قەزا ئامێدیێ، تەباخا ٢٠٢٦، نڤیسینگەها راگەهاندنا زانکۆیێ (UNPO) | زانکۆیا دهۆك (UOD) دەستکەڤتەکێ بەرچاڤ ل مەڕەسۆنا ئامێدیێ یا جیهانی تۆمارکر، پشتی کو قوتابیا زانکۆیا دهۆك (رەنا بەرەکات)، قوتابیا قۆناغا سێیێ یا کۆلیژا پەروەردا جەستەیی و زانستێن وەرزشی، شیا پلا سێیەم ل سەر ئاستێ کچان بدەستڤەبینیت.

مەڕەسۆن ل ڕۆژا سێشەمبی، ڕێکەڤتی ٢٥ـی تەباخێ، ٢٠٢٦، ل قەزا ئامێدیێ برێڤەچوو و ب هەماهەنگی دگەل رێکخراوا (KCCR) هاتبوو رێکخستن. زانکۆیا دهۆك ب رێیا رێڤەبەریا وەرزشی پشکداری تێدا کر، ب سەرپەرشتیا د. نەبەز ئیبراهیم محەمەد هاریکارێ سەرۆکێ زانکۆیێ بۆ کاروبارێن قوتابیان، و د.فەلاح سەعدون عومەر رێڤەبەرێ رێڤەبەریا وەرزشی ل زانکۆیا دهۆك.

د ڤێ چالاکیێ دا نێزیکی (٧٠٠) کەس ل سەر ئاستێ هەرێما کوردستانێ و عیراقێ و رۆژهەلاتا ناڤەراست پشکداربوون. ژمارەکا بەرچاڤ یا قوتابیێن زانکۆیا دهۆك ژ ھەردوو ڕەگەزان پشکداری کر و شیانێن خۆ یێن وەرزشی سەلماندن و نوینەرایەتیا زانکۆیێ د ڤێ چالاکیا وەرزشی یا دەڤەرێ دا کر.

د هەڤرکیێ دا غاردانا کوڕان بۆ ٥,٠٠٠ مەتران (٥ کیلۆمەتران) بوو و غاردانا کچان ژی ٣,٠٠٠ مەتر (٣ کیلۆمەتر) بوون. قوتابیا زانکۆیا دهۆك (رەنا بەرەکات) شیا ئاستەکێ بلند نیشان بدەت و پلا سێیەم د ناڤا پشکدارێن کچان دا بدەستڤەبینیت، کو ئەڤە دەستکەڤتەکێ بەرچاڤە بۆ زانکۆیێ و شیانێن وەرزشی یێن قوتابیێن وێ دیار دکەت و ناڤێ زانکۆیێ ل سەر ئاستێ هەرێمێ و دەڤەرێ بلند ڕابگریت.

ئەڤ دەستکەڤتە ڕەنگڤەدانا پابەندبوونا زانکۆیا دهۆکە بۆ پێشخستنا قوتابیان، ساخلەمیا جەستەیی، و پشکداریکرن د چالاکیێن دەرڤەی پرۆگرامێن خواندنێ و وەرزشی دا، کو دگەل پلانا ستراتیژی یا زانکۆیێ دگونجیت بۆ پێشخستنا قوتابیان ژ هەمی لایەکی ڤە و پشتەڤانیکرنا جڤاکەکێ زانکۆیی یێ چالاك.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانکۆیێ، تەباخا ٢٠٢٦
ڕاپۆرت: بارین محەمەد ئەحمەد