زانکۆیا دهۆك، ١٨ـی چریا ئێکێ ٢٠٢٦ | نڤیسینگەها راگەهاندنا زانکۆیێ (UNPO) — زانکۆیا دهۆك رۆژا جیهانیا ساخلەمیا دەروونی ب رێیا چالاکیەکا بەرفرەهـ یا هۆشیاریێ ساخ کر، کو ژ لایێ سەنتەرێ شیرەتکاریا دەروونی و جڤاکی و خزمەتێن قوتابیان هاتبوو رێکخستن، ب هەڤکاری دگەل ژمارەیەکا رێکخراوێن ناڤدەولەتی و ناڤخۆیی ژ وان ژی: (IOM، Better World، فۆنیکس، و نودەم). ئەڤ چالاکیە ل ژێر دروشمێ «ئەزموونێن ژیانێ دهێنە هەڤپشککرن: دەنگێن راستەقینە، گۆڕانکاریێن راستەقینە» هاتە ئەنجامدان، ب ئامادەبوونا سەرۆکێ زانکۆیا دهۆك پ. د. داود سلێمان ئەتروشی، هاریکارێ سەرۆکێ زانکۆیێ بۆ کاروبارێن قوتابیان و دەرچوویان د. نەبەز ئیبراهیم محەمەد، دگەل راگرێن کۆلیژان، مامۆستا، قوتابی، و نوێنەرێن دامەزراوەیێن حکومی و رێکخراوێن هەڤپشك.

بەرنامە ب پەیڤا ب خێرهاتنێ ژ لایێ دلڤین مقداد ئەحمەد، رێڤەبەرا سەنتەرێ شیرەتکاریا دەروونی و جڤاکی و خزمەتێن قوتابیان دەستپێکر، کو تێدا تەئکید ل سەر گرنگیا دەستگەهشتنا ب ساناهی یا قوتابیان ب پشتەڤانیا دەروونی و جڤاکی کر. ناڤبری

تیشك ئێخستە سەر رۆلێ سەنتەری د بەلاڤکرنا هوشیاریا ساخلەمیا دەروونی، بهێزکرنا خۆشگوزەرانی و هەڤسەنگیا قوتابیان، و دابینکرنا خزمەتگوزاریێن پشتەڤانیێ کو پشکداریێ د دروستکرنا ژینگەهەکا ساخلەمتر و پڕ پشتەڤانتر دا ل زانکۆیێ دکەن. د روینشتنا دەستپێکێ دا، قوتابیێن پشکا موزیکێ ل کۆلیژا هونەرێن جوان پارچەکا موزیکێ پێشکێش کر.

پشکەکا سەرەکی یا بەرنامەی پانێلەکێ زانستی بوو ب رێڤەبرنا د. سیار تەمەر سدیق ژ پشکا شیرەتکاریا پەروەردەیی ل زانکۆیا دهۆك. د پانێلێ دا چەندین پسپۆران گەنگەشە ل سەر رەهەندێن جودایێن ساخلەمیا دەروونی و هەڤسەنگیێ کر. د. یوسف عەلی یاسین، پسپۆرێ ساخلەمیا دەروونی ژ کۆلیژا نوژداری، باس ل پێناسەکرنا نەخۆشیێن دەروونی، دەستنیشانکرنا وان، و پێشڤەچوونا وان د ناڤ جڤاکی دا کر. هەروەسا د. زیکرا ئەحمەد، نوژدارا دەروونی ل سەنتەرێ ساخلەمیا دەروونی، باس ل بارودۆخێن دەروونی یێن

کارتێکرنێ ل سەر زارۆک و سنێلان دکەن کر، ب تیشک خستنە سەر هۆکارێن سەرەکی و ئاستەنگان د ڤان قۆناغێن ژیانێ دا.

ژ لایەکێ دی ڤە، د. سامیا سەعید خالید، ژ پشکا جڤاکكۆنەلناسی ل کۆلیژا زانستێن مرۆڤایەتی، باس ل رەهەندێن جڤاکی یێن ساخلەمیا دەروونی کر، و تەئکید ل سەر گرنگیا پشتەڤانیا خێزانی و جڤاکی و کارتێکرنا ژینگەها جڤاکی ل سەر هەڤسەنگیا تاکەکەسی د

قۆناغێن جودایێن ژیانێ دا کر. ب هەڤپشک، دانوستاندنێن پانێلێ گرنگیا تێگەهشتنا ساخلەمیا دەروونی ژ دیدگەهێن نوژداری، دەروونی و جڤاکی دیار کر.

بەرنامەی هەروەسا چالاکیێن داهێنەرانە و پراکتیکی بخۆڤەگرتن ژبۆ هاندانا پشکداریا قوتابیان. قوتابیێن پشکا شانۆیێ ل کۆلیژا هونەرێن جوان شانوگەریەك پێشکێش کر کو رۆهنکر کا چەوا رویدان کارتێکرنێ ل سەر هزر، هەست، هەڵویست و رەفتاران دکەن. ل دەرڤەی هۆلا سەرەکی، پشكداران پشکداری د چەندین چالاکیێن مەیدانی دا کر، ژ وان ژی بکارئینانا تەکنۆلۆژیا ڕاستییا گریمانەیی (VR) بۆ گەڕیان ل ناڤ ئەزموونێن هەستی و بەلاڤکرنا هۆشیاریێ، دگەل ورکشۆپەکا کاریگەر ل ژێر ناڤونیشانێ «گاڤا من بەرەڤ ساخلەمیا دەروونی یا باشتر». ڤان چالاکیان هاندانا پشكداران کر بۆ رامانکرنێ د خۆشگوزەرانیا دەروونی دا و بکارئینانا رێکێن پراکتیکی بۆ پاراستنا وێ.

ب رێیا ڤێ دەستپێشخەریێ، زانکۆیا دهۆك پێگری و پابەندبوونا خۆ ب فێرکرنا قوتابی-تەوەر، ساخلەمیا دەروونی یا قوتابیان، خزمەتگوزاریێن پشتەڤانیێ یێن گشتگیر، و پشکداریا جڤاکی دوپات کر، ب گونجاندن دگەل پێشینەیێن پلانا ستراتیژی یا زانکۆیێ. ب کۆمکرنا شارەزاییێن ئەکادیمی، پشکداریا قوتابیان، و هەڤکاریێ ل گەل رێکخراوێن ناڤخۆیی و ناڤدەولەتی، زانکۆیا دهۆك بەردەوامە د بەلاڤکرنا هوشیاریا ساخلەمیا دەروونی و پشکداریکرن د دابینکرنا ژینگەهەکا پشتەڤان ل کەمپا زانکۆیێ دا کو قوتابی تێدا بشێن فێرببن، پێش بکەڤن، و گەشە بکەن.

ڤێرە کلیك بکە بۆ دیتنا روومالا میدیایی

راپۆرت: رۆندك فازل عادل

وێنە: محەمەد ع. تاهیر

پەیڤێن سەرەکی:

- زانکۆیا دهۆك

- رۆژا جیهانیا ساخلەمیا دەروونی ٢٠٢٦

- ساخلەمیا دەروونی و هەڤسەنگیا قوتابیان

- شیرەتکاریا دەروونی و جڤاکی