زانکۆیا دهۆک، ١٩ـی چریا ئێکێ، ٢٠٢٥ | نڤیسینگەها ڕاگەهاندنا زانکۆیێ —
ل ژێر چاڤدێریا بەرێز د. سامان حسێن محەمەد، وەزیرێ ساخلەمیێ، و بەرێز د. عەلی تەتەر، پارێزگارێ دهۆکێ، و ب هەڤکاری دگەل ڕێڤەبەریا گشتی یا ساخلەمیێ ل دهۆکێ، پەیمانگەها چارەسەریا دەروونی و چارەسەریا تراومایێ (IPP) ل زانکۆیا دهۆک (UOD) چالاکیەکا هشیاریێ ب هەلکەڤتا ڕۆژا جیهانی یا ساخلەمیا دەروونی یا ٢٠٢٥ ڕێکخئێست، ل ژێر درووشمێ:
"دەستگەهشتن بۆ خزمەتگوزاریان – تەندروستیا دەروونی ل کارەسات وتەنگاڤیان دا."

چالاکیێ، کو ل ڕێکەڤتی ١٦ـی چریا ئێکێ ل سەنتەرێ کۆنفرانسان یێ زانکۆیێ هاتە گێڕان، نوینەرێن پارێزگەها دهۆکێ، کەرتێ ساخلەمیێ، ڕێکخراوێن هەڤپشک وەکو "مێدیکا مۆندیال"، و ئامادەبوونەکا مەزن یا مامۆستا و قوتابیێن زانکۆیێ و مێهڤانان کۆمکرن.

پابەندیا زانکۆیا دهۆک ب ساخلەمیا دەروونی و خۆشگوزەرانیا جڤاکی ڤە

د پەیڤا خۆ دا، د. داود سلێمان ئەتروشی، سەرۆکێ زانکۆیا دهۆک، ئاماژە ب بەرپرسیاریا جڤاکی یا زانکۆیێ کر د بلندکرنا هشیاریا ساخلەمیا دەروونی و پشتەڤانیکرنا وان جڤاکێن ل ژێر تەنگاڤیێ دا.
ناڤبری دوپات کر کو زانکۆیا دهۆک، ب ڕێیا پەیمانگەها (IPP)، ڕۆلەکێ سەرەکی د گرێدانا ئەکادیمیا ب بزاڤێن ساخلەمیا گشتی و ئاڤاکرنا خۆڕاگریا دەروونی-جڤاکی دا ل هەرێما کوردستانێ دگێڕیت.
د. ئەتروشی هەروەسا ئاماژە ب پشکداریا زانکۆیێ د ئارمانجا گەشەپێدانا دۆمدار یا سێیێ (ساخلەمیا باش و خۆشگوزەرانی) دا کر، و خواندن و ساخلەمی وەکو دوو بنەما بۆ ڤەژیانەکا دۆمدار ب ئێک ڤە گرێدان.

هەڤکاریا ساخلەمیێ و پشتەڤانیا سازیان

د. ئەڤراسیاب موسا یونس، ڕێڤەبەرێ گشتی یێ ساخلەمیێ، سوپاسی و پێزانینێن خۆ بۆ هەڤپشکیا زانکۆیا دهۆک د پێشئێخستنا خزمەتگوزاری و هشیاریا ساخلەمیا دەروونی دا دیار کرن. وی ئاماژە دا کو خۆشگوزەرانیا دەروونی بوویە ئێک ژ کارێن پێشینە یێن نشتیمانی، ب تایبەتی ل وان هەرێمێن کو تووشی شەر و ئاوارەییێ بووین.
ب نوینەراتیكرنا پارێزگارێ دهۆکێ، بەرێز ماجد سەید سالح، جێگرێ پارێزگاری، دەستخۆشی ل زانکۆیێ کر بۆ مێهڤانداریکرنا ڤێ چالاکیێ و پەسنا هەڤکاریا وێ یا بەردەوام دگەل سازیێن ساخلەمیێ یێن ناڤخۆیی و ناڤدەولەتی کر.

پانێلێن گەنگەشێ و پێشکێشکرنێن رەوشەنبیری

پانێلەکێ پسپۆری ب ڕێڤەبەریا راگەهاندكار بەرێز سەبری محەمەد حاجی، بسپۆرێن وەک د. پەڕجان هاشم تاهر، د. نەوزاد سامی ئەحمەد، د. وارژین یاسین سلێمان، و بەرێز کارزان عەبدولەتیف عەبدولڕەحمان بخۆڤەگرتن.
گەنگەشە ل سەر بابه‌تێن وه‌كو تراومایا پشتی قەیرانان، سترێسا جهێ کاری، و ستراتیژیێن کرداری بۆ باشترکرنا خۆشگوزەرانیا دەروونی بوون.
چالاکیێ هەروەسا پێشکێشکرنێن مۆزیک و درامایێن کورت بخۆڤگرتن کو ڕەنگڤەدانا لایەنێن هەستی و جڤاکی یێن ساخلەمیا دەروونی بوون و تێدا گرنگی ب بهایێ هەڤسۆزی و هشیاریێ هاتە دان.

کارێ مرۆڤی و پشکداریا جڤاکی

هەڤدەم دگەل چالاکیێ، کەمپەینەکا بەخشینا هاریكاریان بۆ نەخۆشێن تالاسیمیا ژ ئالیێ بەرێز ڕەنج عومەر سەلام ڤە هاتە ڕێکخستن، کو بوو هێمایەک بۆ وی گیانێ مرۆڤدۆستیێ یێ کو زانکۆیا دهۆک ب ڕێیا قوتابی و ستافێ خۆ بەلاڤ دکەت.

هشیاریا جیهانی ژ دهۆکێ

ڕۆژا جیهانی يا ساخلەمیا دەروونی، کو ل سەرانسەری جیهانێ ل ١٠ـی چریا ئێکێ دهێتە ساخکرن، ئارمانج ژێ بلندکرنا هشیاریێ و بهێزکرنا چاڤدێریا ساخلەمیا دەروونی یە.
ب سەرکێشیکرنا ڤێ دەستپێشخەریێ، زانکۆیا دهۆک دوپاتکرەڤە ل سەر پابەندیا خۆ ب پێشئێخستنا خۆشگوزەرانیا جڤاکی ب ڕێیا خواندن، ڤەکۆلین، و هەڤپشکیێن ساخلەمیێ ل سەرانسەری هەرێما کوردستانێ.

بۆ دیتنا وێنەیان ڤێرە كلیك بكە

نڤیسینگەها ڕاگەهاندنا زانکۆیێ، ١٩ـی چریا ئێکێ، ٢٠٢٥
راپۆرت: ڕوندک فازل عادل، فاطمە محمود علی
وێنەگرتن: محەمەد عەبدولکەریم تاهر

پەیڤێن سەرەکی:

• هشیاریا ساخلەمیا دەروونی
• چالاکیێن زانکۆیا دهۆک
• پشتەڤانیا دەروونی-جڤاکی
• پەیمانگەها چارەسەریا دەروونی
• ڕۆژا جیهانی یا ساخلەمیا دەروونی ٢٠٢٥