زانكۆیا دهۆك، 1ـی ئیلۆنا 2025. نڤیسینگەها راگەەهاندنا زانكۆیێ | د پێنگاڤەکا گرنگ دا بەرەڤ بهێزکرنا رۆلێ قوتابیان و چەسپاندنا بنەمایێن دیموکراسیێ، یانەیا خۆبەخشێن زانکۆیا دهۆک ئێکەمین هەلبژارتنێن خۆ یێن فەرمی ئەنجامدان. پرۆسە ئەڤرۆ رۆژا دووشەمبی، رێکەڤتی 28ـی تەباخا 2025 ب ئامادەبوونا د. داود سلێمان ئەتروشی سەرۆکێ زانکۆیا دهۆک و ب پشکداریەکا بەرفرەهـ یا قوتابیان ل ئاڤاهیێ یانەیێ ل ناڤەندا قوتابیان ل زانکۆیا دهۆک برێڤەچوو

ئەڤ هەلبژارتنە، کو پابەندیێ ب زەلالی و بەرپرسیارەتیێ د ناڤ کارێ خۆبەخشی دا دیاردکەن، دەرئەنجامێ هەولێن یانەیێ بوون بۆ دانانا سترەکچەرەکێ رێکخستی و دانانا سەرکردایەتیەکا ب رێبەریا گەنجان. یانەیا خۆبەخشێن زانکۆیا دهۆک، کو ل شواتا ٢٠٢٥ ب هەڤپشکی ل گەل "Volunteer.KRD" هاتیە دامەزراندن، د ماوەیەکێ کورت دا بوویە پلاتفۆرمەکا چالاک بۆ قوتابیان داکو پشکداریێ د خزمەتا جڤاکی دا بکەن، گەشێ ب شیانێن سەرکردایەتیێ بدەن، و کەلتۆرێ خۆبەخشیێ د ناڤ زانکۆیێ دا بەلاڤبکەن.

دەستەیا نوی یا هەلبژارتی، کو دێ ژ مەها ئیلۆنا ٢٠٢٥ـێ هەتا تەباخا ٢٠٢٦ـێ ئەرکێ خۆ بجهئینیت، ژ ڤان پۆستان پێکدهێت:

• سەرۆک: سەرکردایەتیا گشتی یا یانەیێ دکەت و هەماهەنگیێ ل گەل Volunteer.KRD دکەت.
• هاریکارێ سەرۆکی: هاریکاریا سەرۆکی دکەت د رێڤەبرنا کاران دا و چاڤدێریا گەهشتنا ئارمانجێن یانەیێ دکەت.
• سکرتێر: رێکخستنا تۆمار دکەت و پەیوەندی و ئەرشیڤێ یانەیێ برێڤەدبەت.
• بەرپرسێ دارایی: سەرپەرشتیا کاروبار و راپۆرتێن دارایی یێن یانەیێ دکەت.
• بەرپرسێ ئۆپەراسیۆنان: سەرپەرشتیا لۆجستی و رێکخستنا چالاکیان دکەت.
• رێکخەرێ خزمەتێن خۆبەخشان: تۆمارکرنا خۆبەخشان و مسۆگەرکرنا پشکداریا وان یا چالاک د کاران دا دکەت.

ئەڤ دەستەیا نوی دێ ب شێوەیەکێ راستەوخۆ سەرپەرشتیا پشکداریا پتر ژ ٥٠٠ قوتابیێن خۆبەخش کەت و دێ کار بۆ پلاندان و جێبەجێکرنا چالاکیێن جۆراوجۆر کەت کو ئارمانج ژێ بهێزکرنا گیانێ هاریکاریێ و خزمەتکرنا جڤاکی یە.

ئەڤ پێنگاڤە پابەندیا بەردەوام یا زانکۆیا دهۆک ب ستراتیژیا خۆ یا پشتەڤانیکرنا دەستپێشخەریێن ب رێبەریا قوتابیان و بهێزکرنا هەستێ بەرپرسیارەتیا جڤاکی د ناڤ گەنجان دا دوپاتدکەت، کو بێ گومان دێ کاریگەریەکا ئەرێنی ل سەر ژیانا زانکۆیێ و جڤاکێ دەوروبەر هەبیت.

وێنەیان ل ڤێرە ببینە

نڤیسینگەها راگەهاندنا زانکۆیا دهۆک؛ 1ـی ئیلۆنا 2025
نڤیسین: نیبار حەجی حسێن
وێنە: عەلی حەبیب حەبیب

پەیڤێن سەرەكی:

• یانەیا خۆبەخشێن زانکۆیا دهۆک
• هەلبژارتنێن قوتابیێن زانکۆیا دهۆک
• سەرکردایەتیا دیموکراسی یا زانکۆیا دهۆک
• خۆبەخشیا قوتابیان ل دهۆک
• سەرکردایەتیا گەنجان ل زانکۆیا دهۆک