بەغدا، ١٠ـی چریا دووێ، ٢٠٢٦ | نڤیسینگەها راگەهاندنا زانکۆیێ (UNPO) — ژ پێخەمەت ب هێزکرنا هەڤکاریا ئەکادیمی و بەرفرەهکرنا هەڤپشکیێن سازیاتی دگەل زانکۆیێن عیراقی، شاندەکێ زانکۆیا دهۆك ل رۆژێن ٢٨–٢٩ـی چریا ئێکێ ٢٠٢٦ـێ سەرەدانا باژێرێ بەغدا کر و زنجیرەیەکا کۆمبوونان دگەل سەرۆکێن زانکۆیان و بەرپرسێن ئەکادیمی ئەنجام دان، ب مەرەما لێگەڕیان ل دەرفەتێن کارکرنێ ل سەر پڕۆگرامێن هەڤپشک، ڤەکۆلینێن زانستی، پرۆژەیێن ناڤدەولەتی و چالاکیێن ئەکادیمی یێن هەڤپشك.

شاندێ زانکۆیا دهۆك پێکدهات ژ: د. لقمان هادی حەسەن، هاریکارێ سەرۆکێ زانکۆیێ بۆ کاروبارێن زانستی و خواندنا بلند؛ د. ئیسماعیل ئەمین عەلی، رێڤەبەرێ پێڤاژۆیا بۆلۆنیا؛ و د. جوان محەمەد مەهدی ئەلموفتی، نوینەرا پەیوەندیێن ناڤدەولەتی بۆ زانکۆیێن عیراقی و عەرەبی.

ئەڤ سەرەدانە هەڤدەم بوو دگەل برێڤەچوونا "سێیەمین کۆنفرانسێ پەروەردە و فێرکرنێ یێ عیراقێ" کو ل زانکۆیا بەغدا هاتە سازکرن و تێدا ئەکادیمی، بسپۆر و بڕیاربدەست کۆمببوون دا کو رەوشا فێرکرنێ گەنگەشە بکەن و ل ئاسۆیێن پاشەرۆژێ بۆ پێشڤەبرنا خواندنا بلند ل عیراقێ بگەریێن. کۆنفرانسی تیشك ئێخستە سەر گرنگیا موکۆمکرنا هەڤکاریا د ناڤبەرا سازیێن پەروەردەیی دا و گوهۆڕینا دانوستاندنێن ئەکادیمی و

ئەزموونێن هەڤپشك بۆ دەستپێشخەریێن کریاری.

ل دەمێ سەرەدانێ، شاندێ زانکۆیا دهۆك چەندین کۆمبوون دگەل نوینەرێن زانکۆیێن عیراقی ئەنجام دان و تێدا تیشك ئێخستنە سەر دانانا هەڤپشکیێن نوی کاراکرنا رێکەڤتنێن بەرێ، ژ وان ژی:

- زانکۆیا بەغدا: د کۆمبوونەکێ دا دگەل سەرۆکێ زانکۆیێ، تیشک ئێخستە سەر کاراکرنا یاداشتا لێکتێگەهشتنێ (MoU) یا د ناڤبەرا هەردوو زانکۆیان دا ب رێیا دانانا میکانیزمێن جێبەجێکرنێ یێن رۆن، چالاکیێن ئەکادیمی، کۆنفرانس و پرۆژەیێن هەڤپشك.

- زانکۆیا ئەنبار: دانوستاندن ب رێکەڤتنەکێ ب دوماهی هاتن بۆ ئامادەکرنا یاداشتەکا لێکتێگەهشتنێ کو هەڤکاریا ئەکادیمی، کۆنفرانسێن هەڤپشك، سمینار و چالاکیێن زانستی د بوارێن گرنگیدانا هەڤپشك دا بخۆڤەدگریت.

- زانکۆیا موستەنسریە: شاندی گەنگەشە ل سەر دەستپێکرنا رێکارێن فەرمی بۆ رێكەڤننامەکا هەڤکاریێ کر، ب مەرەما هنارتنا نڤیسارەکا فەرمی ژ لایێ رێڤەبەریا پەیوەندیێن ناڤدەولەتی یا زانکۆیا دهۆك بۆ لایەنێن پەیوەندیدار ل زانکۆیا موستەنسریە.

