زانکۆیا دهۆک – ٢٠ـی تیرمەهێ ٢٠٢٦، نڤیسینگەها راگەهاندنا زانكۆیێ، د پێنگاڤەکا ستراتیژی دا بەرەڤ چەسپاندنا کەلتۆرێ داهێنانێ و گوهۆڕینا زانینێ بۆ چارەسەریێن کریاری، ئەڤرۆ ڕێکەڤتی ٢٠ـی تیرمەهێ ٢٠٢٦، ب هەڤکاری د ناڤبەرا زانکۆیا دهۆک و ئەنستیتیۆتا داهێنان و نویگەری یا کوردستانێ (KII)، سەنتەرێ هەڤپشکێ داهێنانێ ل کۆلیژا ئەندازیاری یا زانکۆیا دهۆک هاتە ڤەکرن.

ڕێورەسم ب ئامادەبوونا ڕێزدار د. عەلی تەتەر، پارێزگارێ دهۆکێ، د. نەوزاد عەبدوللا، بەرپرسێ لقێ ئێك یێ پارتی دیمزكراتی كوردستان، د. ئازاد نەجار، سەرۆکێ جێبەجێکارێ ئەنستیتیۆتا داهێنان و نویگەری یا کوردستانێ، و د. داود سلێمان ئەتروشی، سەرۆکێ زانکۆیا دهۆک، د. ڤیان سلێمان، جێگرا بەرپرسێ نڤیسینگەها دهۆك یا پارتی دیموكراتی كوردستان، و بەرێز بریندار حەیدەر، قایمەقامێ قەزا دهۆکێ، د. شرین حسنی بەرپرسا بەشێ ڕێکخستنێ ل مەکتەبا ڕێکخستنا پارێزگەها دهۆکێ، زێدەباری ئەندامین جڤاتا زانکۆیێ بڕێڤەچوو.

ب بڕینا قڕدێلێ ژ لایێ ڕێزدار د. عەلی تەتەر، پارێزگارێ دهۆکێ، و د. ئازاد نەجار، سەرۆکێ جێبەجێکارێ ئەنستیتیۆتا داهێنان و نویگەری یا کوردستانێ، و د. داود سلێمان ئەتروشی، سەرۆکێ زانکۆیا دهۆک، هەلکەڤتێ دەستپێکر. پاشان، ئامادەبوو بۆ ڕێزگرتن ل گیانێ پاکێ شەهیدان خولەکەکێ ب بێدەنگی ڕاوەستیان و سروودا نیشتیمانی هاتە لێدان، و ڤیدیۆیەکا ناساندنێ ل سەر کار و چالاکیێن KII هاتە نیشاندان.

پەیڤا سەرۆکێ زانکۆیا دهۆک: بەرەڤ نڤشەکێ "بەرهەمئینەرێ چارەسەریان"

د. داود سلێمان ئەتروشی، سەرۆکێ زانکۆیا دهۆک، د پەیڤەکا تێروتەسەل دا جەخت ل سەر وەرچەرخانا دیرۆکی یا ڕۆلێ زانکۆیێ کر و گۆت: "د درێژاهیا دیرۆکێ دا، زانکۆ ب دوو ئەرکێن سەرەکی دهاتنە ناسین: پێگەهاندن و فێرکرنا قوتابیان، و ئەنجامدانا ڤەکۆلینان. لێ ئەڤرۆ، ئەرکێ مە یێ سێیێ و یێ هەرە پێشەنگ ئەوە کو زانیاریان بگوهۆڕین بۆ داهێنانێن کو مفای بگەهیننە جڤاکی."

د. داود زێدەتر ڕۆنکر کو ئەڤ سەنتەرە نە بتنێ بۆ پشکا ئەندازیاریێ یە، بەلکو دەرگەهێ وی یێ ڤەکری یە بۆ هەمی قوتابی و مامۆستا و ڤەکۆلەرێن زانکۆیێ د هەمی بیاڤان دا، ژ پزیشکی و چاندنێ بگرە هەتا زانستێن مرۆڤایەتی. وی پەیڤا خۆ ب ڤێ دەستەواژا ب هێز ب دویماهی ئینا: "زانکۆ پێدڤی ناکەت بتنێ قوتابیان دەرچوینیت، بەلکو پێدڤیە 'چارەسەریان' ژی بەرهەم بینیت. ئەڤرۆ ئەم نە بتنێ سەنتەرێن نوی ڤەدکەین، بەلکو ئەم دەرفەتێن نوی ڤەدکەین!"

