ب ئامادەبوونا سەرۆکێ زانکۆیا دهۆک د. داوود سلێمان ئەترووشی و هەردوو هاریکارێن سەرۆکێ زانکۆیێ، د. لوقمان هادی حەسەن و د. مێڤان عارف بادی، پۆستێ رێڤەبەریا پەرتووکخانا ناڤەندی یا زانکۆیا دهۆک هاتە گوهارتن. د روینشتنەکێ دا سەرۆکێ زانکۆیا دهۆک ب ناڤێ سەرۆکاتیا زانکۆیێ سوپاسیا د. سالح محەمەد حەسەن رێڤەبەرێ پێشی یێ پەرتووکخانا ناڤەندی کر و پیرۆزباهی ل رێڤەبەرا نوی د. جیهان عەبدلعەزیز ئەحمەد کر.

د. داوود ئەترووشی باس ل گرنگیا پەرتووکخانا ناڤەندی و چەوانیا پتر پشتەڤانی و پێشڤەبرنێ کر و دیارکر "سەرۆکاتیا زانکۆیا دهۆک پشتەڤانە بۆ پێشڤەبرن و پتر مۆدێرکرنا پەرتووکخانا ناڤەندی، لەورا بەری نوکە لیژنەیەکا تایبەت بۆ پێشڤەبرنا پەرتووکخانا ناڤەندیا زانکۆیێ هاتە پێکئینان و کەتوارێ نوکەیێ پەرتووکخانێ هاتە ڤەکۆلین و رێ و شێوازێن هەڤچەرخکرنێ هاتنە دەستنیشانکرن"، هەروەسا سەرۆکێ زانکۆیا دهۆک گۆت: "دەستخۆشیێ ل د. سالح محەمەد حەسەن دکەین کو د ماوێ بۆری دا، دلسۆزانە ب ئەرکێ رێڤەبرنا پەرتووکخانێ رابووی، هەر ماندیبوونەک پێشچاڤە".

د. سالح، رێڤەبەرێ بەری نوکە یێ پەرتووکخانا ناڤەندی بەرهەڤیا هەر پشتەڤانیەکێ بۆ رێڤەبەرا نوی یا پەرتووکخانێ دیارکر و گۆت: "گوهۆرین ساخلەمیا رێڤەبرنێ ددەتە دیارکرن و یا پێدڤی، د ماوێ بۆری دا مە پێشکێشکر و ب هەمی رەنگا بەرهەڤین پشتەڤانیا رێڤەبەرا نوی یا پەرتووکخانێ بکەین بۆ پتر پێشڤەبرنێ".

سەرۆکێ زانکۆیا دهۆک پشتی دەستخۆشیێ ل رێڤەبەرێ پێشی یێ پەرتووکخانا ناڤەندی و پیرۆزباهی و داخوازیێن سەرکەڤتنێ ل رێڤەبەرا نوی، دیارکر "دەرئەنجامێن لیژنا پێشڤەبرنا پەرتووکخانێ و راسپاردێن رێڤەبەرێ پێشی یێ پەرتووکخانێ و پلانا رێڤەبەرا نوی، دێ پەرتووکخانا ناڤەندیا زانکۆیێ پتر هەڤچەرخ و مۆدێرن کەن".

هەژی ئاماژێ یە زانکۆیا دهۆک دیدەیەکا نوی بۆ پەرتووکخانا ناڤەندی هەیە و بزاڤ دهێنە کرن کو سیستەمێن نوی یێن پێشکێشکرنا خزمەتێن ژێدەرێن زانینێ ل پەرتووکخانا ناڤەندی یا زانکۆیا دهۆک بهێنە پەیرەوکرن، ئەڤ گۆرانکاریە ژی پرۆسێسەکا ئاسایی یا پتر نویکرن و پێشڤەبرنێ یە کو زانکۆیا دهۆک پەیرەودکەت.