ل زانكۆیا دھۆك حەفتیا ھوشیاریا جوگرافی برێڤەدچیت
ئەڤرۆ ڕۆژا ئێكشەمبی ١٥ـی چریا دووێ ٢٠٢٦، د كەش و ھەوایەكێ زانستی و ئەكادیمی دا، حەفتیا ھوشیاریا جوگرافی ژ لایێ كۆلیژا پەروەردە ل زانكۆیا دھۆك ب هەڤپشكی ل گەل پشكا جوگرافی ل كۆلیژا پەروەردە یا زانكۆیا زاخۆ، ل ھۆلا ڕاگریا ڤەكۆلینێن زانستی ھاتە برێڤەبرن.
رێورەسم ب ئامادەبوونا د. رەمەزان عابد محەمەد، راگرێ كۆلیژا پەروەردە یا زانكۆیا دھۆك و د. ستار جەبار حاجی، راگرێ كۆلیژا پەروەردە ل زانكۆیا زاخۆ، د. شێرزاد سەبری عەلی، راگرێ سەنتەرێ ڤەكۆلینێن زانستی ل زانكۆیا دھۆك و مێھڤان ژ رێڤەبەریا پەروەردا دھۆك و سەرۆك پشك و مامۆستا و قوتابیێن كۆلیژا پەروەردە یا زانكۆیا دھۆك و زانكۆیا زاخۆ برێڤەچوون. پەیڤا دەستپێكێ ژ لایێ د. رەمەزان عابد محەمەد، ڕاگرێ كۆلیژێ ڤە ھاتە پێشكێشكرن كو ب خێرھاتنا ئامادەبوویان كر و تەكەز ل سەر گرنگیا ڤان چالاكییێن زانستی كر بۆ پتر گرێدانا ژیانا قوتابیان ب بسپۆریێن وان ڤە، دیسان ناڤبری د پەیڤا خۆدا پەسنا ڕۆلێ ھەڤپشك یێ ھەردوو پشكێن جوگرافی یێن كۆلیژێن پەروەردە ل زانكۆیا دھۆك و زانكۆیا زاخۆ كر بۆ ساخكرنا حەفتیا جوگرافی و ئەنجامدانا چالاكیێن زانستی و ئەكادیمی. ھەروەسیا ب كورتی باس ل گرنگیا زانستێ جوگرافی كر.
ل دویڤ دا سمینارەك ژ لایێ د. دادڤان حەكیم عەبدولرەحمان، مامۆستایێ پشكا جوگرافی ل كۆلیژا پەروەردە ل دۆر زانستێ جوگرافیا ھاتە پێشكێشكرن، ناڤبری د سمینارا خۆدا دەستپێكا سەرھلدانا زانستێ جوگرافیا كر و باس وان دیاردەیان كر ئەوێن ژ لایێ زانستێ جوگرافیا ڤە ڤەكۆلین ل سەر دھێتەكرن.
دیسان پانێلەک ب ناڤونیشانێ "جوگرافیا و ژیانا مە" ھاتە ئەنجامدان، پانێل ژ لایێ د. مزگین محەمەد حسن سەرۆكێ پشكا جوگرافی ھاتە بڕێڤەبرن، ب پشكدارییا ھەر ئێك ژ د. ئاشتی ئسماعیل عەبدولرەحمان بریاردەێ پشكا جوگرافی ل كۆلیژا پەروەردە ل زانكۆیا دھۆك، م. رەمزی تاور داود سەرپەرشتێ بابەتێ جوگرافی ل رێڤەبەریا پەروەردا دھوك، د. جیھان ھاشم محمد، مامۆستا ل پشكا جوگرافی ل كۆلیژا پەروەردە ل زانكۆیا زاخۆ.
