زانکۆیا دهۆك، خزیرانا 2026 | نڤیسینگەها راگەهاندنا زانکۆیێ (UNPO)

دەرچوونا قۆناغەکا زانکۆیێ نیشانا تشتەکێ مەزنترە ژ ب دوماهی ئینانا خواندنا ئەکادیمی—ئەو نیشانا دەستپێکا گەشتەکا نویە ژ داهێنان، گەشەکرنا پیشەیی، و خزمەتکرنا جڤاکی. ئەڤ سالە، کۆلیژا هونەرێن جوان ل زانکۆیا دهۆك دەرچوونا کۆمەکا نوی ژ دەرچوویێن خودان شیان رادگەهینیت، کو حەزا خۆ یا هونەری کریە شارەزایی ێن پیشەیی و دەستکەڤتێن داهێنەرانە.

دەربارەی کۆلیژا هونەرێن جوان

کۆلیژا هونەرێن جوان ل زانکۆیا دهۆك (UOD) ل سالا 2023 بوویە کۆلیژەکا سەربەخۆ. رەهێن وێ ڤەدگەڕن بۆ سالا 2008، دەمێ کو پشکا درامایێ بۆ ئێکەم جار ل ژێر سەرپەرشتیا کۆلیژا ئادابێ هاتە دامەزراندن. پاشان، پشکێن هونەرێن شێوەکاری و میوزیکێ هاتنە ڤەکرن، کو دەلیڤەیێن خواندنا هونەری د ناڤ زانکۆیێ دا بەرفرەهتر کرن.

ئەڤرۆ، کولیژ ژ سێ پشکێن ئەکادیمی پێك دهێت:

* دراما

* هونەرێن شێوەکاری

* میوزیک

کۆلیژ زانیاریێن تیۆری ل گەل راهێنانێن پراکتیکی یێن چڕ تێکەل دکەت، و رێکێ ددەتە قوتابیان کو شیانێن خۆ یێن هونەری ب رێکا نمایش، پێشانگەهـ، ئاهەنگێن میوزیکی، و پڕۆژەیێن داهێنەرانە پێش بێخن. ب رێکا ڤێ نێزیکبوونێ، قوتابی شارەزاییا تەکنیکی و ئەزموونا جیهانا راستەقینە ب دەست ڤە دئینن بەری کو بچنە د ناڤ بازاڕێ کاری دا.

قۆناغا دەرچوویێن سالا 2025–2026

بۆ سالا خواندنێ یا 2025–2026، 29 قوتابی ژ پشکێن دراما و هونەرێن شێوەكاری دێ باوەرنامەیا بەکالۆریۆسێ وەرگرن.

دەرچوویێن کۆلیژا هونەرێن جوان بۆ کارکرنێ د کۆمەکا بەرفرەهـ ژ کەرتێن داهێنان و رەوشەنبیری دا هاتینە ئامادەکرن، ژ وان ژی:

* بەرهەمئینانا تەلەڤزیۆنی، راگەهاندن، و ناڤەڕۆکا دیجیتاڵی

* دیزاینا گرافیکی و پەیوەندیێن بینراو

* دیزاینا ناڤخۆیی و دیکۆراتا هونەری

* بەرهەمئینان و دەرهێنانا درامایێ

* نمایشا میوزیکی و چالاکیێن رەوشەنبیری

* پیشەسازیێن داهێنەرانە و کۆمپانیێن بەرهەمئینانا هونەری

* دامەزراوەیێن رەوشەنبیری یێن گشتی و تایبەت

گەلەك قوتابیان ژ نۆكە پۆرتفۆلیۆیێن پیشەیی ب رێکا پڕۆژەیێن دەرچوونێ ئامادەکرینە کو باس ل پرسێن جڤاکی یێن هەڤچەرخ دکەن و شیانێن وان یێن هونەری و تەکنیکی دیار دکەن.

دەنگێن قوتابیان: داهێنانا ب مەرەم

شیرین ئەیووب عومەر

قوتابیا قۆناغا چوارێ، پشکا درامایێ

دەربارەی ئەزموونا خۆ ل کۆلیژا هونەرێن جوان، شیرینێ گۆت:

"خواندنا درامایێ ل زانکۆیا دهۆك ئەزمۆنەکا گوهۆڕینێ بوو د ژیانا من دا. من نە ب تنێ تەکنیکێن نواندن و دەرهێنانێ زانین، بەلکو فێربووم کا چەوا وەکو پشكەك ژ تیمەکا داهێنەر کار بکەم، پڕۆژەیان بڕێڤە ببەم، و هزران ب شێوەیەکێ کاریگەر بگەهینم."

دەمێ پرسیار لێ هاتیە کرن دەربارەی ئارمانجێن وێ یێن پاشەڕۆژێ، وێ دیار کر:

"ئەز هێڤیدارم پشتی دەرچوونێ د بوارێ شانۆ و دەرهێنانێ دا بەردەوام بم. خەونا من ئەوە کو پشکداریێ د پێشخستنا هونەرێن نمایشی دا ل دەڤەرا مە بکەم و پشکدار بم د بەرهەمئینانێن پیشەیی دا کو کاریگەریەکا ئەرێنی ل سەر جڤاکی هەبیت."

دەربارەی وێ چەندێ کا ل هێڤیا چیە پشتی دەرچوونێ، وێ زێدە کر:

"ئەز یا ب جۆشم کو هەمی ئەو تشتێن ئەز فێر بوویم د ژینگەهێن کاری یێن راستەقینە دا ب کار بینم و بەردەوام بم ل سەر پێشخستنا شارەزاییێن خۆ یێن هونەری."

