ب مەرەما زانستیکرنا بیستانکاریێ، کولیژا چاندنێ و ب سپۆنسەریا رێکخراوا نۆفیک و ب هەڤکاری دگەل زانکۆیا بەسرا و زانکۆیەکا ئوردونی و ب پشکداریا هژمارەکا رێکخراوێن هۆلەندی و هژمارەکا ئەندازیاران ژ کولیژا چاندنێ یا زانکۆیا دهۆک، ئەڤرۆ وۆرکشۆپا شەشێ لدۆر دانانا سیستەمەکێ ئەکادیمی یێ نوی د بوارێ بیستانکاریێ دا هاتە سازکرن و بۆ ماوێ پێنج رۆژان دێ بەردەوام بیت، ئەڤ وۆرکشۆپە د چارچۆڤێ پرۆگرامەکی دایە کو د سالەکێ دا، دەهـ وۆرکشۆپ دێ هێنە ئەنجامدان.

د. رۆفائێل شلیمون تۆما سەرۆکێ پشکا بیستانکاری ل کولیژا چاندنێ یا زانکۆیا دهۆک دیارکر کو "د ڤی پرۆژەی دا کاروبارێن ئەکادیمی یێن بیستانکاریێ دێ کەینە کەتوارێ دروست یێ چاندنێ و ل ناڤ بیستانێن پارێزگەها دهۆکێ و هەمی قەزایا مە بجهئینایە و سەرکەڤتیانە برێڤەچوویە".

ناڤبری باس ل ڤەکۆلینێن خۆ کر و نموونا پتاتێ ئینا کو شیاینە پتاتا خوارنێ و فینگەر چپسا بکەنە جۆرەکێ نوی یێ پتاتا و ل دهۆک بچینن، هەروەسا باس ل قەبارێ بەرهەمئینانا پتاتا سالانە ل دهۆکێ کر، کو دێ ل هندەک پارچێن دی یێن عیراقێ ژی بجهئینن، ژ وان ئەبۆ غورێب و بەسرا، و ل قۆناغێن بهێت ژی دێ بەرهەمێن نویتر هەبن.

پشکا بیستانکاری، ئێک ژ پشکێن زانستی یێن هەرەگرنگێ کولیژا چاندنێ یە ل زانکۆیا دهۆک، ل سالا ١٩٩٢ێ و دگەل دامەزراندنا زانکۆیێ؛ هاتیە دامەزراندن و ل دەستپێکێ ناڤێ وێ پشکێ بەرهەمئینانا چاندنێ بوو. ل سالا ٢٠٠١ێ ناڤێ وێ بوو پشکا بیستانکاری، کو ژ ۳٤ مامۆستایان پێکدهێت و پتر ژ ۲٥۰ قوتابیا سالانە لێ دهینە وەرگرتن.