زانکۆیا دهۆک | نڤیسینگەها ڕاگەهاندنا زانكۆیێ (UNPO) —

وەک پشکەک ژ پابەندبوونا خۆ ب دیارکرنا چیرۆکێن سەرکەڤتنێ یێن دەرچوویان و بهێزکرنا گرێدانا د ناڤبەرا خواندنا ئەکادیمی و پێدڤیێن بازاڕێ کاری دا، زانکۆیا دهۆک ڕۆناهیێ د ئێخیتە سەر گەشت و ئەزموونا پیشەیی یا (د. ئەلند سەلیم یاسین)، دەرچوویێ سالا ٢٠٢٢-٢٠٢٣ یێ کۆلیژا پزیشکیا ڤێتێرنەری، یێ کو نوکە وەک پزیشکەکێ ڤێتێرنەری د بوارێ گیانەوەرێن مەزن و تەرش و کەوالی دا کار دکەت.

بنەمایێ ئەکادیمی و دەربازبوون بۆ قۆناغا کاری
د. ئەلند باس ل ڕۆژا ئێکێ یا کارێ خۆ دکەت و دیار دکەت کو "زۆرا ب زەحمەت بوو و تاقیکرنەکا نوی بوو د بوارێ مەیدانی دا، لێ ل هەمان دەم خۆشترین ڕۆژ بوو کو مرۆڤ هەست ب ئەنجامدانا کارێ خۆ یێ دروست دکەت." ناڤبری تەکەز کر کو خواندنا وی یا تیۆری ل زانکۆیێ بنەمایەکێ زانستی یێ ب هێز بۆ ئاڤاکر، کو شیان دانێ د چاڤپێکەڤتنا ئێکێ یا کاری دا ب سەرکەڤتیانە و ب باوەریەکا تمام بەرسڤا پرسیارێن تەکنیکی بدەت.

ژ گرنگترین ئەو کارامەییێن ل دەمێ خواندنێ ل زانکۆیا دهۆک وەرگرتین و ڕۆژانە بکار دئینیت، "کارامەییێن نەشتەرگەری و تاقیگەهی" نە. هەرچەندە ل دەسپێکێ خۆگونجاندن د کارێ مەیدانی دا ئاستەنگ هەبوون، لێ ب بەردەوامی و "بهێنفرەهیێ" شیا وێ قۆناغێ دەرباز بکەت و سەرکەڤتنێ بینیت.

ئامۆژگاری بۆ قوتابیێن نوکە
سەبارەت ب گەشتا خۆ یا ئەکادیمی، د. ئەلند ئامۆژگاریا قوتابیان دکەت کو "هەردەم یێ ئەرێنی بن، گوهداریا پەیڤێن نەرێنی نەکەن، و هەردەم هەوڵێن گوهۆڕینێ و پێشئێخستنا خۆ بدەن." ئەو دوپات دکەت کو سەرکەڤتن د ڤی بواری دا پێدڤی ب هەبوونا کارامەییێن تەکنیکی و کەسایەتیەکا ب هێز هەیە. هەروەسا ئاماژە ب وێ چەندێ کر کو "پەیوەندیێن پیشەیی" (Networking) ڕۆڵەکێ سەرەکی د دیتنا دەلیڤێن کاری دا دگێڕن، چونکی د بازاڕێ ئەڤڕۆ دا جیاوازی و زیرەکی کلیلا بدەستڤەئینانا کاری نە.

پزیشکیا ڤێتێرنەری و کارتێکرنا وێ ل سەر جڤاکی
د. ئەلند پیشەیا خۆ وەک "سەربازەکێ بەرزە" وەسف دکەت کو ڕۆڵەکێ گرنگ و هەبوونەکا کاریگەر بۆ مرۆڤایەتیێ هەیە لێ کێم نرخاندن لێ دهێتە کرن. ئەو دبێژیت: "پزیشکێن مرۆڤان ب جلێن پاقژ مرۆڤان قورتال دکەن، بەلێ پزیشکێن ڤێتێرنەری ب جلێن ماندیبوونێ دشێن مرۆڤایەتیێ قورتال بکەن." ئەو ددەتە دیارکرن کو هەمی بابەتێن ئەکادیمی یێن ل زانکۆیێ دهێنە خواندن مفایێ خۆ هەیە و ل دویڤ وەرزان و پێدڤیێ گرنگیا وان دیار دبیت.

ب ڕێکا پڕۆژەیێن پەیوەندیدار ب کەرتێ ئاژەڵداریێ ڤە، کارێ وی دێ بیتە ئەگەرێ "زێدەبوونا دەلیڤێن کاری، کێمکرنا بێکاریێ، و پشتبەستنێ ل سەر بەرهەمێ خۆمالی،" کو ئەڤە ژی دبیتە ئەگەرێ پاراستنا ساخلەمیا گشتی ب ڕێکا دابینکرنا بەرهەمەکێ پاقژ و ب سەلامەت بۆ وەلاتیان.

بۆ پاشەڕۆژێ، د. ئەلند هیڤی هەیە کو "پەرتووکەکێ بنڤێسیت" کو تێدا باس ل ئاریشە و چارەسەریێن پیشەیی بۆ دەرچوویێن نوی بکەت، و هیڤی خواست پڕۆژەیێن زێدەتر بۆ پشتەڤانیا بەرهەمێ ناڤخۆ و پێشڤەبرنا وەلاتی بهێنە ئەنجامدان.

گونجان دگەل دیتنا ستراتیژی یا زانکۆیا دهۆک
ئەڤ چیرۆکا دەرچوویێ زانکۆیێ، دگەل پلان و ستراتیژیەتا زانکۆیا دهۆک (٢٠٢٣-٢٠٣٨) دگونجیت، ب تایبەت ئەو خالێن گرنگیێ ددەنە پەروەردەیا ب کارئێخستنێ (Employability)، خزمەتا جڤاکی، و ئامادەکرنا دەرچوویان بۆ ڕووبرووبوونا ئاریشەیێن جیهانا ڕاستەقینە ب باوەری و بەرپرسیارەتی.

نڤیسینگەها ڕاگەهاندنێ یا زانکۆیێ، ٩ـی شواتا ٢٠٢٦
راپۆرت ژ لایێ: فاطمە محمود عەلی، پەیمان فەخري تاهیر

پەیڤێن سەرەکی یێن نووچەی:
پزیشکیا ڤێتێرنەری ل زانکۆیا دهۆک
سەرکەڤتنا دەرچوویێن زانکۆیا دهۆک (UOD Alumni Success)
ساخلەمیا گشتی یا ڤێتێرنەری
کارێ دەرچوویان
پێشئێخستنا تەرش و کەوالی ل عیراقێ