زانکۆیا دهۆك، ٢٠ـی چریا ئێکێ ٢٠٢٦ | نڤیسینگەها راگەهاندنا زانکۆیێ (UNPO) — زانكۆیا دهۆك دگەل پارێزگەها دهۆكێ، و ب ئامادەبوونا کەسایەتیێن ئەکادیمی، حکومی، حزبی و رەوشەنبیران، ل سەنتەرێ کۆنفرانسان ل زانکۆیا دهۆك، رێورەسمێن چلەیا ماتەمینی یا دیرۆکناس، بیرمەند و زانایێ ناڤدارێ مللەتێ کورد، خودێ ژێ ڕازی پرۆفیسۆر د. عەبدولفەتاح عەلی يحيا بۆتانی سازکر، ژبۆ رێزلێنان ل ژیان، کاروانێ زانستی و خزمەتا وی یا بەردەوام بۆ دیرۆکا کورد و خواندنا بلند.

پرۆفیسۆر بۆتانی، کو ل ١ـی تيرمةها ١٩٥٠ ژ دایك بوبوو، ل ١ـی ئیلۆنا ٢٠٢٦ـێ کۆچا داویێ کر، و میراتەکێ زانستی یێ پڕبها و شوینتبلەکا دیار د ژیانا ئەکادیمی و رەوشەنبیری یا کوردستانێ دا ل دویڤ خۆ هێلا.

د رێورەسمی دا کو ل ئێڤاریا ١٨ـی چریا ئێکێ، ٢٠٢٦ برێڤەچوو، بەرێز د. عەلی تەتەر، پارێزگارێ دهۆکێ؛ د. داود سلێمان ئەتروشی، سەرۆکێ زانکۆیا دهۆك؛ بەرێز سەربەست لەزگین، بەرپرسێ مەکتەبا رێکخستنا پارتی دیموکراتی کوردستان ل پارێزگەها دهۆکێ؛ د. ڤیان سەبری، جێگرا مەکتەبا رێکخستنێ؛ ئەندامێن جڤاتا زانكۆیێ؛ دگەل خێزان و کەسوکارێن خودێ ژێ ڕازی، مامۆستا، قوتابی، ژمارەکا بەرچاڤ ژ رەوشەنبیر و نڤیسەران، و دەزگەهێن راگەهاندنێ ئامادە بوون.

رێورەسم ب چەندین بڕگە و چالاکیێن تایبەت برێڤەچوون. ل دەستپێکێ، د. عەلی تەتەر، پارێزگارێ دهۆکێ، پەیڤا پارێزگەهێ پێشکێش کر و تێدا باس ل کەسایەتیا زانستی و نەتەوەیی یا د. بۆتانی کر و گۆت: «وەك قوتابی و شاگردەکێ پرۆفیسۆر د. عەبدولفەتاح بۆتانی، ئەو ئەگەرێ سەرەکی بوو کو ئەز بەردەوامیێ بدەمە نڤیسینا پەرتووکان؛ هەردەم شیرەت ل من دکرن کو د خواندن و نڤیسینێ دا بەردەوام بم». هەروەسا پارێزگارێ دهۆکێ ئاماژە ب بوێری و راستگۆیا وی کر د گۆتنا راستیێن دیرۆکی دا، ب تایبەتی د پرسێن گرێدای ب کوردینی و خەباتا رزگاریخوازا گەلێ کوردستانێ دا.

پاشان، د. داود سلێمان ئەتروشی، سەرۆکێ زانکۆیا دهۆك، پەیڤا زانکۆیێ پێشکێش کر و تێدا رۆلێ پێشەنگ و کارایێ د. بۆتانی د قۆناغا دامەزراندن و پێشڤەبرنا دەستپێکی یا زانکۆیا دهۆک دا بلند نرخاند. هەروەسا خزمەتا وی وەك راگرێ کۆلیژا ئادابێ و رۆلێ وی د ئاڤاکرنا بنەمایێن وێ یێن ئەکادیمی دا ب بیر ئینا، ب تایبەتی دامەزراندنا پەرتووکخانا کۆلیژا ئادابێ کو ببوو ژێدەرەکێ سەرەکی بۆ پشتەڤانیکردنا فێرکاری، فێربوون، و ڤەکۆلینێن زانستی. سەرۆکێ زانکۆیێ پەرتووك و بەرهەمێن نڤیسینێ یێن پرۆفیسۆر بۆتانی ب «گەنجینەکا نەتەوەیی و زانستی یا ب بها» وەسف کرن، کو دێ هەردەم د دیرۆکا مللەتێ کورد دا وەک ژێدەرێن بنەڕەتی بۆ نڤشێن داهاتی مینن، و ب ناڤێ جڤاتا زانکۆیێ سوپاسی و پێزانین بۆ ساڵێن خزمەت و خەباتا وی پێشکێش کرن.

