١٨ـی خزیرانا ٢٠٢٦ | نڤیسینگەها راگەهاندنا زانكۆیێ (UNPO) —
ل ژێر چاڤدێری و مێهڤانداریا کۆلیژا زانستێن ئەندازیاریا چاندنێ یا زانکۆیا دهۆک، کۆمبوونا سالانە یا راگرێن کۆلیژێن زانستێن ئەندازیاریا چاندنێ ژ سەرانسەری عیراق و هەرێما کوردستانێ ئەڤرۆ پێنجشەمبی، ١٨ـی خزیرانا ٢٠٢٦، ب سەرکەڤتیانە ب دوماهی هات. ئەڤێ هەلكەڤتا دوو رۆژی، کو هەر سال ل زانکۆیەکێ برێڤەدچیت، زنجیرەکا سەرەدانێن مەیدانی یێن بەرفره و پاشان کۆمبوونێن فەرمی و گەنگەشەیێن زانستی ب خۆ ڤە گرت.

پشکدارێن کۆمبوونێ:

• د. شکری حەجی سالح، راگرێ کۆلیژا زانستێن ئەندازیاریا چاندنێ ل زانکۆیا دهۆک.
• هاریكارێ راگری، سەرۆک پشک و مامۆستایێن کۆلیژێ.
• پتر ژ ٤٠ ڕاگر و نوینەرێن کۆلیژێن زانستێن ئەندازیاریا چاندنێ یێن زانکۆیێن جودا جودا ژ باشوور، ناڤەڕاست، و هەرێما کوردستانێ وەکی (بەغدا، سەلاحەدین-هەولێر، بەسرە، مووسل، کەرکووک، ئەنبار، واست، موسەنا، سامرا، كەربەلا، زیقار، تكریت، دیالا، سۆمەر، و تەلعەفەر).

پروگرامێ رۆژا ئێکێ: سەرەدانێن مەیدانی (١٧ـی خزیرانێ):
د رۆژا ئێکێ دا، شاندێ مێهڤان سەرەدانا چەندین پڕۆژە و کۆمپانیێن ستراتیژی و پێشەنگ ل دەڤەرێ کرن، ژ وان:

• دەڤەرا بامرزێ: سەرەدانا کۆمپانیا KH یا چاندنێ هاتە کرن، کو ئێکە ژ کۆمپانیێن پێشەنگ د بیاڤێ چاندن و بەرهەمئینانا پتاتان دا. وەک پشتەڤانیەکا زانستی و ناڤدەولەتی، کۆلیژا زانستێن ئەندازیاریا چاندنێ ب هەڤپشکی دگەل ڤێ کۆمپانیێ د پڕۆژێ بەرهەمئینانا پتاتان دا کار دکەت کو پاڵپشتیا دارایی ژ لایێ کۆمپانیا هۆڵەندی یا ناڤدەولەتی (CABI) بۆ دهێتە دابینکرن. ئەڤ پڕۆژەیە د بن سەرپەرشتیا ڕاستەوخۆ یا مامۆستایێ بسپۆر پ.د. ڕۆفائێل شلیمۆن تۆما و ژمارەکا مامۆستایێن کۆلیژێ دایە. ل وێرێ شاندی سەرەدانا زەڤیێن بەرهەمئینانێ و عمبارێن سارکەرێن پێشکەڤتی کر، پاشان سەرەدانا کارگەها جوتیار بۆ بەرهەمئینانا پتاتاێن فینگەر (Fries) کر.
• دەڤەرا بارزان: پشكەك ژ ڤێ رۆژێ سەرەدانا مەزارگەهێ نەمران و مۆنیۆمێنتا بارزان بوو كو ل وێرێ شێخ خەلات بارزانی پێشوازیا شاندی كر و كورتیەك ل دۆر دیرۆكا دەڤەرێ و قوربانیێن بابێ روحی یێ نەتەوا كورد مەلا موستەفا بارزانی و خەلكێ دەڤەرا بارزان ب گشتی دیار كر بۆ ئامادەبوویان.
• دەڤەرا بالندا: شاندی سەرەدانا کۆمپانیا رامی فارم (Rami Farm) بۆ بەرهەمێن شیرەمەنیان کر، دا کو ژ نێزیک ئامێر و تەکنۆلۆژیایێن سەردەم یێن چێکرنا شیر و سپیاتییان ببینن.

