ل رێکەفتی ١٦ـی کانوونا ئێکێ، ٢٠٢٤، ل هەولێرا پایتەخت ، كۆربەندەكێ زانستی ل دۆر "پشکداریکرنا هاوەلاتیان دناڤ پلاندانان و نەخشەدانانا ئاڤەدانکرنێ ل کوردستانێ" ژ لایێ كۆلیژا پلانسازیا شار و هەرێمان یا زانكۆیا دهۆك، و ب ئامادەبوونا د. لەیلا محمد رەسول راگرا کولیژا پلانسازیا شار و هەرێمان، و د. بەشیر سەعید سەروکێ پشکا پلاندانانا جهی، و د. یوهانس لوکنکوتەر رێکخەرێ پرۆگرامی ژ زانکۆیا تی یو دۆرتمۆند یا ئەڵمانی و هژمارەکا رێڤەبەر ئەندازیارێن وەزارەتا شارەوانی و گەشت و گۆزار و وەزارەتا پلاندانانێ، هاتە ئەنجامدان.

ئەڤ كۆربەندە دكەڤیتە د چارچۆڤێ پرۆژێ (DAAD TAZIZ, Network ٢٠٢٣-٢٠٢٦) یێ كو ژ لایێ کۆلیژا پلانسازیا شار و هەرێمان ڤە ب هەڤکاریا زانکۆیا دۆرتموند یا ئەلمانی و ب پشتەڤانیا وەزارەتا دەرڤە یا ئەلمانی، بۆ بهێزکرنا پشکداریا هاوەلاتیان د پلاندانانا ئاڤەدانکرنێ و پەرەپێدانێ ل هەرێما کوردستانێ دهێتە بجهئینان.

پروگرامێ پرۆژەی پێک دهێت ژ زنجیرەکا وۆرکشۆپ و چالاکی و راهێنانان بۆ ئەندازیار و رێڤەبەر و فەرمانبەرێن حکۆمی و رێکخراوێن نە حکومی، بۆ بهێزکرنا شیانێن پشكداریكرنێ د پروسێسا ئاڤەدانکرنێ دا.

ل دەستپێکا كۆربەندی، د.لەیلا محمد رەسول، راگرا کۆلیژا پلانسازیا شار و هەرێمان، باس ل گرنگیا پشكداریكرنێ د پروسێسا ئاڤەدانکرنێ و چارەسەرکرنا کێشەیان كر وتەكەز ل وێ چەندی كر كو ل وەلاتێن پێشکەڤتی ب یاسا و رێنمایێن تایبەت هاتیە رێکخستن وباس ل گرنگیا وەرگرتنا مفاى ژ ئەزمۆنا وەلاتێ ئەلمانیا د ڤی بواری دا كر .

و ل دویڤ دا، هژمارەکا بابەتێن گرنگ هاتنە پێشکێشکرن کو پێك دهاتن ژ: چاڵاکیا World Cafe ل دۆر سێ کەیسێن جودا یێن پشكداریا هاوەلاتیان د ناڤ پلانێن حکومی دا، شیان ومەرجێن پشكداربوونێ د پرۆسەیا ئاڤەدانكرنێ دا، و دەرفەت و پێداویستییێن ڕاهێنانا پشكداربوونێ بۆ لایەنێن پەیوەندیدار ل کوردستانێ.

هەژی ئاماژەدانێ یە کو ئەڤ پرۆژە دێ بەردەوام بیت هەتا دوماهیا سالا ٢٠٢٥ .

راگەهاندنا زانكۆیا دهۆك، ٢٢ـی کانوونا ئێکێ، ٢٠٢٤

نيبارێ حاجی