دهۆك-زاویتە، تەباخا ٢٠٢٦ | نڤیسینگەها راگەهاندنا زانکۆیێ (UNPO) – د. داود سلێمان ئەتروشی، سەرۆکێ زانکۆیا دهۆك، پشكداری د رێوڕەسمێن ڤەکرنا ١٦ـەمین کۆمبوونا نیشتمانی یا کۆمەڵەیا قوتابیێن پزیشکی ل کوردستانێ (IFMSA-Kurdistan) دا کر، ئەوا كو ژ ٢٠ تا ٢٤ـی تەباخا ٢٠٢٦ـێ ل زاویتە-دهۆك هاتیە ئەنجامدان. رێوڕەسمێن ڤەکرنێ ب ئامادەبوونا د. نەبەز ئیبراهیم محەمەد، هاریکارێ سەرۆکێ زانکۆیێ بۆ کاروبارێن قوتابیان، د. دلدار حاجی موسا، راگرێ کۆلێژا پزیشکی، و قوتابیێ پزیشكی ئوسامە سوبحی یاسین، سەرۆکێ لیژنا ناڤخۆیی یا دهۆك يا IFMSA-Kurdistan، ل گەل ژمارەكا ئەکادیمیان، پزیشكان، شارەزایان، نوینەرێن كۆمەڵێ و مێهڤانێن رێزدار برێڤەچوون. کۆمبوونێ نێزیکی ٢٠٠ قوتابیێن پزیشکی و گەنجێن پێشەنگ د بوارێ ساخلەمیێ دا ژ دهۆك، زاخۆ، هەولێر، سلێمانی، کۆیە، و دەڤەرێن دی یێن هەرێما کوردستانێ و هەروەسا ژ

وەلاتێن دەرڤە کۆمکرن.

رێکخراوا IFMSA-Kurdistan رێکخراوەکا نیشتمانی یا ئەندامە د فیدراسیۆنا ناڤدەولەتی یا کۆمەڵەیێن قوتابیێن پزیشکی (IFMSA) دا، کو ئێکە ژ مەزنترین رێکخراوێن جیهانی ب رێڤەبرنا قوتابیان، و نوینەرایەتیا نێزیکی ١.٥ ملیۆن قوتابیێن پزیشکی ل ١٢٤ وەلاتان دکەت. بەرنامەیێ پێنج رۆژی پێكهاتبوو ژ راهێنان، وۆرکشۆپ، گفتوگۆ و چالاکیێن دروستکرنا پەیوەندیان ل دۆر پەروەردا پزیشکی، ساخلەمیا گشتی، مافێن مرۆڤی و ئاشتیێ، ڤەکۆلینێ، ئاڵوگۆڕا پیشەیی، سەرکردایەتی، داکۆکیکرن و پشکداریا جڤاکی. ئەڤ بەرنامەیە بوو ئەگەرێ کۆمکرنا قوتابیان ژ پاشخانێن جودا، بۆ هاندانا هەماهەنگی، لێکتێگەهشتن و دیالۆگا د ناڤبەرا کەلتۆران دا.

د پەیڤا خۆ یا پێشوازیێ دا، سەرۆکێ زانکۆیێ جەخت ل سەر وێ چەندێ کر کو باشترین پزیشکێن پاشەڕۆژێ ئەو نەیێن کو زانیاری و شیانێن پزیشکی دگەل هەڤسۆزی، دەستپاکی، کارێ تیمی، سەرکردایەتی و هەستەکێ کویر یێ مرۆڤایەتیێ تێکەل دکەن. وی هەروەسا گرنگیا بکارئینانا ژیرییا دەستکرد (AI) د چاڤدێریا ساخلەمیێ دا دیار کر، و دوپات کر کو پێدڤییە پزیشکێن پاشەڕۆژێ تەکنۆلۆژیایێ ب شێوەیەکێ سەلامەت، ژیرانە و ئەخلاقی بکاربینن، بێی کو ئەو تەکنۆلۆژیا ببیتە جێگرێ پەیوەندیا مرۆڤایەتی یا د ناڤبەرا پزیشک و نەخۆشان دا. هەروەسا شانازیا زانکۆیێ ب دەرچوویێن پزیشکی دەربڕی، و ل دوماهیێ، سوپاسیا رێکخەر، تیمێ ئامادەکاریێ و هەمی خۆبەخشان کر و هیڤیا سەرکەڤتنێ و کۆمبوونەکا ب بەرهەم، ب مفا و پڕ ژ فێربوونێ بۆ هەمی پشكداران خواست.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانکۆیێ، تەباخا ٢٠٢٦
راپۆرت: فاطمە محمود عەلی