پڕۆگرامێ رۆژا دووێ: کۆمبوونا فەرمی و ڕاسپاردەیێن دوماهیێ (١٨ـی خزیرانێ):
چالاکیێن رۆژا دوماهیێ ل سەنتەرێ کۆنفرانسان ل زانکۆیا دهۆک برێڤەچوون.

پڕۆگرامێ ئەڤرۆ ب پەیڤەکا ب خێرهاتنێ ژ لایێ د. لوقمان هادی حەسەن، هاریكارێ سەرۆكێ زانكۆیێ بۆ كاروبارێن زانستی ل زانکۆیا دهۆک، دەستپێکر، کو ب گەرمی پێشوازی ل مێهڤانان کر و تەکەزی ل سەر پێگیرییا زانکۆیێ بۆ پێشخستنا خواندنا چاندنێ کر. پاشان پێشکێشکرنەکا تێروتەسەل ژ لایێ پ.د. ڕۆفائێل شلیمۆن تۆما ڤە هاتە ئەنجامدان، کو تیشک خستە سەر مێژوو، پشکێن زانستی، سیستەمێ خواندنێ، و دەستکەڤتێن کۆلیژا مێهڤاندار، ب تایبەتی ژی پڕۆژەیێن هەڤپشک دگەل سازیێن هۆڵەندی، ئەڵمانی، و ئەمریکی.

پشتی پێشکێشکرنان، کۆمبوونا فەرمی یا ڕاگرێن کۆلیژێن چاندنێ دەستپێکر. ئەڤ روینشتنە بوو پلاتفۆرمەکا گرنگ بۆ ڕاگران دا کو هزر و نێرینان ل دۆر پرسێن هەنووکەیی یێن کەرتێ چاندنێ کو بەرۆکا وەلاتی گرتینە ئالۆگۆر بکەن، و هەروەسا گەنگەشەکرنا رێکێن ستراتیژی بۆ پتر رێکخستن و سەردەمیانەکرنا خواندنێن چاندنێ ل کۆلیژێن خۆ.

وەک نیشانەکا رێزگرتنێ و دۆستایەتیا ئەکادیمی، د. شکری حەجی سالح، راگرێ کۆلیژا زانستێن ئەندازیاریا چاندنێ ل زانکۆیا دهۆک، قەلغانێن رێزلێنانێ پێشکێشی ڕاگرێن مێهڤان کرن ب هەلکەفتا ڤێ كۆمبوونێ.

ل دوماهیا کۆمبوونێ، ڕاسپاردەیێن فەرمی یێن کۆمبوونێ ژ لایێ سەرۆکێ لژنەیا ڕاگرێن چاندنێ ل عیراقێ، د. حەکیم سولتان عەبد، راگرێ کۆلیژا چاندنێ ل زانکۆیا واست، هاتنە خواندن. ڕاسپاردەیێن پەسەندکری تەکەزی ل سەر ب هێزکرنا هەڤکاریێ د ناڤبەرا زانکۆیان دا کر ب رێکا:

• ئالۆگۆرکرنا ستافێ ئەکادیمی و کارگێڕی د ناڤبەرا زانکۆیان دا.
• رێکخستن و ئەنجامدانا رویدان و کۆنفرانسێن زانستی یێن هەڤپشک.
• ئەنجامدانا وۆرک شۆپێن ئەکادیمی یێن هەڤپشک.
• رێکخستنا سەرەدانێن دوولایەنە بۆ ئالۆگۆرکرنا شارەزایی و پێشخستنا کەرتێ چاندنێ ل وەلاتی.

پشتی ب دوماهی هاتنا کۆمبوونێ، شاندێ مێهڤان گەریانەک ل کەمپێ زانکۆیا دهۆک و کۆلیژا زانستێن ئەندازیاریا چاندنێ ئەنجامدا بۆ دیتنا تاقیگەهـ و ژینگەها ئەکادیمی یا کۆلیژێ.

ڤێرە كلیك بكە بۆ دیتنا وێنە و روومالکرنا میدیایی

نڤیسینگەها راگەهاندنا زانكۆیێ، ١٨ـی خزیرانا ٢٠٢٦
راپۆرت: فاطمە محمود عەلی
وێنە: محەمەد ع. تاهر