ئەڤرۆ، رێكەڤتی ٢١ـی تیرمەها ٢٠٢٦، د. داود سلێمان ئەتروشی، سەرۆکێ زانکۆیا دهۆك، ل گەل د. سەعید عەلی محەمەد، راگرێ کۆلیژا پزیشکیا ددانان، و د. نەزار ئەمین محەمەد، رێڤەبەرێ پەیوەندیێن ناڤدەولەتی، پێشوازی ل شاندەکێ زانکۆیا تکریت ب سەرۆکاتیا د. محەممەد ڕەحیل عەلی، راگرێ کۆلیژا پزیشکیا ددانان کر، ب مەرەما ئیمزاکرنا یاداشتنامەکا لێکتێگەهشتنێ د ناڤبەرا کۆلیژێن پزیشکیا ددانان ل هەردوو زانکۆیان دا. ئەڤ ڕێورەسمە ب ئامادەبوونا چەندین بەرپرسێن دی یێن هەردوو زانکۆیان بڕێڤەچوو.

بەری ڕێورەسمێن ئیمزاکرنێ، هەردوو لا كۆمبوون و گەنگەشە ل دۆر ڕێیێن پێشخستنا کوالێتییا فێرکرنێ د پزیشكیا ددانان دا، بهێزکرنا هەڤکاریێن ئەکادیمی و ڤەکۆلینێن زانستی، و ئالوگۆڕکرنا شارەزاییان دناڤبەرا هەردوو زانکۆیان کرن. سەرۆکێ زانکۆیا دهۆك جەخت ل سەر گرنگیا ڤێ یاداشتنامیێ کر بۆ بەرفرەهکرنا ئاسۆیێن هەڤکاریێ، ب تایبەتی د بوارێن ڤەکۆلینێن زانستی و ئالوگۆڕا شارەزاییێن هەڤپشک دا. ژ لایێ خۆ ڤە، سەرۆکێ شاندێ زانکۆیا تکریت سوپاسیا پێشوازییا گەرم کر و ئاماژە ب گرنگیا هەڤپشکیێن ئەکادیمی د پێشخستنا خواندنا بلند دا کر، زێدەباری ڕۆلێ هەڤکاریێ وەک ستوینەكێ

سەرەکی بۆ بدەستڤەئینانا سەركەڤتنێ.

ل دۆر گرنگیا ڤێ رێکەڤتننامێ، د. سەعید عەلی محەمەد، راگرێ کۆلیژا پزیشکیا ددانان ل زانکۆیا دهۆك، دیار کر کو یاداشتناما لێکتێگەهشتنێ چوارچۆڤەیەکێ هەڤکاریا دۆمدرێژ د ناڤبەرا هەردوو کۆلیژان دا د چەندین بوارێن سەرەکی دا دادمەزرینیت. ئەڤە ژی هەڤکاریا ئەکادیمی، ڤەکۆلینێن زانستی یێن هەڤپشك، ئالوگۆڕکرنا قوتابیان، پێشخستنا پیشەیی یا بەردەوام، و ڕێکخستنا کۆنفرانس، وۆرکشۆپ و چالاکیێن زانستی یێن هەڤپشك بخۆڤەدگریت کو دێ ب مفا بن بۆ ئەندامێن ستافێ ئەکادیمی و قوتابیێن هەردوو دامەزراوەیان.

د. سەعید زێدەتر ئاماژە ب وێ چەندێ ژی کر کو ئەڤ ڕێکەڤتنە دێ هاندەر بیت بۆ بەلاڤکرنا هەڤپشك د گۆڤارێن زانستی یێن ناڤدەولەتی یێن خودان کارتێکرنەکا بڵند دا، و جەخت ل سەر وێ یەکێ کر کو ئەو ڤەکۆلینێن ب هەڤپشکی ژ لایێ دوو زانکۆیان یان پتر دهێنە ئەنجامدان، پتریا جاران دیتنەکا زانستی یا مەزنتر، کارتێکرنەکا ئەکادیمی یا بەرفرەهتر، و ڕێژەیەکا بلندتر یا ژێدەرگرتنێ (Citation) بدەستڤە دئینن. وی گۆت ژی کو هەڤکاریەکا ب ڤی ڕەنگی دێ هاریکار بیت بۆ باشترکرنا ڕیزبەندیا ناڤدەولەتی و

ناڤودەنگێ ئەکادیمی یێ هەردوو کۆلیژان و د هەمان دەم دا کوالێتیا فێرکرن، ڤەکۆلین، و بەرهەمێ زانستی بلند دکەت.

ئەڤ یاداشتناما لێکتێگەهشتنێ ڕەنگڤەدانا پێگیریا هەڤپشك یا زانکۆیا دهۆك و زانکۆیا تکریتە بۆ پێشخستنا نایابیا ئەکادیمی، ب هێزکرنا هەڤپشکیێن دامەزراوەیی، و پێشخستنا ڤەکۆلینێن زانستی د بەرژەوەندیا هەردوو زانکۆیان و جڤاکێ خواندنا بلند ب گشتی.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانکۆیێ، ٢١ـی تیرمەها ٢٠٢٦

فاطمە محمود عەلی

وێنە: محەمەد ع. تاهر