زانکۆیا دھۆک، ١٠ـی چریا دووێ، ٢٠٢٥ | نڤیسینگەھا راگەھاندنا زانکۆیێ (UNPO) –

کۆلیژا پزیشکی ل زانکۆیا دھۆک (UOD) پێنگاڤەکا گرنگ بەرەڤ ب ھێزکرنا ھەڤکاریا ناڤدەولەتی د بوارێ خواندنا ساخلەمیێ دا ھاڤێتیە ب ئیمزاکرنا رێکەڤتناما لێکتێگەھشتنێ (MoU) دگەل تۆڕا لەندەن–عێراق یا کۆلیژا پزیشکی یا شاھانە (RCP) — رێکخراوەکا نیشتیمانی یە کو ژ لایێ RCP (بریتانیا) ڤە دھێتە پشتەڤانیکرن و ژ ھەڤکار و ئەندام و دەرچوویێن عێراقی یێن کولیژێ پێک دھێت.

ئیمزاکرن ل پەراوێزا کۆنفرانسێ یادا ٥ سالی یا تۆڕا لەندەن–عێراق یا کۆلیژا پزیشکی یا شاھانە ھاتە ئەنجامدان، کو ل سلێمانیێ د رۆژێن ٧-٨ـی چریا دووێ، ٢٠٢٥ ھاتبوو گێران. د کۆنفرانسى دا پزیشک و ئەکادیمیستێن بناڤودەنگ یێن عێراقی و ناڤدەولەتی و نوینەرێن وەزارەتا تەندروستی و زانکۆیێن پزیشکی یێن پێشەنگ ئامادەببوون. ئەڤ ئیمزاکرنه هاتە ئەنجامدان ژ لایێ راگرێ کۆلیژا پزیشکی ل زانکۆیا دهۆک، د. دلدار حاجی موسا، و سەرۆکی تۆرا لەندەن-عیراق، د. هیلال السەفار

پێنگاڤەکا ستراتیژی بەرەڤ نایابیا ناڤدەولەتی

ب رێیا ڤێ رێکەڤتنامەیێ، زانکۆیا دھۆک ئالۆگۆریا ئەکادیمی، ڤەکۆلینێن کلینیکی، و دەلیڤەیێن پێشڤەچوونا پیشەیی بۆ مامۆستا و قوتابیێن خۆ بهێزدکەت. ئەڤ ھەڤپشکیە دێ گرنگیێ ب ڤان خالان دەت:

• پێشئێخستنا شیانێن کارمەندێن پزیشکی بۆ باشترکرنا پێشکێشکرن و دیزاینکرنا خزمەتگوزاریێن ساخلەمیێ ل سەرانسەری عێراقێ.
• بھێزکرنا خواندنا پزیشکی و پێشڤەچوونا پیشەیی یا بەردەوام (CPD) ب رێیا ھەڤکاریێ دگەل کۆلیژا پزیشکی یا شاھانە بۆ باوەڕپێدان و راھێنانێ.
• ئاسانکرنا ڤەکۆلین و ئالۆگۆریا زانینێ یا ناڤدەولەتی، ب تایبەتی د بوارێ پزیشکیا بنەمادار ل سەر بەلگەیان و نویگەریێن ساخلەمیێ دا.
• پەیداکرنا دەلیڤەیان بۆ پزیشکێن گەنج کو پشکداریێ د دەستپێشخەریا راھێنانا پزیشکی (MTI) یا RCP دا بکەن، کو رێکێن گەھشتن ب راھێنان و سەرکردایەتیا جیھانی ڤەدکەت.

دیدگەھەکا ھەڤپشک بۆ پاشەرۆژەکا ساخلەمتر

تۆڕا کولیژا پزیشکی یا شاھانە یا لەندەن–عێراق، کو د سالا ٢٠٢١ـێ دا ل سەر دەستێ دکتۆر ھلال السەفار ھاتیە دامەزراندن، کار دکەت بۆ باشترکرنا ساخلەمیێ ل عێراقێ ب رێیا خواندن، پێشکێشکرنا خزمەتگوزاریان، و داکۆکیکرنێ. ئارمانجا وێ ژ نێزیک ڤە دگەل دیدگەھا ستراتیژی یا زانکۆیا دھۆک بۆ بھێزکرنا سەرکردەیێن پاشەرۆژێ د بوارێ پزیشکیێ دا، نوییکرنا پرۆگرامێن خواندنێ، و پشتەڤانیکرنا ڤەکۆلینێن زانستی ل سەر ئاستێن نیشتیمانی و ناڤدەولەتی دگونجیت.

ھەروەسا، ئەڤ ھەڤکاریە پابەندبوونا بەرفرەھ یا زانکۆیا دھۆک بۆ بلندکرنا ستانداردێن ساخلەمیێ، ب ھێزکرنا ڤەکۆلەرێن گەنج، و بھێزکرنا ھەڤپشکیێن ئەکادیمی یێن جیھانی کو مفای دگەھیننە ھەرێما کوردستانێ و عێراقێ ب گشتی، نیشان ددەت.

ڤێرە کلیک بکە بۆ دیتنا وێنەیان

نڤیسینگەھا راگەھاندنا زانکۆیێ – ١٠ـی چریا دووێ، ٢٠٢٥
راپۆرت ژ لایێ: فاطمە محمود علی

پەیڤێن سەرەکی:

• کۆلیژا پزیشکی یا زانکۆیا دھۆک
• تۆڕا لەندەن–عێراق یا کولیژا پزیشکی یا شاھانە
• ھەڤکاریا خواندنا پزیشکی و ڤەکۆلینان ل عێراقێ
• پرۆگرامێ RCP MTI ل کوردستانێ
• ھەڤپشکیێن ناڤدەولەتی د خواندنا بلند دا ل عێراقێ