زانکۆیا دهۆك، ٢٢ـی چریا ئێكێ ٢٠٢٦ | نڤیسینگەها راگەهاندنا زانکۆیێ— زانکۆیا دهۆك مێهڤانداریا ڤەکرنا هەشتەمین کۆنفرانس و پێشانگەها ناڤدەولەتی یا کۆمەلا و پزیشکێن سینگی و دلی ل کوردستانێ کر ل ڕۆژا پێنجشەمبی، ٢٢ـی چریا ئێكێ ٢٠٢٦، کو تێدا پزیشك و پسپۆڕێن پزیشکی خرڤەکرن بۆ ئاڵوگۆڕکرنا زانیاریێن زانستی و گەنگەشەکرنا دوماهیک پێشکەڤتنێن د بوارێ پزیشکیا

دل و دەمارێن خوینێ و چاڤدێریا سینگی دا.

د ڕێورەسمێن ڤەکرنێ دا، هەر ئێك ژ د. سامان بەرزنجی، وەزیرێ ساخلەمیێ ل حکومەتا هەرێما کوردستانێ؛ د. داوود سلێمان ئەتروشی، سەرۆکێ زانکۆیا دهۆك؛ د. ئەفراسیاب موسا، رێڤەبەرێ گشتیێ ساخلەمیێ ل دهۆکێ؛ د. دیار عەبدولکەریم، سەرۆکێ زانکۆیا زاخۆ؛ د. دلدار حاجی موسا، راگرێ كۆلیژا پزیشكی، و خانم ڤیان سلێمان، جێگرا بەرپرسێ مەکتەبا ڕێکخستنا پارتی دیموكراتی كوردستان ل دهۆکێ ئامادەبوون. هەروەسا کۆنفرانسی کۆمەکا پزیشك و پسپۆڕێن ناڤخۆیی، عێراقی و ناڤدەولەتی ل خۆ کۆمکرن.

ئەڤ کۆنفرانسێ بۆ دەمێ دوو رۆژان دێ ڤەکێشیت، ژلایێ کۆمەلا پزیشکێن سینگی و دلی ل کوردستانێ، ب پشتەڤانی و هەڤکاریا راستەوخۆ یا وەزارەتا ساخلەمیێ یا حکومەتا هەرێما کوردستانێ و زانکۆیا دهۆك هاتیە ڕێکخستن، و ژلایێ کۆمپانیایا

"ئێلیگانزا" (Eleganza) ڤە بڕێڤەچوو. هەروەسا ب فەرمی ژلایێ کۆمەلا ئەوروپی یا دلی (ESC) ڤە هاتیە پەسەندکرن. د هەمان دەم دا، پشتەڤانی ژ چەندین ڕێکخراو و کۆمەلەیێن پیشەیی یێن هەرێمی و ناڤدەولەتی وەرگرتیە، ژ وان ژی کۆمەلا ناڤدەولەتی یا

ئەتیرۆسکلۆرۆسیس (IAS)، کۆمەلا عەرەبی بۆ دەستوەردانێن دل و دەمارێن خوینێ (PACIA)، و کۆمەلا کەنداڤی بۆ نەشتەرگەریا دلی (GSCS).

کۆلیژا پزیشکی ل زانکۆیا دهۆك ئێکە ژ دامەزراوەیێن هەڤکار د ڤی کۆنفرانسی دا، کو ئەڤ چەندە رۆلێ زانکۆیێ د پێشئێخستنا خواندنا پزیشکی، پشتەڤانیکرنا ڤەکۆلینێن کلینیکی، و بهێزکرنا ئاڵوگۆڕکرنا پیشەیی د ناڤبەرا دامەزراوەیێن ئەکادیمی و

کارمەندێن ساخلەمیێ دا دیار دکەت. هەروەسا مامۆستایێن زانکۆیا دهۆك ژی پشکداری د بەرنامەیێ زانستی دا کریە، ژ وان ژی د. ئەمین موسا، پڕۆفیسۆرێ نەخۆشیێن دلی ل کۆلیژا پزیشکی، کو وەك ڕێڤەبەرێ کۆنفرانسی کار دکەت.

ل ڕێورەسمێن ڤەکرنێ دا، د. باوەر حەسەن حوسێن، سەرۆکێ کۆمەلا پزیشكێن سینگی و دلی ل كوردستانێ و سەرۆکێ کۆنفرانسی، بخێرهاتنا پشکداران کر و تیشك ئێخستە سەر گرنگیا کۆمکرنا پسپۆڕان ب ڕێیا چالاکیێن زانستی.

د. ئەمین موسا، رێڤەبەرێ کۆنفرانسی، جەخت ل سەر پێدڤیا بەردەوامیا پێشئێخستنا پیشەیی د بوارەکێ پزیشکی یێ کو ب لەز پێشدکەڤیت کر. وی دا دیارکرن کو ئەڤ جۆرە کۆنفرانسە هاریکارییا نۆژداران دکەن زانیاریێن خۆ نوی بکەن، کار و پیشەیا خۆ باشتر بکەن، و د ئەنجام دا خزمەتێن ساخلەمیێ یێن باشتر پێشکێشی جڤاکی بکەن. هەروەسا سوپاسیا کۆمپانیایێن پشتەڤان ل ڕێکخستنا کۆنفرانسی ژی کر.

