یاریگەها یانەیا دهۆک یا وەرزشی، نڤیسینگەها راگەهاندنا زانكۆیێ | ل رێکەڤتی 13ـی چریا ئێكێ، 2025،، د ڕێورەسمەکا پر شانازی دا، و ب ئامادەبوونا جەنابێ رێزدار مەسرور بارزانی، سەرۆکێ حکومەتا هەرێما کوردستانێ، زانکۆیا دهۆک ئاهەنگا دەرچوونێ یا گەڕا (30) یا قوتابیێن سالا خواندنێ (2024-2025) ل یاریگەها یانەیا دهۆک یا وەرزشی گێڕا.

ئاهەنگ ب پشکداریا هزاران کەس ژ خێزان و کەسوکارێن دەرچوویان و هژمارەکا مەزن یا کەسایەتیێن بلند یێن حکومی، ئایینی، حزبی، و جڤاکی ب ڕێڤەچوو، ژ وان، به‌رێز وەزێرێ خواندنا بلند و ڤەكۆلینێن زانستی، به‌رێز نوێنه‌رێ سه‌روكێ هه‌رێما كوردستانێ، به‌رێزان پارێزگارێ دھۆكێ و سەرپەرشتیارێ ئیدارا سەربەخۆیا زاخۆ. د ڤێ گەڕا دیرۆکی دا، 4,547 قوتابی ژ 19 کۆلیژان و 97 پشکێن زانستی (73 سپێدەهیان و 24 ئێڤاران) باوەرنامەیێن خۆ یێن ئەکادیمی وەرگرتن. ڕێژا دەرچوویێن کچان د ڤێ گەڕێ دا 2,829 دەرچوو بوو کو دکەتە (62.2%)، بەرامبەر 1,718 دەرچوویێن کوڕان ب ڕێژا (37.8%).

رێورەسمێن ئاهەنگێ دەستپێكرن ب هاتنا ژوورا مەوكبێن دەرچوویێن كۆلیژێن زانكۆیا دهۆك ل دویڤ ئێك بۆ ناڤ مەیدانا یاریگەهێ، و پاشی مامۆستایێن كۆلیژان یێن كو پشتەڤانێن قوتابیان بووینە ل گەشتا خواندنێ دا هاتنە د ناڤ یاریگەهێ دا ب چەپك و رێزگرتنا قوتابی و خێزان و ئامادەبوویان بۆ وان. و پەیڤین فەرمی هاتنە خواندن.

پەیڤا سەرۆکێ زانکۆیا دهۆک

د دەستپێکا ڕێورەسمێ دا، ڕێزدار د. داود سلێمان ئەتروشی، سەرۆکێ زانکۆیا دهۆک، پەیڤەک پێشکێش کر و تێدا گۆت:
"ئه‌و ساڵێن هه‌وه‌ ل زانكۆیا دهۆک بوراندین، پڕ بوون ژ فێربوون و ڤه‌دیتن و تێكوشینێ. ئه‌ڤرو هوین نه‌ بتنێ هه‌لگرێن باوه‌رنامه‌‌كا نوی نه‌، به‌لكو هوین هه‌لگرێن هیڤییا نه‌ بو مالباتێن خۆ، هه‌لگرێن شانازیێنه‌ بۆ زانكۆیا خۆ، و هه‌لگرێن ئومێد و پاشەرۆژێنه‌ بو ولاتێ خۆ. ب ڤێ هه‌لكه‌ڤتێ، ژ دل پیرۆزباهیێ ل ئێك ب ئێك ل هەوە و خێزانێن سەربلندێن هه‌وه‌ دکەم."

سەرۆکێ زانکۆیێ باس ل دەستکەڤتێن ستراتیژی یێن زانکۆیێ کر و گۆت:
"ل ڤان چوار سالێن بۆری، مە ب ڕژدی کار کریه‌ بۆ بنیاتنانا سازیەکا مۆدێرن و شەفاف. مە پرۆسەیا 'ب سازیکرنا زانکۆیێ' دەستپێکریه‌‌... و ئەم دخۆشحالین كو ل ژێر چه‌ترا دەستەیا (KAAE) یا متمانەبەخشینێ، زانکۆیا دهۆک سه‌ركێشییا پرۆسا ب سازیكرنێ زانكۆیێ دكه‌تن ل کوردستانێ."

