زانكۆیا دهۆك – ٢٠٢٦ | نڤیسینگەها راگەهاندنا زانكۆیێ (UNPO) – كۆلیژا پزیشكی ل ٣١ـی چریا ئێكێ، ١٩٩٢، دگەل دامەزراندنا زانكۆیا دهۆك هاتیە دامەزراندن، و گەشە كریە بۆ ناڤەندەكا پێشەنگ یا خواندنا پزیشكی، ڤەكۆلین، و گەشەپێدانا پیشەیی ل هەرێما كوردستانێ.

كۆلیژ خواندنا پزیشكی پێشكێش دكەت كو دەرچوو ببنە نۆشدارێن شارەزا، ب گرنگیدانەكا زۆر ل سەر پێشئێخستنا زانیاریان، شیانێن كلینیكی، و بهایێن پیشەیی یێن پێدڤی بۆ خزمەتكرنا نەخۆشان و كۆمەڵگەهێ. ل ماوەیێ پتر ژ سێ دەیەیان، كۆلیژێ رۆلەكێ بەرچاڤ د سیستەمێ چاڤدێریا ساخلەمیێ یێ هەرێمێ دا هەبوویە ب رێیا پێگەهاندنا چەندین نڤشێن كادرێن پزیشكی.

نڤشەكێ نوی یێ نۆشداران

تا نوكە، ١٦٢٥ نۆشدار ژ كۆلیژا پزیشكی دەرچووینە، ژ وان ٧٦٤ دەرچوویێن كچ و ٨٦١ یێن كور. د سالا خواندنێ ٢٠٢٥-٢٠٢٦ دا، ١٠٨٢ قوتابی ل كۆلیژێ ل سەر شەش قۆناغێن خواندنێ هاتینە وەرگرتن، كو پێكهاتینە ژ ٤٩٦ كچان و ٥٨٦ كوران. ل ڤێ سالا خواندنێ، ١١٧ قوتابی—٦٢ كچ و ٥٥ كور—خواندنا خۆ یا پزیشكی ب دوماهی دئینن و خۆ بۆ چوونە ناڤ ژیانا پیشەیی بەرهەڤ دكەن.

دەرچوویێن كۆلیژێ ب رێیا كارێ خۆ ل نەخۆشخانە و دەزگەهێن دی یێن ساخلەمیێ پشكدار دبن د پێشئێخستنا كەرتێ ساخلەمیێ دا، د هەمان دەم دا زۆر ژ وان گەشەپێدانا خۆ یا پیشەیی ب رێیا خواندنا بسپۆریێ، باوەرنامەیا بۆردی، و خواندنا بلند ل زانكۆیێن ناڤخۆیی و ناڤدەولەتی بەردەوام دكەن.

بلندكرنا كوالیتیا خواندنا پزیشكی

كۆلیژێ ب بەردەوامی سیستەمێن خۆ یێن ئەكادیمی و پەروەردەیی پێشئێخستینە دا كو بەرسڤا پێدڤیێن ساخلەمیێ یێن هەردەم د گوهۆرینێ دا بدەت. پشكا پەروەردا پزیشكی ل سالا ٢٠١٦ هاتە دامەزراندن، دگەل گەشەپێدانا بەردەوام یا پرۆگرامێن خواندنێ، سەردەمیانەكرنا ژێدەرێن فێربوونێ، و بەرفرەهكرنا هەڤپشكیێن زانستی دگەل دامەزراوەیێن ناڤخۆیی و ناڤدەولەتی.

ژ سالا ٢٠٠٨ وەرە، كۆلیژێ سیستەمێن دلنیاییا جۆری و متمانەكرنێ ئێخستینە ناڤ پڕۆسەیا گەشەكرنا خۆ یا ئەكادیمی. و ژ سالا ٢٠١٨ وەرە، پرۆگرامەكێ ئێكگرتی یێ خواندنێ (Integrated Curriculum) ل سەر بنیاتێ سیستەمان جێبەجێ كریە، كو هاتیە دیزاینكرن بۆ هاریكاریكرنا قوتابیان دا بگەهنە ئارمانجێن فێربوونێ یێن سەرەكی و ببنە نۆشدار، پیشەكار، ڤەكۆلەر، و زانایێن لێهاتی.