پەیاما وێ بۆ قوتابیێن داهاتی ئەڤەیە:

"د پرۆسەیا فێربوونێ دا د بێهنفرەهـ بن، پشکداریێ د هەمی دەلیڤەیێن بەردەست دا بکەن، و چ جاران بهایێ ئەزمۆنا پراکتیکی کێم نەنرخینن. چەند هوین پتر پشکدار ببن، هوسا هوین دێ پتر گەشە کەن."

سالم حوسێن سالم

قوتابیێ قۆناغا چوارێ، پشکا هونەرێن جوان

ل دۆر گەشتا خۆ یا زانکۆیێ، سالمی گۆت:

"کولیژا هونەرێن جوان هاریکاریا من کر دا کو ناسنامەیا خۆ یا هونەری ئاشکرا بکەم و نیشا من دا کا چەوا هزران ب رێکا ناڤگینێن بینراو یێن جودا دەرببڕم. راهێنانا پراکتیکی و رێنمایی یێن مامۆستایێن مە رۆلەکێ مەزن د پێشخستنا شیانێن من دا هەبوو."

دەربارەی پلانێن خۆ یێن پاشەڕۆژێ، وی ئاماژە پێ دا:

"حەز دکەم د بوارێن هونەرێن بینراو و دیزاینێ دا کار بکەم، ل گەل بەردەوامبوونێ ل سەر چێکرنا کارێن هونەری کو باس ل پرسێن جڤاکی و مرۆڤایەتی دکەن."

ئەو تشتێ کو پتر ژ هەمیان وی ب جۆش دئێخیت بۆ دەرچوونێ، ئەڤەیە:

"دەلیڤەیا چوونا د ناڤ جیهانا پیشەیی دا و خزمەتکرنا جڤاکی ب رێکا کارێن داهێنەرانە. دەرچوون نە دوماهیا فێربوونێ یە؛ بەلکو دەستپێکا قۆناغەکا نویە."

بۆ قوتابیێن داهاتی، سالمی شیرەت دا:

"بلا هوەو حەزا فێربووناا بەردەوام هەبیت، بەردەوام بن ل سەر تاقیکرنان، و ژ ئاستەنگان نەترسن. هەر پڕۆژەیەك تشتەکێ ب بها دەربارەی هەوە و پیشەیا هەوە هەوە فێر دکەت."

نیگار نەوزاد خەلیل

قوتابیا قۆناغا چوارێ، پشکا هونەرێن شێوەكاری

دەربارەی سالێن خواندنا خۆ ل زانکۆیا دهۆك، نیگارێ گۆت:

"ئەو دەمێ من ل کۆلیژا هونەرێن جوان بۆراندی، رێ ل بەر مِن ڤەکر کو ل سەر ئاستێ کەسایەتی و پیشەیی گەشە بکەم. ئەز فێر بووم کا چەوا هزر، هەست، و پرسێن جڤاکی وەربگێڕمە سەر دەربڕینێن هونەری کو بشێن پەیوەندیێ ل گەل جەماوەری دروست بکەن."

دەربارەی ئارمانجێن وێ یێن پیشەیی، وێ گۆت:

"من پلان دانایە کو بەردەوام بم وەکو هونەرمەندەکا شێوەكاری کار بکەم و پشکداریێ د پێشانگەهـ و دەستپێشخەریێن رەوشەنبیری دا بکەم. هەروەسا حەز دکەم دەلیڤەیان د بوارێ دیزاین و پیشەسازیێن داهێنەرانە دا ب کار بینم."

دەمێ لێ هاتیە پرسین کا ل هێڤیا چیە پشتی دەرچوونێ، نیگارێ بەرسڤ دا:

"ل هێڤیا وێ چەندێ مە کو کارێن خۆ ل گەل جەماوەرەکێ بەرفرەهتر پارڤە بکەم و پیشەیەکێ ئاڤا بکەم کو داهێنان، پەیوەندیکرن، و کاریگەرییا جڤاکی تێکەل دکەت."

شیرەتا وێ بۆ قوتابیێن داهاتی ئەڤەیە:

"باوەری ب شیانێن خۆ هەبیت و باوەریێ ب دەنگێ خۆ یێ داهێنەرانە بینن. زانکۆ بنیاتی ددەتە هەوە، لێ پابەندبوون و حەزا هەوەیە کو پاشەڕۆژا هەوە دروست دکەت."

دەستخۆشی دەستکەڤت و پێشکەڤتنا هونەری

د دەمەکێ دا کو ئەندامێن خێزانێ، هەڤال، مامۆستا، و قوتابی كەیفخۆشن ب ڤی قۆناغا گرنگن، قۆناغا دەرچوویان میراتەکی ژ دەستکەڤتێن هونەری ل دویڤ خۆ دهێلن، د هەمان دەم دا خۆ ئامادە دکەن کو پشکداریێ د کەرتێن رەوشەنبیری و داهێنانێ دا ل هەرێما کوردستانێ و ژ دەرڤەی وێ بکەن.

ئەم داخوازێ ژ دەرچوویان، قوتابیێن نوی، و ئەندامێن جڤاکی دکەین کو تەماشەی گەلەرییا وێنەیێن دەرچوونێ بكەن.

ڤێرە کلیک بکە بۆ دیتنا وێنەیێن دەرچوونێ

نڤیسینگەها راگەهاندنا زانکۆیێ، 4ـی خیرانێ 2026

راپۆرت ژلایێ: فاطمە محمود عەلی، هەلکەت ئدریس