زانکۆیا دهۆك، ٢٩ـی چریا ئێکێ، ٢٠٢٦، نڤیسینگەها راگەهاندنا زانکۆیێ | لقێ کۆمەلا ناڤدەولەتی یا قوتابیێن کێمیایێ یا سەرب کۆمەلا کێمیا یا ئەمریکی ل زانکۆیا دهۆك (UoD_ACS International Student Chapter)، ب هەڤکاری دگەل قوتابخانا جیهان یا ناڤدەولەتی، چالاکیەکا هۆشیاری و پەروەردەیی ل رۆژا سێشەمبی، ٢٧ـی چریا ئێکێ، ٢٠٢٦ـێ، ل کۆلیژا زانست ل زانکۆیا دهۆك سازکر، ئەڤە ژی بۆ پیرۆزکرنا هەفتەیا نەتەوەیی یا کێمیایێ بۆ سالا ٢٠٢٦، ل ژێر دروشمێ کۆمەلا کیمیا یا ئەمریکی "کیمیا د ئاڤاکرنێ دا یە (Chemistry Under Construction).

ئەڤ چالاکیە ب هەلکەڤتا یادا ١٥٠ سالیا دامەزراندنا کۆمەلا کێمیا یا ئەمریکی (ACS) هاتە ئەنجامدان و ئارمانجا سەرەکی یا وێ ئەوە کو قوتابیان هاندەت کو تێڤەببن و پشکداریا چالاکی و پروگرامێن زانستی یێن ناڤدەولەتی بکەن. هەوەسا ب رێیا پێشانگەها پۆستەرێن زانستی و کەلوپەلێن پەروەردەیی، قوتابیێن پشکدار رۆلێ کێمیایێ د ژیانا رۆژانە دا دیارکر، ب تایبەتی پشکداریا وێ د پێشڤەبرنا کەلوپەلێن ئاڤاکرنێ یێن پتر ب هێز، سلامەت، قایم و بەردەوام دا، ژ وان ژی کۆنکریت، ستیل و شووشە.

ئارمانج ژ ڤێ چالاکییێ بلندکرنا هوشیاریا زانستی ل دەڤ قوتابیێن قوتابخانەیان و بزاڤکرنا پێشئێخستنا هزرێن وان ، دگەل نیشاندانا چەوانیا پشکداریا کێمیایێ د داهێنانێ و پێشڤەبرنا بەردەوام دا. زێدەباری وێ چەندێ، گرنگیا هەڤکاریا د ناڤبەرا زانکۆیان و قوتابخانەیان ئاشکرا کر بۆ پشکداریکرنا نڤشێ نوی د چالاکیێن زانستی دا و گرێدانا خواندنا پۆلان دگەل پێدڤی و کارێن جیهانا راستیێ.

ب رێیا ڤان چالاکی و دەستپێشخەریان، لقێ کۆمەلا ناڤدەولەتی یا قوتابیێن کێمیایێ ل زانکۆیا دهۆك بەردەوامە ل سەر پشتەڤانیکرنا پشکداریا قوتابیان د پروگرامێن زانستی یێن ناڤدەولەتی، بلندکرنا ئاستێ پەروەردە و زانستی، و هاندانا نڤشێن داهاتی بۆ ڤەکۆلین و گەڕیان ل دەرفەتێن زانستی و تێکەلیکرنێ دگەل کۆمەڵگەها زانستی یا جیهانی.

ڤێرە کلیك بكە بۆ دیتنا وێنەیان

نڤیسینگەها راگەهاندنا زانکۆیێ، ٢٩ـی چریا ئێکێ، ٢٠٢٦
راپۆرت: بارین محەمەد ئەحمەد