هەولێر، ٢٩ـی خزیرانا ٢٠٢٦ - نڤیسینگەها راگەهاندنا زانکۆیێ

د دەستکەڤتەکێ ناوازە و پڕی شانازی دا بۆ زانکۆیا مە، تیما فوتسالا (کۆڕان) یا زانکۆیا دهۆک ناسناڤێ قارەمانیا فوتسالا زانکۆیێن هەرێما کوردستانێ ب دەستڤەئینا، پشتی کو د یاریا دویماهیێ دا سەرکەڤتنەکا گرنگ و مێژوویی ل سەر تیما زانکۆیا سلێمانیێ تۆمارکری.

ئەڤ قارەمانیە کو ب پشکداریا (٢٢) زانکۆیێن هەرێما کوردستانێ برێڤەچوو، یاریا وێ یا دویماهیێ ل ڕۆژا ئێکشەمبی ڕێکەڤتی ٢٨ـی خزیرانا ٢٠٢٦ـێ، ل هۆلا زانکۆیا سەلاحەددین ل پایتەختێ هەرێمێ (هەولێر) هاتە ئەنجامدان. تیما زانکۆیا دهۆک شیا بەردەوامیێ ب ئاستێ خۆ یێ بەرز و نموونەیی بدەت و ب ئەنجامێ (٦ - ٤) گۆلان سەركەڤتنێ بەرامبەر تیما زانکۆیا سلێمانیێ تۆماربكەت و ل سەر تەختی فوتسالا کۆڕان ل سەر ئاستێ زانکۆیێن هەرێمێ ڕابوەستیت.

هەژی گۆتنێ یە، گەهشتنا تیما زانکۆیا دهۆک بۆ ڤێ قۆناغێ پشتی وێ چەندێ دهێت کو د

یاریێن ڤاڤارتنێ یێن پارێزگەها دهۆکێ دا، کو ل ٢٢ـی خزیرانێ ب سەرپەرشتیا ڕێڤەبەریا وەرزشا زانکۆیا دهۆک و ب پشکداریا شەش زانکۆیان برێڤەچوون، تێدا زانکۆیا دهۆک دگەل زانکۆیا ئاکرێ پلێتا گەهشتنێ ب یاریێن قۆناغا دویماهیێ ل هەولێرێ مسۆگەر کربوو.

د ڕێورەسمێن دوماهی ئینانا قارەمانیێ دا، بەرێز (سەردار ئسماعیل)، ڕێڤەبەرێ گشتی یێ وەرزشێ، پیرۆزباهی و دەستخۆشی ل هەردوو زانکۆیێن دهۆک و سلێمانی کرن بۆ گەهشتنا وان ب قۆناغا دویماهیێ. د پەیڤا خۆ دا ناڤهاتی ئاماژە ب گرنگیا وەرزشێ ل ناڤەندێن خواندنێ (قوتابخانە، پەیمانگەهـ و زانکۆیان) کر و دیارکر کو وەرزش دەرگەهێ پێگەهاندنا یاریزانان و دەرئێخستنا ئاست و بەهرەیێن وانە، و تەکەز ل سەر وێ چەندێ کر کو وەرزش نە ب تنێ بزاڤەکا جەستەیی یە، بەلکو پەیامەکا ئاشتیێ یە د ناڤبەرا گەنجان

دا. ل دویماهیێ ژی، خەلات ب سەر هەردوو تیمێن سەرکەڤتیێن ڕێزێن ئێکێ و دووێ هاتنە

دابەشکرن.

ب بۆنەیا ڤێ سەرکەڤتنا مەزن، کۆمپانیا (کیا نیم) كو سپۆنسەرا قارەمانیێ بوو وەکو دیاری و خەلاتکرنەک بۆ ب دەستڤەئینانا پلەیا ئێکێ، دێ تیما فوتسالا زانکۆیا دهۆک ب گەشتەکا دەرڤەی وەلاتی

خەلات کەت.

ژ لایێ خۆ ڤە، ڕێڤەبەریا وەرزشی یا زانکۆیا دهۆک سوپاسیا پشتەڤانیا بەردەوام یا سەرۆکاتیا زانکۆیا دهۆک کر، کو هەردەم هاندەر و هەڤکارە بۆ پێشڤەچوون و پێشخستنا ئاستێ وەرزشی ل زانکۆیێ ژ بۆ ب دەستڤەئینانا سەرکەڤتنان د قارەمانیێن ب ڤی ڕەنگی دا. چونکی گەشەپێدانا ڤان جۆرە چالاکیان دبیتە ئەگەرێ بلندکرنا ئاستێ وەرزشی یێ گەنجان و قوتابییان ل سەرانسەری کوردستانێ.

ڤێرە كلیك بكە بۆ دیتنا وینەیان

نڤیسینگەەها راگەهاندنا زانكۆیێ، ٢٩ـی خزیرانا ٢٠٢٦
راپۆرت: بارین محەمەد ئەحمەد