ئەڤرۆ رێکەڤتی ٢٤ـێ چریا دووێ یا ٢٠٢٥، د چارچۆڤەیێ بهێزکرنا پەیوەندیێن ئەکادیمی یێن ناڤدەولەتی دا، ئەڤرۆ رێزدار پ. د. داود سلێمان ئەتروشی، سەرۆکێ زانکۆیا دهۆک، پێشوازی ل بەرێز سیونگچول لیم (Seungcheol LIM)، قونسولێ گشتیێ کۆمارا کۆریا باشوور ل هەولێرێ، کر. د کۆمبوونەکێ دا کو تێدا گرنگی ب هەڤکاریا د بیاڤێن تەکنۆلۆژیایێن پێشکەڤتی و مفا وەرگرتنێ ژ ئەزموونێن ئابووری هاتە دان، هەردوولا لسەر چەندین مژارێن ستراتیژی یێن هەڤپشک راوەستیان.

ل دەستپێکا کۆمبوونێ، سەرۆکێ زانکۆیێ ب گەرمی بخێرهاتنا قونسولێ گشتیێ کۆمارا کۆریا باشوور کر و سوپاسیا وان کر بۆ پەیوەندی و هەڤکاریا وان یا بەردەوام. ژ لایێ خۆ ڤە، قونسولێ گشتیێ کۆریا خۆشحالیا خۆ ب سەرەدانا دووێ بۆ زانکۆیا دهۆک دەربڕی و رۆلێ زانکۆیێ بلند نرخاند.

ئێک ژ تەوەرێن سەرەکی یێن کۆمبوونێ، هەڤکاری بوو د بیاڤێ ژیریا دەستکرد (AI) دا. د ڤی چارچۆڤەی دا، قونسولێ گشتی ب فەرمی زانکۆیا دهۆک داخواز کر بۆ پشکداریکرنێ د ئۆلمپیادا ناڤدەولەتی یا ژیریا دەستکرد (IOAI) دا، کو پێشبڕکیەکا جیهانی یا سالانە یە بۆ قوتابیێن خودان شیان د بیاڤێن وەک بینینا کۆمپیۆتەری و زمانێ سروشتی دا. سەرۆکێ زانکۆیێ ب گەرمی پێشوازی ل ڤێ داخوازنامێ کر و ئامادەییا زانکۆیێ بۆ ئاڤاکرنا تیمەکا تایبەت و پشکداریکرنێ د ڤێ چالاکیا زانستی یا گرنگ دا نیشا دا.

د پشکەکا دی یا دیدارێ دا، باس ل گرنگیا پەرەپێدانا ڤەکۆلینێن ئابووری ل هەرێما کوردستانێ هاتەکرن. د ڤێ گەنگەشێ دا، باس ل رێکێن مفاوەرگرتنێ ژ ئەزموونا سەرکەڤتی یا کۆریا باشوور وەکو نموونەیەکا زیندی هاتە کرن، ب تایبەتی د دامەزراندنا سەنتەرێن ڤەکۆلینێن ستراتیژی دا کو بووینە بنەمایێ پێشکەڤتنا ئابووریا وێ. هەردوولا هەڤڕا بوون کو بکارئینانا "مێشکێن ناڤخۆیی" کلیلا دانانا ستراتیژیەکا ئابووری یا سەرکەڤتی یە بۆ هەرێما کوردستانێ، کو تێدا زانکۆ دشێت رۆلەکێ کاریگەر بگێڕیت.

د. داود ئەتروشی رۆلێ زانکۆیا دهۆک وەکو پێشەنگ د پرۆسێسا ب سازیکرنێ و خزمەتکرنا جڤاکی دا دیارکر و ئاماژە دا کو زانکۆ ب رێکا پرۆگرامێن ستراتیژی یێن جودا، بەردەوام کار دکەت بۆ هندێ کو ببیتە پشکەکا چالاک ژ چارەسەریێ بۆ ئاریشەیێن هەرێمێ.

ل دویماهیێ، هەردوولا لسەر بەردەوامیدان ب هەماهەنگی و ڤەکرنا دەرگەهێن نوی یێن هەڤکاریێ هەڤڕابوون، کو دێ خزمەتا بەرژەوەندیێن هەڤپشک و پێشڤەبرنا زانستی و ئابووری ل هەرێما کوردستانێ کەن.

ڤێرە کلیک بکە بۆ دیتنا وێنەیان

راگەهاندنا زانکۆیا دهۆک؛ ٢٤ـی چریا دووێ ٢٠٢٥

عسمەت مەحمود محەمەد

وێنە: محەمەد عەبدولکەریم