زانکۆیا دهۆک – تەباخا ٢٠٢٦، نڤیسینگەها راگەهاندنا زانکۆیێ | ب چاڤدێریا پارێزگارێ دهۆکێ د. عەلی تەتەر و ب هەماهەنگی د ناڤبەرا سەنتەرێ ڤەکۆلینێن جینۆسایدێ ل زانکۆیا دهۆک و ڕێڤەبەریا گشتی یا کاروبارێن شەهیدان و ئەنفالکریان ل دهۆکێ،ل ۆژا چوارشەمبی ڕێکەڤتی ٢٦ـی تەباخا ٢٠٢٦ـێ، د ڕێورەسمەکێ شایستە و تایبەت دا ل سەنتەرێ کۆنفرانسان یێ زانکۆیا دهۆک، ٣٨ـەمین سالیادا تاوانا ئەنفالێن بادینان هاتە بیرئینان.

ئەڤ ڕێورەسمە ب ئامادەبوونا کەسۆکارێن ئەنفالکریان، بەرپرسێ مەکتەبا ڕێکخستنا پارتی دیموکراتی کوردستان ل پارێزگەها دهۆکێ بەرێز سەربەست لەزگین، پارێزگارێ دهۆکێ د. عەلی تەتەر، برێکارێ وەزارەتا کاروبارێن شەهیدان و ئەنفالکریان بەرێز نافسەر نوری عەبدال، سەرۆکێ زانکۆیا دهۆک د. داود سلێمان ئەتروشی، و ب پشکداریا ژمارەیەکا بەرچاڤ ژ ئەندامێن پەرلەمانی، نوینەرێن زانکۆیان، و کەسایەتیێن کارگێڕی، حزبی و ئاینی یێن پارێزگەها دهۆکێ و دەزگەهێن راگەهاندنێ بڕێڤەچوو.

پەیڤ و پەیامێن ڕێورەسمان

د ڕێورەسمان دا، پشتی نیشاندانا کورتە ڤیدیۆیەکا دیكیۆمێنتاری ل دۆر ئەنفالا بادینان کو ژ لایێ زانکۆیا دهۆک ڤە هاتبوو بەرهەڤکرن، پەیڤا دەستپێکێ ژ لایێ رێڤەبەرێ سەنتەرێ ڤەکۆلینێن جینۆسایدێ د. ئدریس موسا ڤە هاتە پێشکێشکرن، کو تێدا باس ل قۆناغێن ئەنفالان ب تایبەتی ئەنفالا هەشتێ کر و تیشک ئێخستە سەر ڕۆلێ زانکۆیا دهۆک وەک ناڤەندەکا ئەکادیمی د ڤەکۆلین و دیكیۆمێنتکرنا جینۆسایدێ و هوشیارکرنا ناڤخۆیی و ناڤدەولەتی دا. ژ لایێ خۆ ڤە، پارێزگارێ دهۆکێ د. عەلی تەتەر د پەیڤا خۆ دا سوپاسیا هەمی وان لایەنان کر یێن پەناگەهـ بۆ گەلێ کورد بووین و هەڤکار بووین د دیكیۆمێنتکرنا تاوانێ دا، هەروەسا باس ل وێرانکرنا ٤٨٨ گوندان و ئامادەکرنا مۆزەخانەیا جینۆسایدێ ل کەلها نزارکێ کر. پەیڤا کەسۆکارێن ئەنفالکریان ژی ژ لایێ خاتوون ئەنفال ڤە هاتە پێشکێشکرن، کو تێدا سوپاسیا سەرۆک بارزانی و رێکخەرێن یادێ کر و داخوازا بهێزکرنا بزاڤان بۆ ناساندنا ناڤدەولەتی یا ڤێ تاوانێ کر.

دیكیۆمێنتاری، پانێلێ تایبەت و ڤەگەڕاندنا ڕووفاتان

د تەوەرەکێ دی یێ ڕێورەسمان دا، فیلمەکێ دیكیۆمێنتاری ل سەر ژیان و خەباتا هەردوو پێشمەرگەیێن ئەنفالبووی (فەرید و

ئەرجان) هاتە نمایشکرن، کو وەک وەفاداری بۆ قوربانیدانا وان، دوو پەیکەر ل باعەدرێ بۆ هاتینە چێکرن. هەروەسا روونشتنەکا تایبەت ل دۆر ئەنفالا بادینان ب رێڤەبرنا د. فەرهاد سلێڤانی و ب پێشکێشکرنا بەرێز سەربەست لەزگین هاتە ئەنجامدان، کو تێدا وەک

دیدەڤان و پێشمەرگە ب هووری باس ل ڕەهەندێن لەشکەری و سیاسی یێن پرۆسەیا ئەنفالان و هێرشێن کیمیایی یێن ڕژێما بەعس کر. د دوماهیا بەرنامەی دا، پشتی پارچە موزیکەکا تایبەت ژ لایێ هۆنەرمەند بەشار نای ڤە هاتیە ژەنین، برێکارێ وەزارەتا شەهیدان د

پەیڤەکێ دا ئەنجامێن پشکنینێن DNA یێن حەڤت ڕووفاتێن خەلکێ مێرگەتیێ ڕادەستی کەسۆکارێن وان کرن، دگەل بەلاڤکرنا پەرتووکەکێ ب زمانێ فەڕەنسی ل سەر تاوانێن ئەنفالان.

ئارمانجێن ل بیرئینانا یادێ ل زانکۆیا دهۆک

بیرئینانا ڤێ یادێ وەکو وەفاداری و ڕێزگرتن ل قوربانیێن دەڤەرا بادینان دهێتە ئەنجامدان، کو پشکەکا سەرەکی یە ژ ئەرکێ

ئەکادیمی و نەتەوەیی یێ زانکۆیا دهۆک. زانکۆیا دهۆک بزاڤێن ڕژد بۆ دیكیۆمێنتکرنا تاوانێن جینۆسایدێ یێن دژی گەلێ کورد دکەت، و ئەنجامدانا ڤان ڕێورەسمان دووپاتکرنا دیدگەها زانکۆیێ یە د گرنگیدان ب ڕۆلێ وێ یێ جڤاکی و نەتەوەیی.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانکۆیێ، ٢٦ـی تەباخا ٢٠٢٦

راپۆرت: ماهر تاهر سالح

وێنە: محەمەد ع. تاهر