زانکۆیا دهۆك، ٢٦ـی ئیلۆنا ٢٠٢٦ | راگەهاندنا زانکۆیا دهۆك (UNPO) — زانکۆیا دهۆك (UOD) ل رێکەڤتی ٢١ـی ئیلۆنا ٢٠٢٦ رۆژا جیهانی یا ئاشتیێ ساخ کر، و تیشك ئێخستە سەر بهایێن ئاشتی، پێکڤەژیان، لێبۆرین و سەقامگیریا جڤاکی. ئەڤ چالاکیە ب چاڤدێریا پارێزگارێ دهۆکێ د. عەلی تەتەر، ژ لایێ سەنتەرێ خواندنێن ئاشتیێ و چارەسەرکرنا ململانێ ل زانکۆیا دهۆك ب هەڤکاری دگەل پارێزگەها دهۆکێ، رێڤەبەریا گشتی یا رەوشەنبیری و هونەری ل پارێزگەهێ و رێکخراوا جیهانا باشتر (Better World) ڤە هاتە رێکئێخستن.

رێورەسم ب ئامادەبوونا پارێزگارێ دهۆکێ، سەرۆکێ زانکۆیێ د. داود سلێمان ئەتروشی، د. ڤیان سلێمان جێگرا مەکتەبا رێکخستنا پارتی دیموکراتی کوردستان، قایمەقامێ دهۆکێ بەرێز بریندار حەیدەر، و ژمارەکا بەرچاڤ ژ بەرپرسێن حکومی و حزبی، مامۆستایێن ئاینی، مامۆستایێن زانکۆیێ، قوتابیان و نوینەرێن جڤاکێ خۆجێی بڕێڤەچوو.

د گۆتارا خۆ دا، پارێزگارێ دهۆکێ تیشك ئێخستە سەر ئەزموونا باژێڕی د پێکڤەژیانا ئاشتیانە و سەقامگیریێ دا، و جەخت ل سەر وێ یەکێ کر کو دهۆك نموونەیا پێکڤەژیانێ یە ل جیهانێ و باژێڕەکە پێگیرە ب ئاشتیێ. هەروەسا پەیڤا سەنتەری ژ لایێ راهێنەرێ سەنتەری، م. خدر كالۆ عەلی ڤە هاتە پێشکێشکرن و رۆلێ زانکۆیێ د پێشڤەبرنا زانین و دەستپێشخەریێن پەیوەندیدار ب ئاشتیێ ڤە بلند نرخاند.

پاشان، بەرنامێ چالاکیێ چەندین بڕگەیێن دۆکیۆمێنتاری، هونەری و موزیکێ ژ لایێ تیپێن جودا ڤە ب خۆڤە گرتن، کو گوزارشت ژ بابەتێن ئاشتی، پێکڤەژیان و تێگەهشتنا کەلتۆری دکر. ئەڤ پشکداریە هەروەسا رۆلێ پەروەردە و چالاکیێن کەلتۆری د چەسپاندنا کەلتۆرێ لێبۆرینێ و پێکڤەژیانا ئاشتیانە ل دهۆکێ و جڤاکی ب گشتی سەلماندن.

ئەڤ هەلکەڤتە پابەندبوونا زانکۆیا دهۆك ب ئاڤاکرنا ئاشتیێ، هەڤگرتنا جڤاکی، پشکداریا کۆمەلگەهێ و بەلاڤکرنا کەلتۆرێ دیالۆگێ و پێکڤەژیانێ نیشان ددەت، کو ل گەل ئەرکێ وێ یێ بەرفرەهـ یێ ئەکادیمی و جڤاکی دگۆنجیت.

ڤێرە کلیك بکە بۆ دیتنا وێنەیان

راگەهاندنا زانكۆیا دهۆك، ٢٦ـی ئیلۆنا ٢٠٢٦
راپۆرت ژ لایێ: نیبار حەجی حسێن
وێنە: عەلی حەبیب حەبیب