زانکۆیا دهۆک، ٢٧ـی چریا دووێ ٢٠٢٥ | نڤیسینگەها راگەهاندنا زانکۆیێ (UNPO) – شاندەکی ژ زانکۆیا دهۆک (UOD) پشکداری د هەفتییا ڕاهێنانا RISE دا کر، یا کو ژ ١٨ تاکو ٢١ـی چریا دووێ، ٢٠٢٥ ل زانکۆیا مورسیا (University of Murcia) ل ئیسپانیا بڕێڤەچوو، وەک پشکەک ژ پرۆژێ RISE یێ کو ژ لایێ ئێکەتیا ئەورۆپا ڤە پشتەڤانیا دارایی بۆ دهێتە کرن (ب هێزکرنا تێکەلکرنا شیانان بۆ دەرڤەتێن کاری و ناڤدەولەتیکرنێ ل هەرێما کوردستانێ - عیراق).

پرۆگرامێ ڕاهێنانێ ستافێ زانکۆیێن هەرێما کوردستانێ کۆمکرن ژ بۆ ئاشنابوون ب مۆدێلێن ئەورۆپی یێن پێشکەڤتی د وارێ پێشئێخستنا دەرڤەتێن کاری (Employability)، کارسازی، گونجاندنا پرۆگرامێن خواندنێ، و هەڤکاریا ئەکادیمی یا ناڤدەولەتی. شاندێ زانکۆیا دهۆک پشکداری د وانە، وۆرکشۆپ و چالاکیێن پراکتیکی دا کر یێن کو هاتینە دیزاینکرن بۆ ب هێزکرنا شیانان و ڤەگوهاستنا باشترین ئەزموونان بۆ سیستەمێ ئەکادیمی و کارگێڕی یێ زانکۆیا دهۆک.

خالێن سەرەکی یێن ڕاهێنانێ
د ماوێ چوار ڕۆژێن پرۆگرامی دا، ستافێ زانکۆیا دهۆک پشکداری د چالاکیان دا کر کو ئەڤێن ل خوارێ بوون:

• ڕوینشتنێن سازییان (Institutional sessions) دگەل سەرۆکایەتیا زانکۆیا مورسیا ل دۆر ناڤدەولەتیکرنێ و خزمەتگوزاریێن دابینکرنا کاری بۆ قوتابیان.
• وۆرکشۆپێن پراکتیکی ل دۆر گونجاندنا پرۆگرامێن خواندنا زانکۆیێ دگەل پێدڤیێن بازارێ کاری، سیستەمێن وەرگرتنا فیدباگێن کارسازان، و ناڤەندێن گەشەپێدانا کارسازی (incubation).
• سەردانێن مەیدانی بۆ سەنتەرێ مورسیا یێ کارسازی و نویگەریێ، UMUEmprende، COIE (سەنتەرێ ڕێبەریا کاری و زانیاریان)، و نڤیسینگەها پەیوەندیێن ناڤدەولەتی.
• گەنگەشە ل سەر ئاڤاکرنا پەیوەندیان د ناڤبەرا زانکۆیێ و کەرتێ پیشەسازیێ، پێشئێخستنا شیانێن نەرم (soft skills)، هاکەسۆن (هەلکەڤتێن مەزن بۆ پرۆگرامکرنێ) (hackathons)، و ڕێکێن باشترکرنا ئامادەییا قوتابیان بۆ کاری.

پرۆگرامی هەروەسا ئەجێندایەکێ کەلتووری، ڕوونشتنێن دروستکرنا تۆڕێن پەیوەندیان (networking)، و ئالوگۆڕکرنا نێرینان دگەل ڕێکخەر، هەلسەنگێنەر و دامەزراوەیێن هەڤکار یێن پرۆژێ RISE بخۆڤةگرتن.

پابەندبوونا زانکۆیا دهۆک ب گەشەپێدانا شیانێن ستراتیژی
پشکداریکرن د هەفتییا ڕاهێنانا RISE دا ب ئاوایەکێ ڕاستەوخۆ پشتەڤانیێ ل چەندین ستوونێن پلانا ستراتیژی یا زانکۆیا دهۆک (٢٠٢٣-٢٠٣٨) دکەت، ب تایبەتی:

• پێشئێخستنا شیانێن بدەستڤەئینانا کاری (employability) بۆ قوتابی و دەرچوویان.
• بهێزکرنا شیانێن ستافی ب ڕێکا تێکەلبوونێ دگەل ژینگەها ناڤدەولەتی.
• بەرفرەهکرنا هەڤپشکیێن جیهانی دگەل زانکۆیێن ئەورۆپی.
• پێشڤەبرنا نویگەری و کارسازیێ د ناڤ پێکهاتەیا ئەکادیمی یا زانکۆیا دهۆک دا.

ب ڕێکا ڤێ پشکداریێ، زانکۆیا دهۆک بەردەوامە ل سەر موکومکرنا پێگەهێ خۆ وەکو دامەزراوەیەکا پێشەنگ د گوهۆڕینا خواندنا بلند ل هەرێما کوردستانێ، پێشێخستنا کوالێتییا فێربوونێ، و ئامادەکرنا دەرچوویان ب وان شیانێن کو پێدڤینە بۆ هەڤڕکییا جیهانی.

ڤێرە کلیک بکە بۆ دیتنا وێنەیان

نڤیسینگەها راگەهاندنا زانکۆیێ – ٢٧ـی چریا دووێ ٢٠٢٥
راپۆرت: فاطمە محمود علی

پەیڤێن سەرەکی:

• پرۆژێ RISE کوردستان
• ناڤدەولەتیکرنا زانکۆیا دهۆک
• شیانێن کارکرنێ و خواندنا بلند عیراق
• هەفتییا ڕاهێنانێ ل زانکۆیا مورسیا
• گونجاندنا پرۆگرامێن خواندنێ و کارسازی