زانکۆیا دهۆك، ٢ـی چریا دووێ ٢٠٢٦ | نڤیسینگەها راگەهاندنا زانکۆیێ — د ڕۆژەکا مێژوویی و پڕ شانازی دا و ب هەلکەڤتا ٣٤ـەمین ساڵیادا دامەزراندنا زانکۆیا دهۆك، ب فەرمی ناڤێ ئێکەم سەرۆک و دامەزرێنەرێ زانکۆیێ (د. عسمەت محەمەد خالد) ل سەر پەرتووکخانەیا ناڤەندی یا زانکۆیێ هاتە دانان و زنجیرەیەکا چالاکیێن ئەکادیمی، هونەری و ڕێزلێنانێ هاتنە ئەنجامدان.

ئەڤ رێورەسمە ب ئامادەبوونا سەرۆکێ زانکۆیا دهۆك د. داود سلێمان ئەتروشی، دامەزرێنەر و ئێکەم سەرۆکێ زانکۆیێ د. عصمت محمد خالد، بریکارێ وەزارەتا خواندنا بلند و ڤەکۆلینێن زانستی د. سەباح وەیسی، بەرپرسێ لقێ ١٨ یێ پارتی دیموکراتی کوردستان ڕێزدار بەهرەم عریف یاسین، سکرتێرێ گشتی یێ دەستەیا متمانەبەخشینا پەروەردەیی و خواندنا بلند د. هونەر عیسا، سەرۆکێ زانکۆیا زاخۆ د. دیار هالۆ، سەرۆکێ زانکۆیا نەورۆز د. مێهڤان عارف عەبولرەحمان، دووەم سەرۆکێ زانکۆیا دهۆك د. لقمان

محەمەد سالح، دگەل هەژمارەکا پەرلەمانتاران، رێڤەبەرێن دەزگەهێن میری و حکومی و حزبی، هاریکارێن سەرۆکێ زانکۆیێ، ڕاگرێن کۆلیژان، مامۆستا، فەرمانبەر و قوتابییان هاتنە گێڕان.

پەردەلادان ل سەر پەیکەری و ناڤکرنا پەرتووکخانەیێ:

دەستپێکا ڕێورەسمان ل دەرگەهێ پەرتووکخانەیا ناڤەندی بوو، کۆ تێدا پەردە ل سەر پەیکەرێ د. عسمەت محەمەد خالد هاتە لادان، ئەڤێ ب دەست و شیانێن هونەری یێن قوتابیێن کۆلیژا هونەرێن جوان هاتبوو دروستکرن، و پاشی پەردە ل سەر ناڤێ پەرتووکخانەیێ هاتە ڕاکرن و ب فەرمی بوو «پەرتووکخانەیا ناڤەندی عصمت محمد خالد».

د کۆنگرەکێ ڕۆژنامەڤانی دا، سەرۆکێ زانکۆیا دهۆك ب خێرهاتنا مێهڤانان کر و ئاماژە ب گرنگیا ڤێ هەلکەڤتێ دا و گوت: «ئەڤرۆ ئەم پەرتووکخانەیا ناڤەندی ب ناڤێ د. عسمەت محەمەد خالد ناڤدکەین وەک رێزگرتن و وەفاداریەک بەرامبەر دیتن، ماندیبوون و رۆلێ

سەرەکی یێ وی د ئاڤاکرنا بناغەیێ ڤێ زانکۆیێ دا». ژ لایێ خۆڤە، د. عسمەت محەمەد خالد خۆشحالیا خۆیا مەزن دیارکر و پیرۆزباهی ل زانکۆیێ کر و تەکەزی کر کو ئەڤ دەستکەڤت و پێشکەڤتنە بەرهەمێ خەبات و ماندیبوونا هەمی مامۆستا، فەرمانبەر و دڵسۆزانە د درێژاهیا سالان دا.

چالاکیێن هونەری و پێشانگەهـ ل ناڤەندا قوتابیان:

پاشی ئامادەبووی ب پێیان ژ پەرتووکخانەیێ بەرەڤ سەنتەرێ قوتابیان بڕێکەفتن. ل وێرێ، ب پێشکێشکرنا کارێن هونەری پێشوازی ل مێهڤانان هاتە کرن؛ قوتابیێن پشکا شانۆیێ ل کۆلیژا هونەرێن جوان شانۆگەریەکا سەرنجڕاکێش پێشکێش کر کو ئاماژە ب هندەک ئاریشە و پێدڤیێن قوتابیان ددا. هەروەسا تیپا موزیکێ یا زانکۆیا دهۆك چەندین پارچە موزیک پێشکێش کرن، دیسان پێشانگەهەکا دروستکرنا کارێن شێوەکاری و پەیکەرسازی ژ لایێ قوتابیێن کۆلیژا هونەرێن جوان هاتبوو نیشاندان.

