رۆژا کۆمەلناسیێ ٢٠٢٦: زانکۆیا دهۆك زانینا ئەکادیمی ب ئەزموونا جڤاکی ڤە گرێددەت

Nov. 15, 2026, 7:58 p.m.

ل ژێر درووشمێ "کۆمەلناسی و جڤاك: دیتن، ئەزموون و پاشەرۆژ، ئەڤ هەلکەڤتە ئەکادیمی، قوتابی، دەرچووی و رێکخراوێن جڤاکێ مەدەنی کۆمدکەت ژ پێخەمەت بەرچاڤکرنا رۆلێ کۆمەلناسیێ د تێگەهشتنا ئاستەنگێن جڤاکی و خزمەتکرنا جڤاکی دا.

زانکۆیا دهۆك، ١٥ـی چریا دووێ ٢٠٢٦ | نڤیسینگەها راگەهاندنا زانکۆیێ (UNPO) — پشکا کۆمەلناسیێ ل کۆلیژا زانستێن مرۆڤایەتی ل زانکۆیا دهۆك، هەلکەڤتەکا بەرفرەها ئەکادیمی و جڤاکی ب هەلکەڤتا ساخکرنا "رۆژا کۆمەلناسیێ ٢٠٢٦" ل ژێر درووشمێ "کۆمەلناسی و جڤاك: دیتن، ئەزموون و پاشەرۆژ" رێکخست. ئەڤ چالاکیە ل سەنتەرێ کۆنفرانسێن زانکۆیێ بڕێڤەچوو، ب ئارمانجا دوپاتکرن ل سەر گرنگیا زانستێ کۆمەلناسیێ د تێگەهشتنا پرسێن جڤاکی، بهێزکرنا هەڤپشکیا دگەل جڤاکی، و پشکداریکرن د گەشەپێدانا جڤاکی دا.

د رێورەسمان دا هەر ئێک ژ رێزداران: د. داود سلێمان ئەتروشی، سەرۆکێ زانکۆیا دهۆك؛ د. سەعید خودێدا عەلۆ، راگرێ کۆلیژا زانستێن مرۆڤایەتی؛ و د. زوبەیدە سالح عەبدولخالق، سەرۆکا پشکا کۆمەلناسیێ، دگەل ژمارەکا بەرچاڤ ژ مامۆستایان،

قوتابیان، و نوینەرێن رێکخراوێن جڤاکێ مەدەنی ئامادەبوون.

بەرنامێ رێورەسمان ب پەیڤێن بخێرهاتنێ ژ لایێ قوتابیان بژار عەبدولواحد و پەیڤین بەهزاد دەستپێکر، ل دویڤ دا پەیڤێن فەرمی هاتنە پێشکێشکرن. د پەیڤا خۆ دا، د. داود ئەتروشی بخێرهاتنا پشکداران کر و دەستخۆشی ل قوتابیان کر بۆ هەبوونا گرنگیدانەکا چالاکانە ب پرسێن جڤاکی و هەستکرن ب بەرپرسیارەتیێ بەرامبەر جڤاکێ خۆ.

هەروەسا سەرۆکێ زانکۆیێ پلانا زانکۆیێ بۆ ڤەکرنا پشکا کەلتۆرناسیێ د سالا بهێت دا راگەهاند، و پشتەڤانیا خۆ بۆ پشکا کۆمەلناسیێ دوپاتکر، ب ئاماژەدان ب وێ چەندێ کو کۆمەلناسی ب تنێ خواندنەکا تیۆری یا ئەکادیمی نینە، بەلکو پێویستە ب کارێ

مەیدانی و خزمەتکرنا کریاری یا جڤاکی ڤە.

ژ لایێ خۆ ڤە، د. زوبەیدە سالح عەبدولخالق کەیفخۆشیا خۆ ب گێڕانا رۆژا کۆمەلناسیێ دیارکر و ئاماژە ب دامەزراندنا پشکێ ل سالا ٢٠١١ـێ و پەیاما وێ بۆ خواندن و تێگەهشتنا جڤاکی دا. ناڤهاتیێ دوپات کر کو بەرپرسیارەتیکێشان بەرامبەر ئاستەنگێن

جڤاکی مەرجەکێ سەرەکی یە بۆ دارێژتنا پلانێن سەرکەڤتی و بدەستڤەئینانا پێشڤەچوونێ، هەروەسا تیشک ئێخستە سەر کارێ ب کۆم د ناڤ پشکێ دا و دیارکر کو ئەڤ چالاکیە هاتیە دارێژتن دا کو دەرفەتێ بدەتە قوتابیان بۆ دەربرینا دیدگەهێن خۆ و نیشاندانا شیانێن

وان.

دیسان کورتەڤیدیۆیەك ژ لایێ قوتابیێن پشکێ ڤە هاتبوو بەرهەڤکرن کو تێدا دیدگەها خۆ ل سەر کۆمەلناسیێ و پەیوەندیا وێ ب جڤاکی ڤە خستبوو بەرچاڤ. د تەوەرەکێ دی دا،

مامۆستایا ئەکادیمی و بسپۆرا کاری جڤاکی سامیە سەعید خالد، د پەیڤەکێ دا باس ل دیرۆك و گەشەسەندنا کاری جڤاکی کر و دامەزراندنا پشکا کۆمەڵناسیێ وەک دەستکەفتەکێ گرنگ ل قەلەم دا د موکۆمکرنا پشکداریا زانکۆیێ د جڤاکی دا.