هەروەسا ئاماژە ب پرۆژێ نشتیمانی یێ گرنگ کر و گۆت:
"یا ژ هەمیان گرنگتر، پرۆژێ مە یێ ستراتیژی و نشتیمان ییه‌ د بوارێ زمانێ كوردی دا، ئه‌وژی تێکەلکرنا زمانێ کوردی – زارێ كرمانجی د ژیرییا دەستکرد (AI) دا، کو گەهشتیە قۆناغێن باش... و ئەم رادگەهینین کو دێ ئێکەم بەرهەمێ ڤی پرۆژه‌ی ل سالا 2026 کەڤیتە بەردەست."

د دویماهییا پەیڤا خۆ دا، د. ئەتروشی سوپاسیا ستافێ زانکۆیێ کر:
"د دلێ ڤان هەمی دەستکەڤتان دا، سوپاس بو هێزا ڕاستەقینە یا زانکۆیا دهۆک، کو ئەوژی ستافێ وێ یێ ئەکادیمی و کارگێری یێ دلسۆزە. ئه‌ڤ ستافه‌ خودانێن ڤان هه‌می ده‌ستكه‌فتنانه‌ و ب گیانێ پێگیری و خۆڕاگریا وان، زانکۆیا دهۆک دێ بەردەوام بیت د پێشکەڤتنێ دا."

پەیڤا سەرۆکێ حکومەتا هەرێما کوردستانێ

پاشی، جەنابێ ڕێزدار مەسرور بارزانی، سەرۆکێ حکومەتا هەرێما کوردستانێ، پەیڤەکا بهادار پێشکێش کر و پیرۆزباهیەكا ژ دل ل دەرچوویان كر: "راستە ئەڤرۆ هوین ئومێد و هیڤیا پاشەرۆژێ نە، بەلێ سوبەهى هوین دێ بنە ئەو سەرکردە یێن کو ئەم هەمى چاڤەرێینە وەلات بکەڤیتە د دەستێ هنگو دا و ڕۆژ ب رۆژ بەرفپێشببەن"

دیسان سەرۆكێ حكومەتێ ڕۆلێ زانکۆیا دهۆک بلند نرخاند و گۆت:
"بێگومان زانكۆیا دهۆكێ ئێكە ل زانكۆیێت هەرە باشێت كوردستانێ و ئاستێ خوێندنێ ڤێ گاڤێ د كوردستانێ دا رۆژ ب رۆژ یێ بەرەڤ پێش دچیت... و دێ بینە نموونە ل رۆژهەلاتا ناڤەڕاست."

سەرۆکێ حکومەتێ ب تایبەتی سوپاسیا مامۆستایان کر و داکۆکی ل سەر خۆڕاگرییا وان کر:
"سەرەڕای ئەو هەموو ئالنگاری و كێشە و گرفت و بەربەستێت كو بۆ وان هاتینە دروست كرن، دیسان بەردەوام بوونه ل پرۆسا خوێندنێ... هنگ جهێ شانازیا مەنە جهێ ڕێز و پێزانینا مەنە."

ل دویڤ دا، نوینەرێ دەرچوویان، رێزدار ئێڤار شکری جەعفەر، پەیڤا دەرچوویان خواند و تێدا سوپاسیا مامۆستا و خێزانێن خۆ کر و سۆز دا کو د خزمەتا وەلاتێ خۆ دا بن.

ل پشتی خواندنا پەیڤێن فەرمی، هاریكارێ سەرۆكێ زانكۆیێ بۆ كاروبارێن قوتابیان و سەرۆكێ ئاهەنگا دەرچوونێ، د. نەبەز ئیبراهیم محەمەد، داخواز ژ سەرۆكێ زانكۆیێ و هاریكارێ سەرۆكێ زانكۆیێ بۆ كاروبارێن زانستی و خواندنا بلند، د. لوقمان هادی حەسەن كر كو باوەرنامەیین بەكالۆریۆسێ ب دەرچوویان بهیتە دان پشتی بجهئینانا وان بۆ هەمی پیدڤیێن وەرگرتنا باوەرنامێ.

هەردوو بەرێزان ژی ب خۆشحالی ڤە راگەهاند كو دەرچوویێن سالا خواندنێ 2024-2025 بوونە هەلگرێن باوەرنامێن بەكالۆریۆسێ د بیاڤێن تایبەتمەند یێن خواندنا وان دا.

ئاهەنگ ب گێڕانا پیرۆزباهیەكا نشتیمانی یا پر شانازی و کەیفخۆشی ب دوماهی هات.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانكۆیێ، چریا ئێكێ، 2025
راپۆرت: عسمەت محمود محەمەد، فاطمە محمود علی
وێنەگرتن: محەمەد عەبدولكەریم تاهر، عەلی حەبیب حەبیب