د. نەشوان شەوکەت: خزمەتکرنا داهێنەرێن گەنج

د. نەشوان شەوکەت مەحموود، ڕاگرێ کۆلیژا ئەندازیاری، بخێرهاتنا مێڤانان کر و سوپاسیا پشتەڤانیێ کر. وی ئاماژە ب ڕۆلێ کارایێ ڤی سەنتەری د دابینکرنا ژینگەیەکا گونجای بۆ گەنجان کر دا کو بشێن پەرە ب بەهرەیێن خۆ بدەن و هزرێن خۆ بکەنە پڕۆژەیێن بەرجەستە.

د. ئازاد نەجار: دهۆک ناڤەندا مێشکێن داهێنەرە

دکتۆر ئازاد نەجار، زانایێ ناڤدار و سەرۆکێ KII، د پەیڤا خۆ دا تیشک ئێخستە سەر گرنگیا ئیرادەیێ و گۆت: "مللەتێ مە مللەتەکێ داهێنە و خودان شیانە، هەر تشتەکێ حەز بکەت دشێت بجهـ بینیت." وی ئاماژە کر کو ئەڤ پێنگاڤە ب پشتەڤانیا ڕاستەوخۆ یا ڕێزدار مەسرور بارزانی، سەرۆکێ حکۆمەتا هەرێما کوردستانێ، هاتیە ئەنجامدان.

د. ئازاد هەروەسا دەستخۆشی ل د. داود ئەتروشی کر بۆ کار و خەبات و ڕؤلێ وی یێ ستراتیژی د پێشخستنا زانکۆیا دهۆک دا و دیار کر کو دهۆک یا پڕە ژ مێشکێن زێدەهـ داهێنەر و ئەڤ سەنتەرە دێ بیتە کارگەهەک بۆ ڤەدیتنا وان.

پارێزگارێ دهۆکێ: پێدڤیا مە ب پێشڤەبرنەکا بەردەوام هەیە

د. عەلی تەتەر، پارێزگارێ دهۆکێ، گەشبینیا خۆ ب ڤێ هەڤکاریێ دیار کر و جەخت ل سەر دروستکرنا زەمینەیێ گونجای بۆ داهێنانێ کر. وی گۆت: "مە باوەری ب شیانێن خۆ هەیە، و هەمی بیاڤێن ژیانێ پێدڤی ب داهێنان و پێشڤەبرنێ نە دا کو ئەم بشێین ڕووبەڕووی ئاستەنگێن پاشەڕۆژێ ببینەڤە."

چیرۆکا سەرکەڤتنێ: ژ هزرێ بەرەڤ ڕاستیێ

د کۆتاییا ڕێورەسمی دا، داهێنەر یاسر بەلۆ، دەرچوویێ زانکۆیا دهۆک، چیرۆکا سەرکەفتنا خۆ ڤەگێڕا. یاسر ب پشتەڤانیا KII شیایە د ماوێ ٥ سالێن کارێ بەردەوام دا، دەستەکێ دەستکرد (prosthetic hand) دروست بکەت. وی گۆت: "ڤەکرنا ڤی سەنتەری دێ گەلەک ئاستەنگان ل بەر داهێنەرێن گەنج لادەت. پەیاما من بۆ گەنجان ئەوە: چ جاران دەستا ژ خەونێن خۆ نەداهێلن."

سەنتەرێ هەڤپشکێ داهێنانێ ل زانکۆیا دهۆک، نوکە وەک ناڤەندەکا سەرەکی یا گەشەپێدانا تەکنەلۆژی و پیشەسازی ل پارێزگەهێ دهێتە هژمارتن، کو ئارمانجا وێ نێزیککرنا ئەکادیمیایێ و پیشەسازیێ یە بۆ بەرژەوەندیا گشتی یا هەرێما کوردستانێ.

پێزانین دێ هێنە نویكرن..

ڤێرە کلیک بۆ دیتنا وێنەیان

نڤیسینگەها راگەهاندنا زانکۆیێ، ٢٠ـی تیرمەها ٢٠٢٦ـێ
راپۆرت: عسمەت م. خابوو
وێنە: محەمەد ع. تاهر