دا کو ئەو زانست و تیۆریێن د پۆلان دا وەرگرتین ب پراکتیکا بازارێ کاری یێ ڕاستەقینە ڤە گرێبدەن، و بەهرە و کارامەیی یێن پیشەیی ل دەڤ خۆ پێش بێخن و بەرەڤ داهاتوویێ پیشەیی یێ خۆ پێنگاڤان باڤێژن.

ڕێورەسم ب پەیڤا بخێرهاتنێ ژ لایێ راگرێ کۆلیژێ ڤە دەستپێکر، ل دویڤ دا پێشکێشکرنەك دەربارەی ناساندنا کۆلیژێ و ڕێڕەو، ئارمانج و بەرهەمێن بەرنامێ راهێنانا مەیدانی هاتە کرن. هەروەسا د ئاهەنگێ دا، کورتەڤیدیۆیەکا دۆکیۆمێنتاری ژ لایێ قوتابیان ب خۆ ڤە هاتە نیشاندان، کو تێدا ئەزموون، ئاستەنگ و سەرکەڤتنێن خۆ د دەمێ ڕاهێنانێ دا بەرچاڤکرن.

دیسان د ئاهەنگێ دا، پەیڤا نوینەرێ قوتابیان ل دۆر بهایێ گرنگێ ڤێ ئەزموونا پراکتیکی، و پەیڤێن نوینەرێن کۆمپانیێن هەڤپشک ل سەر گرنگیا هەڤکاریا د ناڤبەرا زانکۆیێ و کەرتی تایبەت دا هاتنە پێشکێشکرن.

ئەو ٣٦ هەڤپشک نوینەراتیا کەرتێن جودایێن وەك: چاندن، باخداری، ساخلەمیا ڤێتەرنەری، بەرهەمهێنانا خوارنێ، پیشەسازی، گەشتوگوزار و بیاڤێن پەیوەندیدار دکرن. ژ وان ژی: کۆمپانیا جیهانا چاندنێ، پرۆژێ د. لەیلان یێ چاندنێ، کۆمپانیا نهج یا چاندنێ، نڤیسینگەها گوڵستان یا چاندنێ، گولخانا ستار، کلینیکا نیوڤێت، کلینیکا ئەلخەبیر، کۆمپانیا ئەڤرۆ گوڵستان، شاهین تور، کۆمپانیا گەشتیاری یا YRN، کارگەها بەرهەمێن شیری یا زاخۆ، کارگەها بەرەکەت یا ماستی، و کۆمپانیا ئەلمەحموود، ل گەل چەندین کۆمپانی و دەزگەهـ و نڤیسینگەهێن دی یێن دەڤەرێ؛ ئەڤ چەندە ژی تۆرێن بەرفره‌هـ یێن هەڤکاریا کۆلیژێ دگەل کەرتی تایبەت نیشان ددەت.

د پشکا دووماهییێ دا، وەك رێزگرتن ل مانديبوونا وان، باوەرنامە و دیاریێن یادگاری ل سەر هەڤپشک و پشکدارێن سەرئێخستنا بەرنامەی هاتنە بەلاڤکرن.

ئەڤ چالاکیە رەنگڤەدانا ئەرکێ سەرەکیێ کۆلیژا زانستێن ئەندازیاریا چاندنێ یە کو بەردەوامە بۆ بەرفرەهکرنا بازنەیێ هەڤکاریێ دگەل هەمی لایەنێن پەیوەندیدار و پێشئێخستنا بەرنامێن فێرکرنا پراکتیکی، دا کو ژینگەها کارێ چاندنێ و پیشەسازی ل هەرێما کوردستانێ پێش بێخیت.

هەڤدەم، ئەڤ بەرنامە پشکداریێ د بجهئینانا پلانا ستراتیژی یا زانکۆیا دهۆك (٢٠٢٣–٢٠٣٨) دا دکەت، ب تایبەتی ل ژێر ستوینێن "بهێزکرنا شیانێن قوتابیان" و "پشکداریا کارتێکەر د جڤاکی دا".

ڤێرە کلیك بکە بۆ دیتنا وێنەیان

نڤێسینگەها راگەهاندنا زانکۆیێ، ٤ـی چریا دووێ ٢٠٢٦

راپۆرت: سەباح عەبدولعەزیز محەمەد سالح

وێنەگرتن: سەربەست سەعید حەمۆ

پەیڤێن سەرەکی:

بەرنامێ راهێنانا مەیدانی یێ زانکۆیا دهۆك ٢٠٢٦، کۆلیژا زانستێن ئەندازیاریا چاندنێ، ١٢٠ دەمژمێرێن ڕاهێنانێ، هەڤکاریا ئەکادیمی و پیشەسازی، پێشڤەبرنا کەرتێ چاندنێ.