پشتی لیژنا تایبەتا وەزارەتا خواندنا بلند و ڤەکۆلینێن زانستی چاڤپێکەڤتن دگەل ١٠٣ بەربژارێن ٢٢ پۆستێن کارگێرییێن زانکۆیا دهۆک ئەنجامدای، ئەڤرۆ رێکەڤتی ٢٠٢٢/٢/١٥ لیژنا ناڤبری ئەرکێ خۆ بدویماهی ئینا. ئەڤ پرۆسێسە ب ئاوایەکێ رێکخستی و پلانکری برێڤەچوو، کو ل دەستپێکێ پۆرتالەکێ تایبەت بۆ پێشکێشکرنێ ژ لایێ زانکۆیا دهۆک ڤە هاتبوو دروستکرن و هەر بەربژارەک ب ژڤان و جهێ چاڤپێکەڤتنێ هاتبوو ئاگەهدارکرن و د ماوێ سێ رۆژێن بەردەوام دا و د سەقایەکێ زەلال و ئارام دا چاڤپێکەڤتن دگەل بەربژارێن ڤان پۆستان ل سەنتەرێ کۆنفرانسان ل زانکۆیا دهۆک هاتنە ئەنجامدان.

لدۆر چەوانیا برێڤەچوونا پرۆسێسا چاڤپێکەڤتنێ و قۆناغا پشتی ڤان چاڤپێکەڤتنان، د. داوود سلێمان ئەترووشی، سەرۆکێ زانکۆیا دهۆک و ئەندامێ لیژنا ناڤبری گۆت: "ئەڤ پرۆسێسە گەلەکا سەرکەڤتی بوو و گەلەک رێکخستی و سەردەمیانە برێڤەچوو، پشتی پرۆسێسا چاڤپێکەڤتنێ بدویماهی هاتی؛ لیژنە دێ راسپاردێن خۆ پێشکێشی وەزیرێ خواندنا بلند و ڤەکۆلینێن زانستی کەت، پشتی پەسەندکرنێ، ئەو ناڤ دێ هێنە ئاراستەکرن بۆ ئەنجومەنێ وەزیران، داکو بریارا دویماهیێ لسەر بهێتە دان، هیڤیدارین پرۆسێسا بریاردانا دویماهیێ زوی برێڤەبچیت".

دهێتە زانین کو هژمارەکا مەرجان بۆ هەلبژارتنا بەربژاران بۆ ڤان پۆستێن کارگێری ل زانکۆیا دهۆک هاتبوونە دەستنیشانکرن، ژ وانا؛ سالێن شارەزاییێ، هژمارا ڤەکۆلینێن بەلاڤکری، دید و بۆچوون بۆ پتر نویکرن و پێشڤەبرنێ و سالۆخەتێن سەرکردایەتیێ.

هەژی گۆتنێ یە کو ئالوگۆرکرنا پۆستێن کارگێری پرۆسێسەکا نۆرمالە و زانکۆیا دهۆک ب مەرەما پتر نویکرن و پێشڤەبرن و ئەنجامدانا گۆرانکاریێن بەردەوام گرنگیێ پێ ددەت. لدۆر خواستێن سەرۆکاتیا زانکۆیێ بۆ جڤاتا پاشەرۆژی یا زانکۆیا دهۆک، د. داوود ئەترووشی گۆت: "ئەم هیڤیدارین جڤاتا نوی یا زانکۆیا دهۆک یا هزرڤەکری بیت، ژبلی کارێ رێڤەبرنێ، سەرکردە بن و بەرنامەیێن پێشڤەبرنێ لدویڤ سیاسەتا زانکۆیێ هەبن و د کولیژێن خۆ دا ئەنجامبدەن".