لاوێ كورد دناڤبەرا كەتوار و هیڤیان دا د پەنەلەكی دا ل زانكۆیا دهۆك هاتە گەنگەشەكرن
ناڤەندا بالا دهۆك یا ئێكەتیا لاوان ب هەڤكاری دگەل زانكۆیا دهۆك، ئەڤرۆ رێکەڤتی 14/2/2022 ل ناڤەندا قوتابیان پەنەلەك لژێر ناڤێ (لاوێ كورد دناڤبەرا كەتوار و هیڤیان دا) ب پشكداریا چوار پەنەلێستان ئەنجامدا و تێدا ئەڤ چوار بابەتە هاتنە باسكرن (رۆلێ رێكخراوان د پێگەهاندنا لاوان دا، كارتێكرنا گۆتارێن جودا لسەر گەنجان، لاو و فەلسەفە و لاو و ئابوور).
مەیسەر عوبەید سكرتێرێ ئێكەتیا لاوێن دیموكراتا كوردستانێ د بابەتێ خۆ دا باس ل رۆلێ رێكخراوان د پێگەهاندنا لاوان دا كر و دیاركر كو ئەو رێكخراوێن نوكە ل كوردستانێ د بیاڤێ پێگەهاندن و گەشەكرنێ دا كاردكەن بتنێ 35% كارا و ئەكتیڤن، ئەوێن دیتر كارناكەن.
ژ لایێ خۆ ڤە، عسمەت خابوور مامۆستایێ زانكۆیێ، شرۆڤەکرنەک دا كارتێكرنا گۆتارێن سیاسی، جڤاکی و رەوشەنبیری لسەر گەنجان و گۆت: "وەكو پێدڤی دەرفەت بۆ گەنجان نەهاتیە دان كو شیانێن وان دیارببن، وەها لێهاتیە کو رەفشتێ بەری نوکە مفای ژ کەدا گەنجی ببینیت، هەتا كورسیكا گەنج نەكەن؛ هەست ب ئاستەنگێن گەنجا ناهێتە كرن".
د. موئەیەد بەرەكات باس ل بابەتێ لاو و فەلسەفە كر و پتر گرنگی دا سەر هزرا گەنجان و گۆت: "پێدڤیە پتر فۆكوس بكەڤیتە سەر هزرا گەنجی كا بەرەڤ كیڤە دچیت، كو كەلتۆر هندەك هزرا لسەر د سەپینیت و کەتوار ژی هندەکا، ژ بەر هندێ ژی گەلەك جاران دێ بینی د واقعی دا ناژیت، لەورا یا فەرە بزانین کو فەلسەفا ژیانێ خۆشی و نەخۆشی نە.
بابەتێ دویماهیێ ژی یێ گرێدای لاو و ئابووری بوو كو ژلایێ كاوە عەبدولعەزیز ڤە هاتە پێشكێشكرن، ناڤبری باس ل کاریگەریا لایەنێ ئابووری کر و گۆت: " پتریا كێشە و گرفتێن گەنجان، كێشێن ئابوورینە و چارەسەركرنا وان ژی هەر ئابووری نە، ژبەر هندێ ژی كلیلا كێشە و چارەسەریێ دێ هەر ئابوور بیت".
ل دویماهیا پەنەلی قوتابی و لاوێن ئامادەبووی پرسیار و تێبینی و پێشنیاز پێشکێشی پەنەلیستان کرن، کو پتریا وان گرێدای ئاریشەیێن گەنجان بووینە، ئەڤ یەکە ژی بۆ ئەگەرێ پەیدابوونا دانوستاندنێن فراوانتر لدۆر بابەتێ پەنەلی.