بۆ ئامادەکرن بۆ بازاڕێ کاری: کۆلیژا یاسا زنجیرەیەکا وانەیێن پراکتیکی بۆ قوتابیێن قوناغا پێنجێ ڕێکدێخیت
زانکۆیا دهۆک – ١٢ـی شواتا ٢٠٢٦ | نڤیسینگەها ڕاگەهاندنا زانکۆیێ
سەنتەرێ ڤەکۆلینێن یاسایی و ڕامیاری ل کۆلیژا یاسا - زانکۆیا دهۆک، ب هەماهەنگی دگەل سەندیکا پارێزەرێن کوردستانێ/لقێ دهۆک و سەرۆکاتیا دادگەها تێهەلچوونا ناوچا دهۆک، زنجیرەیەکا وانەیێن تایبەت بۆ قوتابیێن قوناغا پێنجێ سازکرن، ب مەرەما ئامادەکرن و شارەزاکرنا وان بۆ پیشەیا پارێزەریێ و پڕکرنا کەلێنا د ناڤبەرا خواندنا تیۆری و پراکتیکی دا.
د. نەشوان خالد، ڕێڤەبەرێ سەنتەرێ ڤەکۆلینێن یاسایی و ڕامیاری ڕاگەهاند کو ل ڕۆژا چارشەمبی، ١١ـی شواتا ٢٠٢٦، مێهڤانداریا دو پارێزەرێن ڕاوێژکار ژ لایێ سەندیکا پارێزەران ڤە هاتە کرن. ناڤهاتیان دو وانەیێن گرنگ دەربارەی ڕەوشت و پیشەیا پارێزەریێ و چاوانیا سەرەدەریکرنێ دگەل دادگەهان و خەلکی پێشکێشکرن، ب ئارمانجا وێ چەندێ کو قوتابیێن دەرچوو هەست ب بەرپرسیارەتیێ بکەن و ئاشنای جیهانا کاری ببن.
هەروەسا د. نەشوان ئاماژە دا وێ چەندێ کو چالاکی ل ڕۆژا پێنجشەمبی، ١٢ـی شواتا ٢٠٢٦ بەردەوام بوون، و تێدا دو دادوەر ژلایێ سەرۆکاتیا دادگەها تێهەلچوونا ناوچا دهۆک ڤە هاتنە داخوازکرن. د وانەیەکێ دا، بەحس ل ڕێکارێن دادگەهێن شارستانی هاتەکرن، و د یا دووێ دا، تیشک ئێخستە سەر ڕێکار و ب ڕێڤەچوونا داوایێن سزایی. ئەڤ وانەیێن پراکتیکی دەلیڤەکا زێرین بوو بۆ قوتابیان کو ژ شارەزایی و ئەزموونا دادوەران مفای وەربگرن.
ل دوماهیێ، ڕێڤەبەرێ سەنتەری دوپاتی ل سەر گرنگیا ڤان جۆرە چالاکیان کر و گۆت: "مەرەما مە یا سەرەکی ئەوە کو قوتابیێن مە ب شێوەیەکێ پراکتیکی بهێنە ئامادەکرن، دا کو پشتی دەرچوونێ ڕاستەوخۆ بشێن بکەڤنە د بیاڤێ کاری دا و دەلیڤەیێن کاری بۆ خۆ پەیدا بکەن، ب تایبەتی د پیشەیا پارێزەریێ دا."
ڤێرە كلیك بكە یۆ دیتنا وێنەیان
نڤیسینگەها ڕاگەهاندنا زانکۆیێ، ١٢ـی شواتا ٢٠٢٦
راپۆرت: رەمەزان شەعبان رەمەزان
وێنە: عەلی حەبیب حەبیب
پەیڤێن سەرەکی یێن نووچەی:
زانکۆیا دهۆک
کۆلیژا یاسا
سەندیکا پارێزەرێن کوردستانێ
پێگەهاندنا پیشەیی
دادگەها تێهەلچوونا دهۆک