ئەڤرۆ رێکەڤتى ٣١ـى تیرمەها ٢٠٢٤ـێ ل سەنتەرێ کۆنفرانسان ل زانکۆیا دهۆک، و د کونگرەکێ رۆژنامەڤانى دا، ئەنجامێن پێنج ڤەکۆلینێن گرنگ ژ لایێ د. داود سلێمان ئەتروشى سەرۆکێ زانکۆیا دهۆک ڤە هاتنە راگەهاندن.

ل دەستپێکا کونگرێ رۆژنامەڤانى، سەرۆکێ زانکۆیا دهۆک راگەهاند، "جڤاک پشکەکا گرنگە ژ سیاسەت و پلانا ستراتیژى یا زانکۆیا دهۆک، ژ بەر ڤێ چەندێ ژى زانکۆیا دهۆک بریاردایە هەر پشکەکا زانستى ل زانکۆیا دهۆک ل دویڤ تایبەتمەندیا خۆ ب رێکا ئەنجامدانا ڤەکۆلینا کار ل سەر دەستنیشانکرن و دیارکرنا وان ئاریشێن د ناڤ جڤاکی دا هەىن بکەت، ل گەل پێشکێشکرنا چارەسەریان.

ل دویڤ دا، سەرۆکێ زانکۆیێ داخواز ژ ڤەکۆلەران کر ڤەکۆلینێن خۆ د ڤى کونگرێ رۆژنامەڤانى دا بدەنە نیاسین و هەر ڤەکۆلەرەک ب کورتى باس ل ئەنجامێن ڤەکۆلین و خۆ بکەت.

پاشى، د. صابر زیباری، ژ سەنتەرێ ڤەکۆلینێن پەروەردەیی ل زانکۆیا دهۆک، باس ل ڤەکۆلینەکا مەیدانی بۆ پشتراستکرنا هویری و راستگۆییا رێژا راگەهاندی یا نەخویندەواریێ ل پارێزگەها دهۆکێ کر.

هەروەسا د. رێنجبەر جەمیل شێخۆ، ژ سەنتەرێ ڤەکۆلینێن یاسایی و رامیاری ل کۆلیژا یاسا، باس ل ئەنجامێن راپرسیەکێ کر ل دۆر هەلبژارتنێن داهاتی یێن پەرلەمانێ کوردستانێ کو ب هەڤکاری ل گەل رێکخراوا (STEP) هاتبوو ئەنجامدان، هەر دیسا کورتیەک ل دۆر ڤەکۆلینەکا ل دۆر دیاردا ماددێن بێهوشکەر د ناڤبەرا ئەگەر و مەترسی و چارەسەریان دا پێشکێشکر.

هەروەسا ڤەکۆلینەک ژ لایێ د. شڤان احمد محمد و د. نەبەز ابراهیم محمد، ل دۆر سەرکێشیا کاری و دروستکرنا پرۆژێن تایبەت ژ لایێ قوتابیێن زانکۆیان ڤە، هاتیە ئەنجامدان بۆ دەزگەهێن راگەهاندنێ هاتە باسکرن.

ل دویماهیێ ژى، ئەگەرێن رویدانێن ترافیکی و چەوانیا کێمکرنا وان ب رێکا بکارئینانا رێبەرێ سلامەتیێ ل جاددەیان، کو ڤەکۆلینەکە ژ لایێ گرۆپەکێ دەرچوویێن کۆلیژا ئەندازیاری ل زانکۆیا دهۆک هاتیە بەرهەڤکرن، ژ لایێ ئەندازیار شرین سەلام ڤە هاتە پێشکێشکرن.

هەژى ئاماژێ یە، د ئەڤ سالە دا ل زانکۆیا دهۆک، ٤٦ ڤەکۆلین و پرۆژێن زانستیێن گرنگ ل دۆر ئاریشە و دیاردەیێن جودا یێن جڤاکی هاتینە ئەنجامدان، هەروەسا ژ لایێ ڤەکۆلەران ڤە چارەسەرى ژى هاتینە پێشکێشکرن.

بۆ دیتنا کونگرێ رۆژنامەڤانى و زانییاریێن زێدەتر سەرەدانا لینکێ ل خوارێ بکە:

https://youtu.be/F6WJKvpaq3I?si=HcRrE3S_Tj7MblOj

راگەهاندنا زانکۆیا دهۆک: ٣١ـى تیرمەهێ ٢٠٢٤

حسێن تتمی

فۆتۆ: محەمەد عەبدولکەریم