زانکۆیا دهۆك، ئیلۆنا ٢٠٢٦، نڤیسینگەها راگەهاندنا زانکۆیێ (UNPO) | زانکۆیا دهۆك (UOD) دوماهی ب خۆلەکا راهێنانێ یا پراکتیکی بۆ دەمێ پێنج حەفتیان ل ژێر ناڤونیشانێ "بنەمایێن پروگرامێ ArcGIS Pro: رێڤەبرنا داتایێن جهى و بەرهەمهێنانا

نەخشان" ئینا، کو ئارمانج ژێ ئاشناکرنا پشکداران بوو ب بنەمایێن سیستەمێن پێزانییێن جوگرافی (GIS)، رێڤەبرنا داتایێن جهی، شڕۆڤەکرن، و بەرهەمهێنانا نەخشەیێن دیجیتاڵی.

ئەڤ خۆلا راهێنانێ سەربۆرەکا پراکتیکی د بکارئینانا پروگرامێ ArcGIS Pro دا پێشکێشی پشکداران کر، کو ئێك ژ پروگرامێن پێشەنگە د بوارێ سیستەمێن پێزانینێن جوگرافی بۆ شڕۆڤەکرنا جهی و بەرهەمئینانا نەخشان. ئەڤ کۆرسە بۆ دەستپێکەران هاتیە دیزاینکرن، و بابەتێن تیۆری دگەل پراکتیکێن کارەکی و راهێنانان تێکەل کرینە ژبۆ هاریکاریکرنا پشکداران ل سەر پێشڤەبرنا وان شیانێن پێدڤی بۆ رێڤەبرنا داتایێن جهی و بەرهەمئینانا نەخشەیێن دیجیتالی ب کوالیتییەکا بڵند ژبۆ بجهئینانا پێدڤییێن ئەکادیمی، پیشەیی و

دامەزراوەیی.

د ماوێ پێنج حەفتیان دا، ئەڤێ خۆلێ کۆمەکا بابەتان ب شێوەیەکێ قۆناغ ب قۆناغ بخۆڤەگرت، ژ وان ژی:

- ناسینا پروگرامێ ArcGIS Pro و ژینگەها کارکرنێ، پرۆژە، نەخشە و شێوازێن

دەرێخستنێ (Layouts).

- رێڤەبرنا داتایێن جهی، بخۆڤەگرتنا داتایێن ڤێکتەر (Vector Data) و داتایێن راستەر (Raster Data)، خشتەیێن داتایێن وەسفی (Attribute tables)، سیستەمێ پۆتانان (Coordinate systems) و پرۆژێکشنان.

- رێڤەبرن و دەستکاریکرنا داتایان، بخۆڤەگرتنا داتا بەیسێن جهی (Geodatabases)،

دیجیتالکرن، دەستکاریکرنا فیچەران، و هێماکرنا نەخشان (Symbology).

- شرۆڤەکرنا جهی یا بنەرەتی، بخۆڤەگرتنا هەلبژارتن (Selection)، دروستکرنا بازنەیان (Buffering)، بڕین (Clipping)، ئێکتربڕین (Intersecting)، و گرێدانێن جهی (Spatial joins).

- دیزاینکرنا نەخشان و زانستێ نەخشەسازیی (Cartography)، بخۆڤەگرتنا نەخشەیێن بابەتی، ناڤلێکرن (Labels)، کلیلێن نەخشان (Legends)، پیڤەرێن نەخشان، تیرکێن باکووری، و هنارتنا نەخشان بۆ بکارئینانا ئەکادیمی و پیشەیی.

ئەڤ راهێنانە ژ لایێ سەرۆکێ پشکا جوگرافی د. شەمال ئەحمەد ئەمین، د. نەشوان شوکری عەبدوڵڵا، د. سەمیر، و د. دلۆڤان رەمەزان ئیسماعیل ڤە هاتە پێشکێشکرن، کو حەفتیێ دوو رۆژان ژ ١٩ـی تیرمەهێ تا ١٩ـی تەباخا ٢٠٢٦ـێ دهاتە ئەنجامدان.

ب رێیا راهێنانێن پراکتیکی، پشکداران ئەو چەمکێن ل هەر دانیشتنەکێ دا هاتینە شرۆڤەکرن بجهئینان، ژ وان ژی دروستکرنا پرۆژە و داتابەیسێن جهی، ڕێڤەبرن و دەستکاریکرنا داتایێن جهی، ئەنجامدانا شرۆڤەکرنێن جوگرافی یێن سەرەکی، و دیزاینکرنا نەخشەیێن بابەتی. هەروەسا خولێ پرۆژەیەکێ دوماهیێ یێ پراکتیکی بخۆڤەگرت، کو تێدا پشکدار هاتنە رێنماییکرن بۆ هەلبژارتنا دەڤەرەکا ڤەكۆلینێ، رێکخستنا داتایێن ڤێکتەر و راستەر، ئەنجامدانا شرۆڤەکرنا جهی، و بەرهەمئینانا نەخشەیەکا بابەتی یا پیشەیی.

ئەڤ خۆلە هاریکارە بۆ دوپاتکرنا پابەندبوونا زانکۆیا دهۆك ب وەرچەرخانا دیجیتاڵی و گەشەپێدانێ، فێربوونا پراکتیکی، و ئاڤاکرنا شیانێن ئەکادیمی، ب مەرەما پشتەڤانیکرنا گەشەپێدانا کارامەییێن تەکنیکی کو دکارن د بوارێن ڤەکۆلین، پلان دانان، لێکۆلینێن

ژینگەهی، و بوارێن دی دا بهێنە بکارئینان کو پێدڤی ب داتایێن جهی و شڕۆڤەکرنا

جوگرافی هەیە.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانکۆیێ، ئیلۆنا ٢٠٢٦
راپۆرت: فاطمە محمود عەلی، شەمال ئەحمەد ئەمین

وێنە: زیاد موەفەق عەبدوڵڵا