د. ئاشتی ئیسماعیل عەبدولرەحمان، باس ل بابەتێ "جوگرافی د جیھانا گوھۆر دا ژ تێگەھشتنا جھی بۆ دانا بریاران" كر، كو ئاماژە ب وێ چەندێ دا، کو جوگرافی ئەڤرو ب تنێ ب وەسفکرنا جهان ڤە نەهاتیە سنووردارکرن، بەلکو بوویە ئامرازەکێ گرنگ بۆ تێگەهشتنا گوهۆڕینێن جیهانێ و پشتەڤانیکرنا دانا بریارێن دروست.
دیسان م. رەمزی تاور داود، باس ب بابەتێ "ئاستەنگ و ئالنگاریێن گوتنا وانەیا جوگرافی ژ لایێ مامۆستایێن نەبسپۆر ل كەرتێ پەروەردێ" كر، ناڤبری ئاماژە ب وان کێشە و ئاستەنگان کر یێن دکەڤنە ڕێکا پرۆسەیا فێرکرنا جوگرافیێ دەمێ وانە ژ لایێ مامۆستایێن نەپسپۆر ڤە دهێتە گوتن، و گرنگیا ڕاهێنان و دابینکرنا مامۆستایێن پسپۆر دیارکر، ھەروەسا تەكەز ل سەر رۆلێ كارا و كاریگەر یێ زانكۆ و ناڤەندێن ئەكادیمی د چارەسەركرنا ئەڤان ئاریشەیان دا كر.
ھەروەسا د. جیھان ھاشم محمد، باس ل بتبەتێ "جوگرافیا ئەندازیاریا جھی یە و شرۆڤەكرنا داتایانە نەك بابەتەكە بۆ ژبەركرنێ و بیرھینانێ" كر. ناڤبری دیارکر کو جوگرافی زانستەکە پشتبەستنێ ب شرۆڤەکرنا داتایان و ئەندازیاریا جهی دكەت و فەرە وەک بابەتەکێ ژبەرکرنێ نەهێتە دیتن، بەلکو وەک ئامرازەکێ شیکارکرنێ بۆ تێگەهشتنا جهی و ئاڤاکرنا چارەسەران.
ل دویڤ دا بەریكانەیەكا زانستی د ناڤبەرا قوتابیێن پشكا جوگرافی یێن زانكۆیا دھۆك و زانكۆیا زاخۆ دا ھاتە ئەنجامدان و ل دویماھیێ سوپاسی ب سەر پشكداران ھاتنە بەلاڤكرن و وێنەیێن بیرھاتنێ ھاتنە گرتن.
ھەژی ئاماژەدانێ یە، چالاکیێن حەفتیا جوگرافی كو ب ھەڤپشكی د ناڤبەرا ھەردوو پشكێن جوگرافی یێن كۆلیژێن پەروەردە ل زانكۆیا دھۆك و زانكۆیا زاخۆ دێ د بەردەوام بن و ل ١٨ـی چریا دووێ ٢٠٢٦ ل زانکۆیا زاخۆ ھێنە برێڤەبرن.
زانکۆیا دهۆك، ب رێکا ڤان چالاکیێن زانستی و ئەكادیمی، هەول ددەت پشتەڤانیا بواری زانستی و پەروەردەیی بکەت و ئاستێ ڤەکۆلین و فێرکرنا جوگرافیێ بلند بکەت. ئەڤ ڕێکخستنە دەرفەتەکێ پێشکێش دکەت بۆ لێكگوھۆرینا ئەزموون و دیتنان د ناڤبەرا مامۆستا و قوتابیان و رۆلێ زانکۆیێ وەک ناڤەندەکا زانستی بهێز دکەت یا کو خزمەتا جڤاکێ دکەت و پشکداریێ د پەرەپێدانا زانیاریان و دانا بریارێن دروست دا دکەت.
ڤێرە کلیک بکە بۆ دیتنا وێنەیان
راگەھاندنا زانكۆیا دھۆك؛ ١٥ـی چریا دووێ ٢٠٢٦
ماهر تاهر سالح