- زانکۆیا تەکنەلۆجی: دانوستاندن ل دۆر هەماهەنگیا بەردەوام هاتە کرن بۆ پێشڤەبرنا پەیوەندیان و لێگەریان ل دەرفەتێن هەڤکاریا ئەکادیمی و ڤەکۆلینان.

هەروەسا د کۆمبوونان دا دەرفەتێن بهێزکرنا هەڤکاریێ ب رێیا ئەنجامدانا چالاکیێن ئەکادیمی یێن هەڤپشك هاتنە باسکرن، نەخاسمە "کۆنفرانسێ گەشەپێدانا بەردەوام" و پێشنیارا گرێدانا "کۆنفرانسەکێ ناڤدەولەتی ل دۆر فیدرالیەتێ".

هەڤکاریا د بیاڤێ ڤەکۆلینان و بەلاڤکرنا ئەکادیمی یا ناڤدەولەتی دا ژ تەوەرێن سەرەکی یێن گەنگەشەیان بوون؛ هەر دوولا دەرفەتێن هەڤکاریێ دگەل گۆڤارێن زانستی یێن باوەرپێکری و ئیندێکسکری د "سکۆپەس" (Scopus) دا نرخاندن، ب مەرەما هاندانا بەلاڤکرنا هەڤبەش و پشتەڤانیکرنا ڤەکۆلینێن هەڤپشك د ناڤبەرا مامۆستا و ئەکادیمیێن هەردوو زانکۆیان دا.

تەوەرەکێ دی یێ گرنگ بریتی بوو ژ پێشڤەبرنا پرۆژەیێن هەڤکاریا نێڤدەولەتی، ب تایبەتی ب رێیا بەرنامێ "ئەراسمۆس پڵەس" (Erasmus+). ب پشتبەستن ل سەر ئەزموونێن زانکۆیا دهۆك و هەڤپەیمانیێن وێ یێن ئەکادیمی یێن ناڤدەولەتی، شاندی گەنگەشە ل دۆر دانانا پێشنیازە-پرۆژەیێن هەڤپشك دگەل زانکۆیێن هەڤپشك کر، ب گۆرەی پێشینەیێن دارایی و مەرجێن ئێکەتیا ئەوروپا.

گونجاندنا ستراتیژی

ئەڤ سەرەدانە دگەل پلانا ستراتیژی یا زانکۆیا دهۆك (٢٠٢٣–٢٠٣٨) دگونجیت، نەخاسمە د ستوينێن "دامەزراوەیا پێشەنگ د خواندنا بلند دا" و "پشکداریا کارتێکەر د جڤاکی دا". ب رێیا پێشڤەبرنا هەڤپشکیێن دامەزراوەیی، ڤەکۆلینێن هەڤپشك، بەلاڤکرنا زانستی، و گەشەپێدانا پرۆژەیێن ناڤدەولەتی، زانکۆیا دهۆك بەردەوامە ل سەر بلندکرنا کوالێتی و کارتێکرنا چالاکیێن خۆ یێن ئەکادیمی، و پشکداریکرن د بەرەڤپێشبرنا خواندنا بلند و هەڤکاریا زانستی دا ل سەر ئاستێ عیراقێ.

ڤێرە کلیك بکە بۆ دیتنا وێنەیان

نڤیسینگەها راگەهاندنا زانکۆیێ، ١٠ـی چریا دووێ، ٢٠٢٦

راپۆرت: فاطمە مەحمود عەلی

پەیڤێن سەرەکی یێن نووچەی:

هەڤپشکیێن ئەکادیمی یێن زانکۆیا دهۆك | سێیەمین کۆنفرانسێ پەروەردە و فێرکرنێ یێ عیراقێ | هەڤکاریا د ناڤبەرا زانکۆیێن عیراقی دا | ڤەکۆلینێن هەڤپشک و بەلاڤکرنا زانستی | پرۆژەیێن نێڤدەولەتی یێن ئەراسمۆس پڵەس.