٢٧ـی چریا دووێ، ٢٠٢٥، نڤیسینگەها راگەهاندنا زانکۆیێ | ل ڕۆژا سێشەمبی، ڕێکەڤتی ٢٥ـی چریا دووێ، ٢٠٢٥، سەنتەرێ خواندنێن ئاشتیێ و چارەسەرکرنا ململانێ ل زانکۆیا دهۆک، ب هەڤکاری دگەل ڕێکخراوا LWF، کۆربەندەکێ گرنگ ب ناڤێ: "پاراستنا هەمەجوریا کەلتووری ل دەڤەرێ" ڕێکئێخست. ئەڤ چاڵاکیە ل سەنتەرێ ڕەوشەنبیری و جڤاکی ل زانکۆیا دهۆک هاتە ئەنجامدان.

د ڤی کۆربەندی دا، گەنگەشە ل دۆر دیکیومێنتکرن و پاراستنا هەمەجوریا کەلتووری ل دەڤەرێ ژ لایێ کەسایەتیێن تایبەتمەند ڤە برێڤەچوون.

دەستپێکا چالاکیێ:

ل دەستپێکا کۆربەندی، م. خدر کالۆ عەلی، بەرپرسێ سەنتەرێ خواندنێن ئاشتیێ و چارەسەرکرنا ململانێ ل زانکۆیا دهۆک، پەیڤەک پێشکێشکر و تێدا باس ل ئارمانج و گرنگیا ئەنجامدانا ڤی پانێلی کر.

پاشان، پەیڤا سەرۆکێ زانکۆیێ ژ لایێ د. نەزار ئەمین محەمەد، ڕێڤەبەرێ پەیوەندیێن زانکۆیا دهۆک، هاتە پێشکێشکرن. ناڤهاتی ل پێشیێ دەستخۆشی ل ڕێکخەرێن ڤێ چاڵاکیێ کر، و پاشان گرنگیا کەلتوورێ پێکڤەژیانێ و دیکیومێنتکرنا کەلتووری شڕۆڤە کر، و گۆت کو زانکۆیا دهۆک ب بەردەوامی خۆ ل ڤان بابەتێن گرنگ کریە خۆدان.

پانێلێن کۆربەندی:

• پانێلێ ئێکێ:

ئەڤ پانێلە ژ سێ تەوەرێن سەرەکی پێک هات، کو تێدا:

• م. کۆڤان ڕێسان حەسەن، مامۆستایێ زانکۆیێ، باس ل دیکیومێنتکرن و پاراستنا کەلتوورێ ئێزدییان کر.
• م. میخائیل بنیامین داود، چالاکڤانێ ئاشووری، باس ل دیکیومێنتکرن و پاراستنا کەلتوورێ ئاشوورییان ل دەڤەرێ کر.
• م. بەهار عەلی حەیدەر، ڕێڤەبەرا ئينستیتيووتا کەلەپۆرێ کوردی ل دهۆک، باس ل گرنگییا دیکیومێنتکرنا کەلەپۆرێ کوردی کر.

پانێلێ دووێ:

، پانێلێ دووێ ب شێوەیێ گەنگەشەیەکا ڤەکری ژ لایێ ئامادەبوویان ل دۆر میکانیزمێن دیکیومێنتکرن و پاراستن و ناساندنا کەلتۆرێ پێکهاتێن دەڤەرێ هاتە ئەنجامدان، و ژمارەکا زۆرا پرسیاران هاتنە ئاراستەکرن و گەنگەشەکرن .

ل دوماهییا کۆربەندی، ڕێزلێنان و خەلاتێن پشکداریێ ل سەر پانێلستان هاتنە دابەشکرن، و ب ڤی شێوەی پرۆگرامێ کۆربەندێ ب سەرکەڤتیانە هاتە ب دوماهیئینان.

گونجاندن دگەل پلانا ستراتیژی یا زانکۆیا دهۆک

ئەڤ وۆرکشۆپە ب ئاوایەکێ ڕاستەوخۆ پشتەڤانیێ ل پلانا ستراتیژی یا زانکۆیا دهۆک دکەت، ب تایبەتی ئەو ئارمانجێن گرێدایی تێکەلی یا جڤاکی، پاراستنا کەلەپۆرێ کەلتووری، و ب هێزکرنا هەڤکاریا ئەکادیمی و جڤاکی. ب ڕێیا پێشئێخستنا گفتوگۆیێ د ناڤبەرا بسپۆر و چالاکڤانێن کەلتووری یێن خۆجهی دا، زانکۆ ڕۆلێ خۆ وەکو سازیەکا پێشەنگ د پاراستنا ناسنامەیا کەلتووری یا دەڤەرێ و پێشبرنا پێشکەڤتنا گشتگیر دا موکومتر لێ دکەت.

نڤسینگەها راگەهاندنا زانکۆیێ ٢٧ـی چریا دووێ، ٢٠٢٥
راپۆرت: نیبار حەجی حسێن
وێنەگرتن: عەلی حەبیب حەبیب