گوتارا سەرۆکێ زانکۆیێ و ڕاگەهاندنا دەستکەڤتێن مەزن:

ل هۆلا ناڤەندا قوتابیان، سەرۆکێ زانکۆیا دهۆك د. داود سلێمان ئەتروشی گوتارەکا گشتگیر پێشکێش کر و بەحس ل دیرۆک، پێگەهـ و پێنگاڤێن بوێرانە یێن زانکۆیێ بەرەڤ داهاتوویەکی گەش کر. د درێژاهیا ئاخفتنا خۆ دا، سەرۆکێ زانکۆیێ هەمی دەستکەفتێن

گرنگ یێن دەمێ بۆری دەستنیشان کرن:

• دانانا پلانا ستراتیژی یا ٢٠٢٣ – ٢٠٣٨: کو زانکۆیا دهۆك ئێکەمین زانکۆیە ل سەر ئاستێ هەرێمێ و دەڤەرێ خۆدانا پلانەکا ستراتیژی یا هوسا بەرفرەهـ بیت.
• پشتبەستن و متمانەبەخشینا ئەکادیمی (Accreditation): ئاماژە ب وێ دەستکەفتا مێژوویی دا کو بۆ ئێکەم جار تیمەکا ناڤدەولەتی سەرەدانا زانکۆیێ کر و ل دویڤ ٢١ پیڤەرێن بنەرەتی یێن ناڤدەولەتی پێداچوون بۆ ئاستێ زانکۆیێ هاتە کرن ژ پێخەمەت گەهشتن ب بەرزترین پیڤەرێن جیهانی.
• پرۆژێ ڕێبەرێ ڕاستنڤێسا زمانێ کوردی: باس ل گرنگیا ڤی پرۆژێ نەتەوەیی و زانستی کر. ل دوماهیێ سوپاسیا هەمی وان لایەن و دەستان کر یێن پشکداری د ڤان دەستکەڤتان دا کری.

رێزلێنان و خەلاتکرن ل دووماهیا رێورەسمان:

وەکو نەریتەکێ سالانە و وەفاداری بۆ خزمەتێ، زانکۆیا دهۆك ڕێز ل ژمارەکا کەسایەتی، مامۆستا و فەرمانبەران گرت ب ڤی شێوەیێ خوارێ:

- ڕێزلێنان ل ٢٨ مامۆستایان هاتە کرن ئەڤێن شیاین پلەیا زانستی یا «پرۆفیسۆر»

وەربگرن.

- ڕێزلێنان ل ٣٨ مامۆستا و فەرمانبەرێن دڵسۆز هاتە کرن ئەوێن پشتی سالێن درێژ یێن

خزمەتێ ئەڤ سالە خانەنشین بووین.

- ڕێزگرتن ل ٦ کەس و لایەنان هاتە کرن ئەوێن کو پشتەڤانیا دارایی پێشکێشی زانکۆیێ

کری و پرۆژە بجهئیناین.

ل دوماهیێ، ستران و مەتەلۆکێن فۆلکلۆری ژ لایێ تیپا زاخۆ یا هونەری ڤە هاتنە پێشکێشکرن، و رێورەسم ب گرتنا وێنەیێن بیرەوەریێ دگەل سەرۆکاتیا زانکۆیێ و مێهڤانان ب داوی هاتن.

پێشڤەبرنا دیتنا ستراتیجی یا زانکۆیا دهۆک

ئاهەنگگێرانا ٣٤ـەمین سالیادا دامەزراندنێ، ڕەنگڤەدانا پێگریا زانکۆیێ بوو ب پلانا وێ یا ستراتیژی ٢٠٢٣–٢٠٣٨، ب تایبەتی ستوونێن وێ یێن سەرەکی یێن وەک: پێشەنگیکرن د خواندنا باڵادا، بهێزکرنا شیانێن قوتابیان، پشکداریا کارتێکەر د جڤاکی دا، و

گەشەپێدانا دامەزراوەیی.

ناڤکرنا پەرتووکخانا ناڤەندی ب ناڤێ دامەزرێنەرێ زانکۆیێ، نیشانا پێزانینێ یە بۆ دیرۆکا دامەزراوەیی، سەرکردایەتیێ، و وان بەهایێن کو زانکۆیا دهۆك ل سەر هاتیە ئاڤاکرن. هەڤدەم، راگەهاندنا پێشڤەچوونان د هەلسەنگاندنا دامەزراوەیی و دڵنیاییا جۆری دا، پێگریا زانکۆیێ نیشان ددەت ب بهێزکرنا ئاستێن ئەکادیمی و بجهئینانا پیڤەرێن ناڤدەولەتی یێن دانپێدانکری.

هەروەسا بەرنامێ ساڵڤەگەڕێ تیشک ئێخستە سەر گرنگیا شیاندارکرنا قوتابیان ب ڕێیا پشکداریا هونەری و کەلتووری، زێدەباری بلند نرخاندنا زانکۆیێ بۆ باڵادەستیا ئەکادیمی و ڕۆل و ماندووبوونا فەرمانبەر و هەڤپشکێن وێ. کۆمکرنا ڤان دەستپێشخەریان پێکڤە، ڕەنگڤەدانا بزاڤێن بەردەوامێن زانکۆیا دهۆکە بۆ ئاڤاکرنا سازیەکا داهاتووبین کو پێشڤەچوونا ئەکادیمی، ناسنامەیا کەلتۆری، جۆرییا دامەزراوەیی، و بەرپرسیارەتیا جڤاکی پێکڤە گرێددەت.

نڤیسینگەها راگەهاندنا زانکۆیێ، ٢ـی چریا دووێ ٢٠٢٦
راپۆرت: رۆندک فازل عادل، ماهر تاهر سالح
وێنە: محەمەد ع. تاهر