زانکۆیا دهۆك، ٢٣ـی ئیلۆنا ٢٠٢٦ | نڤیسینگەها راگەهاندنا زانکۆیێ (UNPO) — زانکۆیا دهۆك ئاهەنگا دەرچوونێ یا هەلگرێن باوەرنامێن خواندنا بلند بۆ سالا خواندنێ (٢٠٢٥-٢٠٢٦) سازکر.

ئەڤ رێورەسمە ل سەنتەرێ کۆنفرانسان یێ زانکۆیا دهۆك بڕێڤەچوون، ب مەرەما پیرۆزکرن و بلند نرخاندنا دەستکەڤتێن ئەکادیمی یێن ٥٢٦ دەرچوویان کو خواندنا خۆ یا دبلۆم، ماستەر و دکتۆرایێ ب دوماهی ئیناین.

سەرۆکاتیا زانکۆیێ و بەرپرس پشکداری ئاهەنگێ دبن

رێورەسمێن ئاهەنگێ ب شێوەیەکێ فەرمی دەستپێکر ب هاتنا جڤاتا زانکۆیێ بۆ سەر ستەیجی، و پاشان ب رێزگرتن ل سرۆدا نیشتمانی بەرنامەیێ ئاهەنگێ دەستپێکر.

د رێورەسمان دا هەر ئێك ژ د. عەلی تەتەر، پارێزگارێ دهۆکێ؛ د. داود سلێمان ئەتروشی، سەرۆکێ زانکۆیا دهۆك؛ د. ئەمیر چالی، نوینەرێ وەزارەتا خواندنا بلند و ڤەکۆلینێن زانستی؛ د. سەباح وەیس، شێوەرمەندێ وەزارەتێ؛ د. ڤیان سلێمان، نوینەرا مەکتەبا رێکخستنا پارتی دیموکراتی کوردستان؛ سەرۆکێن زانکۆیێن زاخۆ و نەورۆز؛ نوینەرێن دامەزراوەیێن حکومی و حزبی؛ جڤاتا زانکۆیێ؛ ئەکادیمی و مالباتێن دەرچوویان

ئامادەبوون.

٥٢٦ دەرچوویێن خواندنا بلند

د پەیڤا خۆ دا، د. لوقمان هادی حەسەن، هاریکارێ سەرۆکێ زانکۆیێ بۆ کاروبارێن زانستی و خواندنا بلند، پیرۆزباهی ل دەرچوویان کر و داخواز ژ وان کر کو د ژیانا خۆ یا ئەکادیمی و پیشەیی دا پێگیربن ب دەستپاکی و رەسەناتیا ئەکادیمی. هەروەسا هیڤی خواست کو دەرچووی بگەهنە خەونێن خۆ و ئارمانجێن مالباتێن خۆ.

د دەمێ گۆتارا خۆ دا، د. لوقمان ئامارێن ٥٢٦ دەرچوویێن پرۆگرامێن خواندنا بلند ل زانکۆیا دهۆك پێشکێشکرن، کو د ناڤبەرا ١ـی شواتا ٢٠٢٥ تا ١٥ـی ئیلۆنا ٢٠٢٦ـێ گەنگەشەکرنا نامە و تێزێن خۆ ب دوماهی ئیناینە. دەرچووی ل سەر کۆلیژ و دامەزراوەیێن ئەکادیمی یێن زانکۆیێ ب ڤی شێوەیێ ل خوارێ هاتبوونە دابەشکرن:

- کۆلیژا ئەندازیاری: ٢٤ دەرچووی

- کۆلیژا یاسا: ٢٤ دەرچووی

- کۆلیژا زمانان: ٣١ دەرچووی

- کۆلیژا پزیشکی: ٩ دەرچووی

- کۆلیژا پزیشکیا ددانان: ١٧ دەرچووی

- کۆلیژا پزیشکیا ڤێتێرنەری: ٨ دەرچووی

- کۆلیژا زانستێن مرۆڤایەتی: ٥٤ دەرچووی

- کۆلیژا زانست: ٣٧ دەرچووی

- کۆلیژا دەرمانسازی: ١٢ دەرچووی

- پەیمانگەها چارەسەریا دەروونی و تراومایێ: ٥ دەرچووی

- کۆلیژا پەروەردا جەستەیی و زانستێن وەرزشی: ٥ دەرچووی

- کۆلیژا زانستێن تەندروستی: ٢٣ دەرچووی

- کۆلیژا پەروەردا بنیات: ٩٦ دەرچووی

- کۆلیژا پەروەردا بنیات - ئاكرێ: ٢٤ دەرچووی

- کۆلیژا پلانسازیا شار و هەرێمان: ١١ دەرچووی

- کۆلیژا کارگێڕی و ئابووری: ٥٥ دەرچووی

- کۆلیژا زانستێن سیاسی: ١٥ دەرچووی

- کۆلیژا زانستێن ئەندازیاریا چاندنێ: ٧٠ دەرچووی

- کۆلیژا پەرستاری: ١ دەرچووی

ب گشتی، ٥٢٦ دەرچوویێن پرۆگرامێن خواندنا بلند ل زانکۆیا دهۆك د دەما ناڤبەرا ١ـی شواتا ٢٠٢٥ تا ١٥ـی ئیلۆنا ٢٠٢٦ـێ دا گەنگەشەیێن خۆ ب سەرکەڤتیانە ب دوماهی ئیناینە.

پابەندبوون ب ڤەکۆلین و پێشڤەچوونا ئەکادیمی

د پەیڤا خۆ دا، د. داود سلێمان ئەتروشی، سەرۆکێ زانکۆیا دهۆك، ب گەرمی پیرۆزباهی ل دەرچوویان کر و تیشك ئێخستە سەر چالاکیێن ڤەکۆلینێ یێن زانکۆیێ. ناڤبری دیارکر کو چەندین هێلێن ڤەکۆلینێ بۆ

بەرسڤدانا پێدڤیێن جڤاکی و ئابووری هاتینە دەستنیشانکرن، و جەخت ل سەر وێ یەکێ کر

کو ڤەکۆلینێن وان پشکدار بووینە د دروستکرنا رێڕەوان و دابینکرنا زانیاریان بۆ وان

ئەکادیمیێن کو دێ ل دویڤ وان هێن.

کاروانێ زانینێ بەردەوامە

دیسان، د. عەلی تەتەر، پارێزگارێ دهۆکێ، پیرۆزباهی ل دەرچوویان کر و جەخت ل سەر وێ یەکێ کر کو کاروانێ زانست و دەستکەڤتێن ئەکادیمی کاروانەکێ بەردەوامە و چ جاران ب دوماهی ناهێت.

ژ لایێ خۆ ڤە، د. ئەمیر چالی، نوینەرێ وەزارەتا خواندنا بلند و ڤەکۆلینێن زانستی، ئاماژە ب بزاڤێن بەردەوام یێن وەزارەتێ کر بۆ باشترکرنا ژینگەها پەروەردەیی و بلندکرنا ئاستێ زانکۆیان. ناڤبری تەكەزی کر کو پشکێن زانستی بنەمایێ سەرەکی یێ پرۆسەیا فێرکرن و فێربوونێ نە، و ئاستێ لێهاتیبوونا وان پشکداریێ د دارێژتنا پاشەڕۆژا کەرتێ ئەکادیمی یێ وەلاتی دا دکەت.

پەیامەك ب ناڤێ دەرچوویان

ب نوینەرایەتیا هەمی دەرچوویان، دەرچووی (رێبەر عوسمان) پەیڤەك پێشکێشکر و تێدا سوپاسی و پێزانینێن خۆ یێن کویر ئاراستەی سەرۆکاتیا زانکۆیێ، جڤاتا زانکۆیێ، سەرپەرشتیارێن ئەکادیمی و هەمی مامۆستایان کر ل هەمبەر پشتەڤانیا وان یا بەردەوام د درێژیا کاروانێ وان یێ ئەکادیمی دا.

هەروەسا سوپاسی و رێزەکا تایبەت پێشکێشی مالباتێن دەرچوویان کر، بۆ رۆلێ وان یێ مەزن و پشتەڤانیا وان یا سەرەکی د هاریکاریکرنا قوتابیان دا ژبۆ گەهشتنا ب سەرکەڤتیانە ب ڤێ رۆژا پڕ شانازی.

پیرۆزکرنا دەستکەڤتێن ئەکادیمی

ئەڤ چالاکیە پابەندبوونا جڤاکێ زانکۆیێ ب خواندنا بلند، ڤەکۆلینێن زانستی، دەستپاکیا ئەکادیمی و پێشڤەبرنا بەردەوام یا دەرچوویان نیشان ددەت، کو بشێن پشکداریێ د پێشئێخستنا جڤاکی دا بکەن.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانكۆیێ، ٢٣ـی ئیلۆنا ٢٠٢٦

راپۆرت: فاطمە مەحمود عەلی

وێنە: محەمەد ع. تاهر، عەلی حەبیب حەبیب، هەرمان جانگیر ئەحمەد