د. ئەفراسیاب موسا پیرۆزباهی ل کۆمەلێ و تیمێ ڕێکخەر کر بۆ ڕێکخستنا ڤێ هەلکەڤتێ. وی رۆلێ سەنتەرێ دلی و خزمەتێن وێ ل پارێزگەها دهۆکێ بەرچاڤ کرن، و سوپاسیا پشکداریا بەردەوام یا وەڵاتێ ئیتالیا کر ب ڕێیا دابینکرنا تیمێن پزیشکی بۆ دهۆکێ، هەروەسا پلانا ڤەکرنا سەنتەرەکێ دلی ل قەزا ئاکرێ راگەهاند بۆ بەرفرەهکرنا دەستگەهشتنێ ب خزمەتێن ساخلەمیێ.

د پەیڤا خۆ دا، د. سامان بەرزنجی پەسنا کۆمەلێ و ڕێڤەبەرێ کۆنفرانسی کر بۆ ڕێکخستنا چالاکیەکا ئاست ناڤدەولەتی ل هەرێما کوردستانێ. وی تەکەزی ل سەر گرنگیا پێشئێخستنا پیشەیی یا بەردەوام د ناڤبەرا نۆژداران دا کر، دگەل بهێزکرنا خزمەتێن

ساخلەمیێ یێن ناڤخۆیی، و کێمکرنا پێدڤیا نەخۆشان بۆ گەشتکرنا ژ دەرڤەی وەلاتی ب مەرەما وەرگرتنا چارەسەریێ. هەروەسا داخواز کر کو پتر گرنگی ب چاڤدێرییا ساخلەمیا خۆپاراستنێ و بهێزکرنا پەیوەندیا نۆژدار و نەخۆشی بهێتە دان بۆ ئاڤاکرنا باوەریا

هاوەلاتیان ب سیستەمێ ساخلەمیێ.

بەرنامەیێ زانستی پێکهاتییە ژ پەخشێ ڕاستەوخۆ یێ نەشتەرگەریێن ئاڵۆز یێن دلی ژ تاقیگەهێن قەستەرەیێ، گەنگەشەکرنا دوماهیك ڤەکۆلینێن پزیشکی یێن ساڵێن ٢٠٢٥ و ٢٠٢٦، و پێشکێشکرنا بابەتێن گرێدایی لاوازبوونا دلی، فشارا خوینێ، نەخۆشیێن زکماکی یێن

دلی ل دەڤ زارۆك و مەزنان، دەستوەردانێن کۆرۆنەری، و چەندین حالەتێن دی یێن دلی و دەماران. ئەڤ روینشتنە دەلیڤەیان ددەنە پسپۆڕان بۆ ئاڵۆگۆرکرنا ئەزموونێن نۆژداری و گەنگەشەکرنا پێشکەڤتنێن وارێ دەستنیشانکرن و چارەسەریێ دا.

ئارمانجا سەرەکی یا کۆنفرانسی پێشئێخستنا زانستێ پزیشکی، ئاسانکرنا ئاڵۆگۆڕکرنا ئەزموونێن ناڤدەوڵەتی، و پشتەڤانیکرنا باشترکرنا پێشکێشکرنا چاڤدێریا ساخلەمیێ یە.

رۆژا دووێ یا کۆنفرانسی، ئەینی ٢٣ـی چریا ئێكێ، دێ ب چەندین روینشتنێن زانستی و پێشکێشکرنێن کلینیکی یێن دی بەردەوام بیت.

ب ڕێیا هەڤکاریا خۆ د ڤی كۆمبوونا پزیشکی یا ناڤدەولەتی دا، زانکۆیا دهۆك بەردەوامە ل سەر پشتەڤانیکرنا پراکتیکا نۆژداری یا پشت بەستن ب ڤەکۆلینان، پێشئێخستنا پیشەیی، هەڤپەیمانیێن دامەزراوەیی، و بەرەڤپێشبرنا ساخلەمیێ ل هەرێما

کوردستانێ.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانكۆیێ، ٢٢ـی چریا ئێکێ، ٢٠٢٦
راپۆرت: فاطمە محمود عەلی، نیبار حەجی حسێن
وێنە: محەمەد ع. تاهر

پەیڤێن سەرەکی:

- کۆلیژا پزیشکی ل زانکۆیا دهۆك

- هەشتەمین کۆنفرانسێ ناڤدەولەتی یێ سینگی و دلی ٢٠٢٦

- کۆمەلا پزیشكێن سینگی و دلی ل کوردستانێ

- کۆمەلا ئەوروپی یا دلی (ESC)

- پزیشکیا دل و دەماران و ڤەکۆلینا نۆژداری