ئەڤ بزاڤە بووینە ئەگەرێ وێ چەندێ كو كۆلیژێ متمانەكرنا تەمام ژ لایێ جڤاتا نیشتمانی بۆ متمانەكرنا كۆلیژێن پزیشكی (NCAMC) ل ١٠ـی ئیلۆنا ٢٠٢٣ بدەستڤە ئینا، و متمانەكرن تا ١٠ـی ئیلۆنا ٢٠٢٩ هاتیە درێژكرن. دانپێدان ب جڤاتا (NCAMC) ژ لایێ فیدراسیۆنا جیھانی یا پەروەردا پزیشكی (WFME) د شواتا ٢٠٢٤ دا، پێگەهێ ناڤدەولەتی یێ خواندنا پزیشكی و متمانەكرنێ ل عیراقێ ب هێزتر لێ كر.

دەنگێ قوتابیان: ژ قوتابیێن پزیشكی بۆ نۆشدارێن پاشەرۆژێ

بۆ قوتابیێن دەرچووی، سالێن وان ل كۆلیژێ گەشتەك بوو ژ فێربوونا زانستی، گەشەكرنا كەسایەتی، كارێ ب كۆم، و بەرهەڤكرن بۆ پیشەیەكێ كو خزمەتكرنا مرۆڤایەتیێ چەقێ وێ یە.

رەیان عەبدولعەزیز باس ل ئەزمۆنا خۆ ل كۆلیژێ كر، و دیار كر كو خواندنا وی یا پزیشكی هاریكاریا وی كریە بۆ ئاڤاكرنا كەسایەتیەك ب هێزتر و وەرگرتنا زانیاریێن زانستی. دگەل پێنگاڤ هاڤێژتن بەرەڤ كارێ پیشەیی ل نەخۆشخانان، پەیامەك بۆ قوتابیێن داهاتی راگەهاند و گۆت: "هەوە رێیەك درێژ و پر ل سەرڤە و خوارێ ل پێشیێ یە، بەلێ كارێ هەوە یێ مرۆڤایەتییە، لەوما هەمی شیانێن خۆ ب مەزێخن".

مازیار عادل پزیشكی وەك گەشتەك درێژ بەلێ ب مفا وەسف كر، و تەكەزی ل سەر شیانێن وێ بۆ ب ساناھیكرنا ژیانا خەلكی كر. دگەل دیتنا خۆ بۆ دەستپێكرنا ژیانا پیشەیی و بوون ب نۆشدارەكێ سەركەڤتی، خۆشحالیا خۆ بۆ وێ ئەزمۆن و زانیاریان دەربڕی كو د ماوەیێ خواندنا خۆ دا بدەستڤە ئیناینە.

بۆ محەمەد سەباح، ئێك ژ بەهادارترین لایەنێن خواندنا پزیشكی ئەوبوو كو ببیتە پشكەك ژ تیمەكی و گرنگیا كارێ ب كۆم فێر ببیت. دگەل بەرێخودانەكێ بۆ ژیانا كاری ل نەخۆشخانان و ئەگەرێن خواندنا بلند، قوتابیێن داهاتی هاندان كو شیانێن خۆ ب مەزێخن و باش بخوینن بۆ خزمەتكرنا خەلكی.

دەستخۆشی ل گەرا ٢٠٢٦

ئەم بانگهێشتیا دەرچوویان، خێزانان، دەرچوویێن كەڤن، قوتابیان و هەمی پێكهاتێن زانكۆیێ دكەین كو سەرەدانا گالەریا وێنەیێن دەرچوونا كۆلیژا پزیشكی بكەن و سەركەڤتن و بیرهاتنێن گەرا ٢٠٢٦ پیرۆز بكەن.

بۆ دیتنا گالەریا وێنەیێن دەرچوونێ ل ڤێرێ كلیك بكە

نڤیسینگەها راگەهاندنا زانكۆیێ، ٢٠٢٦

راپۆرت: دلدار حاجی موسا، فاطمە محمود عەلی

وێنەگرتن: عەلی حەبیب حەبیب، محەمەد ع. تاهر، هەرمان جانگیر ئەحمەد، مێهڤان م. سالح