ل دویڤ دا، فیلمەکێ دۆکیومێنتاری ل دۆر وێستگەهێن ژیان، خەبات، بیروباوەر و بەرهەمێن زانستی یێن د. بۆتانی هاتە نیشاندان، پاشان هۆزانڤان ئەمین بۆتانی هەلبەستەك ل دۆر کۆچا داویێ و مەزناهیا پێگەهێ وی خواند. ب ناڤێ مالباتێ ژی، م. بەردل عەبدولفەتاح عەلی بۆتانی، کارمەند ل سەنتەرێ بێشکچی یێ زانکۆیا دهۆك و کوڕێ خودێ ژێ ڕازی، پەیڤا خێزانێ پێشکێش کر و سوپاسیا زانکۆیا دهۆك، پارێزگەهێ و هەمی ئامادەبوویان و هەڤال و دۆستێن وی کر بۆ سازكرنا ڤێ رۆژێ و رێزگرتن ل ماندویبوون و ناڤێ بابێ وان.

د پشکەکا دی یا رێورەسمان دا، ل سەر ستەیجێ سەرەکی کو ب وێنە و پۆرترێتێ د. بۆتانی هاتبوو خەملاندن، وەك رێزلێنان ل گیانێ وی یێ پاك شەمالك هاتنە هەلکرن و تاجەگۆل هاتنە دانان. هەروەسا د دوماهیا بەرنامەی دا، ئامادەبوویان سەرەدانا پێشانگەها پۆستەر و گۆتنێن د. عەبدولفەتاح بۆتانی کر کو ل لۆبیێ سەنتەرێ کۆنفرانسان هاتبوو ڤەکرن، و تێدا تیشك هاتبوو ئێخستن سەر گرنگترین گۆتن، دیدگەهێن دیرۆکی، و کاروانێ زانستی یێ وی زانایێ پایەبلند.

ب رێیا ڤێ ساخکرنێ، زانکۆیا دهۆك نە ب تنێ رێز ل یادا دیرۆکناسەکێ دیار گرت، بەلکو رێز ل میراتێ زانایەکی گرت کو رۆل هەبوو د شێوەدانا زانکۆیێ دا د قۆناغێن وێ یێن دەستپێکێ دا. خزمەت و پشکداریا وی د خواندنا بلند، کۆلیژا ئادابێ، و دۆکیۆمێنتکرنا دیرۆکا کوردستانێ دا، وەك پشکەکا گرنگ ژ کەلەپۆرێ ئەکادیمی یێ زانکۆیێ و پابەندبوونا وێ ب پاراستنا زانین و ناسنامەیا نەتەوەیی بۆ نڤشێن پاشەڕۆژێ دێ مینیت.

ڤێرە کلیك بکە بۆ دیتنا روومالا میدیایی یا ڤێ هەلكەڤتێ

نڤیسینگەها راگەهاندنا زانکۆیێ، ٢٠ـی چریا ئێکێ ٢٠٢٦
ئامادەکرن: فاطمە مەحمود عەلی، مێهڤان م. سالح
وێنە: محەمەد ع. تاهر

پەیڤێن سەرەکی یێن نؤچەیی:

• زانکۆیا دهۆك
• پرۆفیسۆر عەبدولفەتاح بۆتانی
• دیرۆك و کەلەپۆرێ کوردی
• پەرتووکخانا کۆلیژا ئادابێ
• دیرۆکناسێن کورد و میراتێ ئەکادیمی