زانکۆیا دهۆك، ١٧ـی تیرمەها ٢٠٢٦ | نڤیسینگەها راگەهاندنا زانکۆیێ (UNPO) – زانکۆیا دهۆك (UOD) رێورەسمەك گێڕا ب هەلکەڤتا ب سەرکەڤتیانە ب دوماهیئینانا پرۆگرامێ "جیهان د

دانوستاندنێ دا" (World in Conversation - WinC) ژ لایێ کۆمەکا قوتابیێن وێ ڤە، ئەڤ چەندە د رێورەسمێ دابەشکرنا باوەرنامەیان دا هات کو ل "كوژیێ ئەمریکی" (American

Corner) ل ئاڤاهیێ ناڤەندا قوتابیان ل زانکۆیێ هاتە ئەنجامدان.

پرۆگرامێ "جیهان د دانوستاندنێ دا" (WinC) دەستپێشخەریەکا ناڤدەولەتی یا

باوەریپێکریە کو ژ لایێ زانکۆیا ویلایەتا پێنسیلڤانیا (Penn State) ڤە هاتیە گەشەپێدان بۆ هاندانا گفتوگۆیێن دناڤبەرا کەلتۆران دا دناڤبەرا قوتابیێن زانکۆیان ژ وەلاتێن جودا جودا. ب رێیا دانوستاندنێن ئۆنلاین کو ژ لایێ کەسێن پرۆفێشناڵ ڤە دهێنە بڕێڤەبرن، پشکدار د گفتوگۆیێن رێزدارانە دا دەربارەی پرسێن سەردەم یێن جیهانی پشکداریێ دکەن، کو ئەڤ چەندە کارامەییێن پەیوەندیگرتنێ دناڤبەرا کەلتۆران، هزرا رەخنەیی، و هەڤوەلاتینامەیا جیهانی یا وان پێشدئێخیت.

پرۆگرامێ (WinC) ل زانکۆیا دهۆك د درێژیا سالا خواندنێ یا ٢٠٢٥-٢٠٢٦ دا و د هەردوو وەرزێن ئێکێ و دووێ دا هاتە بجهئینان، وەک پشکەك ژ پابەندبوونا بەردەوام یا زانکۆیێ ب ناڤدەولەتیکرن و پشکداریا ئەکادیمی یا جیهانی.

نێزیکی ٣٠ قوتابیان ژ کۆلیژێن جودا جودا یێن زانکۆیا دهۆك ب سەرکەڤتیانه ئەڤ پرۆگرامە ب دوماهی ئینا. وەک رێزگرتنەك بۆ پشکداریکرنا وان یا کارا و پابەندبوونا وان، رێورەسمەکێ دابەشکرنا باوەرنامەیان هاتە رێکخستن بۆ خەلاتکرنا دەستکەڤیێن وان.

د ڤان رێورەسمان دا، هەر ئێك ژ د. نەبەز ئیبراهیم محەمەد، هاریکارێ سەرۆکێ زانکۆیێ بۆ کاروبارێن قوتابیان؛ د. رەمەزان عابد محەمەد، راگرێ کۆلیژا پەروەردا بنیاتت؛ د. نەزار ئەمین محەمەد، رێڤەبەرێ پەیوەندیێن ناڤدەولەتی؛ د. سەعید أ. سەعید، دامەزرێنەر و رێکخەرێ پرۆگرامێ (WinC) ل زانکۆیا دهۆك؛ م. رێبەر سەلیم عەبدوللا، سەرۆکێ پشکا زمانێ ئینگلیزی ل کۆلیژا پەروەردا بنیات؛ و د. زیرەك یوسف حەسەن، رێڤەبەرێ كوژیێ ئەمریکی، ئامادە بوون.

چالاکی ب پەیڤەکا بخێرهاتنێ ژ لایێ د. سەعید أ. سەعید ڤە دەستپێکر، کو تێدا پرۆگرامێ (WinC) دا نیاسین، و پێداچوونەك ل سەر دەستکەڤتێن قوتابیان د درێژیا سالا خواندنێ دا کر، و گرنگیا گفتوگۆیێ د ئاڤاکرنا لێکتێگەهشتنا کەلتۆران دا دا دیارکرن. هەروەسا هاندانا پشکداران کر کو بەردەوام بن ل سەر پێشخستنا شیانێن خۆ یێن پەیوەندیكرنێ و هاندانا قوتابیێن دی یێن زانکۆیا دهۆك بکەن بۆ تەڤلیبوونا پرۆگرامی د سالا خواندنێ یا داهاتی دا.

د پەیڤا خۆ دا، د. نەبەز پیرۆزباهی ل قوتابیان کر بۆ ب سەرکەڤتیانە ب دوماهیئینانا ڤی پرۆگرامی و تەکەزی ل سەر گرنگیا دەستپێشخەریێن گفتوگۆیا ناڤدەولەتی کر د هاندانا لێکتێگەهشتنا هەڤپشك، ئالۆگۆڕکرنا کەلتۆری، و هەڤوەلاتینامەیا جیهانی دا. پاشان ب هەڤکاریا د. رەمەزان و د. نەزار، باوەرنامەیێن پشکداریکرنێ پێشکێشی قوتابیان کرن.

رێورەسم ب سوپاسیکرنا هەمی پشکدار و رێکخەران ب دوماهیهات، و دووبارە تەکەزی ل

سەر پابەندبوونا زانکۆیا دهۆك هاتە کرن بۆ دابینکرنا دەلیڤەیێن خواندنا ناڤدەولەتی یێن ب مفا ب رێیا هەڤکاریا وێ یا بەردەوام دگەل زانکۆیا ویلایەتا پێنسیلڤانیا.

ئەڤ دەستپێشخەریە رەنگڤەدانا پلانا ستراتیژی یا زانکۆیا دهۆکە (٢٠٢٣-٢٠٣٨) ب رێیا پێشخستنا ناڤدەولەتیکرنێ، بهێزکرنا هەڤپەیمانیێن ئەکادیمی یێن جیهانی، و پڕچەککرنا قوتابیان ب زانین، کارامەییێن پەیوەندیگرتنێ، و شیانێن کەلتۆری یێن پێدڤی بۆ پێشکەڤتنێ د جیهانەکێ دا کو رۆژ ب رۆژ پتر پێكڤە دهێتە گرێدان.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانکۆیێ، ١٧ـی تیرمەها

٢٠٢٦ راپۆرت: فاطمە مەحمود عەلی

وێنەگرتن: محەمەد ع. تاهر

پەیڤێن سەرەکی: زانکۆیا دهۆك، جیهان د دانوستاندنێ دا، WinC، زانکۆیا ویلایەتا پێنسیلڤانیا، كوژیێ ئەمریکی، ناڤدەولەتیکرن، پشکداریا قوتابیان، هەڤوەلاتینامەیا جیهانی، گفتوگۆیا دناڤبەرا کەلتۆران.