گرێدانا کۆمەلناسیێ ب ئەزموونا پیشەیی و جڤاکی ڤە

پشکەکا گرنگ یا بەرنامەی پانێلەکێ گەنگەشەیێ بوو ل ژێر ناڤونیشانێ "ژ پشکا کۆمەلناسیێ بەرەڤ جیهانا کاری: سەرکەڤتن و ئەزموونێن دەرچوویێن کۆمەلناسیێ"، ب

برێڤەبرنا دەرچوویێ پشکێ هەرژین محەمەد. د پانێلێ دا سێ ژ دەرچوویێن پشکێ یێن د ناڤ

دەزگەهـ و رێکخراوێن جودا دا کار دکەن پشکدار ببوون:

- حەسەن عومەر ئەحمەد، کۆمسیۆنا بلند یا نەتەوەیێن ئێکگرتی بۆ کاروباری پەنابەران

(UNHCR).

- زاری عەلی عوسمان، رێکخراوا (The Lotus Flower).

- رێمان مەهدی جەوهەر، رێکخراوا (KSC).

پانێلیستان ئەزموونێن خۆ یێن پیشەیی پێشکێشکرن و باس ل رۆل و پشکداریا خۆ د ناڤ رێکخراوێن خۆ دا کر، ب نیشاندانا چەوانیا بکارئینانا مەعریفەتا کۆمەلناسیێ د بیاڤێن کارێ کرداری و ژینگەهێن جودا یێن جڤاکی دا.

هەروەسا بەرنامەی پێشکێشکرنەک ژ لایێ شیلان فەیسەل حسێن، رێڤەبەرا پرۆژەیان ل رێکخراوا (Youth Speak) بخۆڤەگرتبوو دەربارەی رۆلێ رێکخراوێ و پڕۆژەیێن وێ یێن سالانە. دیسان قوتابی ئیمان خالید بەحس ل رۆلێ گەنجان د جڤاکێ مەدەنی دا کر، و چراك جەمیل محەمەد، کو ئێکەمین قوتابیا سەر ئاستێ کۆلیژێ بوو، ئەزموونا خۆ د ئاستبلندیا زانستی و بکارئینانا کۆمەلناسیێ د ژیانا کرداری دا شرۆڤەکر.

رێزلێنان ل دەستکەڤتێن ئەکادیمی و ساخکرنا کەلەپۆرێ کەلتۆری

پشکا ئێکێ یا هەلکەڤتێ ب رێورەسمێن رێزلێنان و خەلاتکرنا ژمارەکا مامۆستایان و قوتابیێن سەرکەڤتی یێن هەر سێ قۆناغێن خواندنێ یێن پشکێ ب دوماهی هات.

پشکا دوویێ پێشانگەهەک بخۆڤەگرت کو پتر ژ ١٥ ستاندان لێ هاتبوونە تەرخانکرن بۆ رێکخراوێن جڤاکێ مەدەنی و بەرهەمێن قوتابیان. پشکداربوویان دەمەك دگەل چالاکیێن فۆلکلۆری و "دیوانا مللی یا کوردی" دەربازکر، کو دەرفەتەکا جوان بوو بۆ نیشاندانا

دەستپێشخەریێن قوتابیان، داناسینا کارێ رێکخراوان، و ساخکرن و رێزگرتن ل کەلەپؤرێ کەلتۆری یێ جڤاکی.

بهێزکرنا پشکداریا زانکۆیێ د جڤاکی دا

رۆژا کۆمەلناسیێ ٢٠٢٦ گرنگیا پێکهینانا پرەکێ د ناڤبەرا زانینا ئەکادیمی و پێدڤیێن مەیدانی یێن جڤاکی دا سەلماند. ب رێیا ئەزموونا دەرچوویان، داهێنانا قوتابیان، و تێکەلبوون دگەل رێکخراوێن جڤاکێ مەدەنی، ئەڤێ هەلکەڤتێ رۆنکر کا چەوا کۆمەلناسی

دشێت هاریكار بیت بۆ تێگەهشتنا ئاستەنگێن جڤاکی، پێشڤەبرنا دیدگەهێن رەخنەگرانە، و ئامادەکرنا کادران بۆ گرتنەبەرا رۆلێن گرنگ یێن پیشەیی و جڤاکی.

گونجاندنا ستراتیژی:

ئەڤ چالاکیە دگەل پلانا ستراتیژی یا زانکۆیا دهۆك (٢٠٢٣–٢٠٣٨) دگونجیت، نەخاسمە د ستوونێن: بهێزکرنا شیانێن قوتابیان، پشکداریا کارتێکەر د جڤاکی دا، و دامەزراوەیا پێشەنگ د خواندنا بلند دا.

ڤێرە کلیك بکە بۆ دیتنا وێنەیان

نڤیسینگەها راگەهاندنا زانکۆیێ، ١٥ـی چریا دووێ، ٢٠٢٦

راپۆرت: نیبار حاجی حسێن

وێنەگرتن: محەمەد ع. تاهر

پەیڤێن سەرەکی یێن نووچەی:

رۆژا کۆمەلناسیێ ٢٠٢٦ | پشکا کۆمەلناسیێ ل زانکۆیا دهۆك | کۆمەلناسی و گەشەپێدانا جڤاکی | پشکداریا قوتابی و دەرچوویان | رێکخراوێن جڤاکێ مەدەنی ل کوردستانێ.