زانکۆیا دهۆك، ٢٤ـی چریا ئێکێ ٢٠٢٦ | نڤیسینگەها راگەهاندنا زانکۆیێ (UNPO) — سەنتەرێ خواندنێن ئاشتیێ و چارەسەركرنا ململانێ ل زانکۆیا دهۆك ب هەڤکاری دگەل رێکخراوا لۆثەر (LWF) یا ناڤدەولەتی و ئێکەتیا قوتابی و لاوێن دیموکراتا کوردستانێ، فێستەڤالەکا کەلتۆری ل قەزا سێمێلێ ل رۆژا پێنجشەمبی، ٢٢ـی چریا ئێکێ ٢٠٢٦، ساز کر. ئەڤ چالاکیە وەك ڕێورەسمێ ب دوماهیئینانا پرۆژێ "بهێزکرنا گەنجان" هاتە ڕێکخستن، یێ

كو ب مەرەما پێشخستنا گفتوگۆ، ئاشتیێ، ئێکگرتنا جڤاکی و پێکڤەژیانا ئاشتیانە د ناڤبەرا پێکهاتەیێن ئۆلی و کەلتۆری یێن جودا ل قەزایێ هاتبوو دارێژتن.

فێستەڤال ب ئامادەبوونا ژمارەکا بەرچاڤ یا بەرپرسێن حکومی، حزبی و ئەکادیمی برێڤەچوو. د ناڤ ئامادەبوویان دا، د. عومران عومەر عەلی، رێڤەبەرێ سەنتەری؛ م. خدر كالۆ عەلی، راهێنەر و رێكخەرێ سەنتەری؛ بەرێز رەمەزان مەجید محەمەد، رێڤەبەرێ پاراستن و ئاشتیا جڤاکی ل رێکخراوا لۆثەر؛ و بەرێز ئیبراهیم سامی محەمەد بەرپرسێ ناوچا زانکۆ و پەیمانگەهان یا ئێکەتیا قوتابی و لاوێن دیموکراتا کوردستانێ بوون. زێدەباری ژمارەیەکا ئەکادیمی، نوینەرێن دامەزراوەیێن گشتی، کەسایەتیێن سیاسی، نوینەرێن راگەهاندنێ، و مامۆستا و قوتابیێن زانكۆیێ.

پرۆژێ بهێزکرنا گەنجان، گەنجێن پێکهاتەیێن جودا ل خۆ کۆمکرن، بۆ هاندانا وان ل سەر ئەنجامدانا گفتوگۆیێ، دروستکرنا تێگەهشتنا هەڤپشك، و پشکداریکردن د ئاڤاکرنا ئاشتیێ دا ل سەر بنەمایێ مافێن مرۆڤی. فێستەڤالێ دەلیڤەیەك ڕەخساند بۆ هەلسەنگاندن و بیرانینا ئەزموونێن گەنجێن خۆبەخش و ڕێزگرتن ل پشکداریا وان د چالاکیێن کو هشیاریا کەلتۆری و پێکڤەژیانا ئاشتیانە ل قەزا سێمێلێ پێش دئێخن.

بەرنامەیێ فێستەڤالێ ب نیشاندانا ڤیدیۆیەکێ ل دۆر فێستەڤالێ و ئارمانجێن وێ

دەستپێکر، پاشان پەیڤێن بخێرهاتنێ ژلایێ نوینەرێن سەنتەرێ خواندنێن ئاشتیێ و چارەسەركرنا ململانێ ڤە هاتنە پێشکێشکرن. هەروەسا پەیامێن رێکخراوا لۆثەر و ئێکەتیا قوتابی و لاوێن دیموکراتا کوردستانێ هاتنە خواندن، کو تیشك ئێخستە سەر گرنگیا پشکداریا گەنجان د بهێزکرنا پەیوەندیێن جڤاکی دا.

د بەرنامەیێ فێستەڤالێ دا، فیلمەکێ دۆکیۆمێنتاری ل دۆر ئەزموونێن گەنجێن خۆبەخش هاتە نیشاندان، کو تێدا سەرەدانا وان بۆ پەرستگەهێن ئۆلێن جودا (موسلمان، كریستیان، و ئێزدی) هاتبوو بەلگەکرن. ئەڤ چالاکیە بوو دەلیڤەیەك بۆ پشکداربوویان کو پتر ل سەر فرەڕەنگیا ئۆلی یا قەزایێ و گرنگیا رێزگرتن و تێگەهشتنا هەڤپشك د ناڤبەرا پێکهاتەیان دا فێرببن.

هەروەسا بەرنامەی پێشکێشکرنا سترانەکێ ژلایێ هۆنەرمەند لالش ڤە ب خۆڤە گرت. چەند قوتابیان ژی ئەزموونێن پشکداریا خۆ د چالاکیێن مەیدانی دا ڤەگێڕان، کو ئارمانج ژێ ناساندن و پێشخستنا کەلتۆر و داب ونەریتێن دەڤەرا بەهدینان بوو. ل دوماهیا بەرنامەی، باوەرنامەیێن ڕێزلێنانێ ب سەر گەنجێن خۆبەخش دا هاتنە دابەشکرن وەك پێزانین بۆ پشکداری و هەوڵێن وان. فێستەڤال ب کەشوهەوایەکێ شاد، ژەنینا موزیكێ و سترانێن ڕەسەن ب دوماهی هات، کو کەشەکێ هەڤالینی و ئاڵوگۆڕا کەلتۆری دروستکر.

ب ڕێیا سەنتەرێ خواندنێن ئاشتیێ و چارەسەركرنا ململانێ، زانکۆیا دهۆك بەردەوامە ل سەر پشتەڤانیکرنا وان دەستپێشخەریان یێن کو گەنجان تێکەلی گفتوگۆ، چارەسەرکرنا ململانێ، و ئاڤاکرنا ئاشتیا جڤاکی دکەن. ئەڤ فێستەڤالە گرنگیا هەڤکاریا د ناڤبەرا دامەزراوەیێن ئەکادیمی و رێکخراوێن جڤاکێ سڤیل د پێشخستنا ئێکگرتنا جڤاکی و پێکڤەژیانا ئاشتیانە دا دیار دکەت.

ڤێرە كلیك بكە بۆ دیتنا روومالا راگەهاندنێ

نڤیسینگەها راگەهاندنا زانکۆیێ، ٢٤ـی چریا ئێکێ، ٢٠٢٦

راپۆرت: رۆندك فازل عادل

وێنە: محەمەد ع. تاهر

پەیڤێن سەرەکی: زانکۆیا دهۆك پرۆژێ بهێزکرنا گەنجان پێکڤەژیانا ئاشتیانە ل سێمێلێ سەنتەرێ خواندنێن ئاشتیێ و چارەسەركرنا ململانێ پشکداریا گەنجان و گفتوگۆیا د ناڤبەرا کەلتۆران دا