ئەڤرۆ رێکەڤتی ٢٠٢٢/٣/٥، د. داوود ئەترووشی، سەرۆکێ زانکۆیا دهۆک دگەل بەرپرسێ لقێ دهۆک یێ فیدراسیۆنا نیڤدەولەتی یا قوتابیێن پزیشکی IFMSA و هژمارەکا دی یا قوتابیێن کولیژا پزیشکی ل زانکۆیا دهۆک کۆمبوو. د کۆمبوونێ دا دانوستاندن لدۆر بهێزکرنا پەیوەندیا و کارێن هەڤپشک و پرۆژەیێن پاشەرۆژی یێن گونجای دگەل دید و پلانێن نوی یێن زانکۆیا دهۆک هاتنە کرن.

د کۆمبوونێ دا سەرۆکێ زانکۆیا دهۆک باس ل گرنگیا نێزیکیێ د ناڤبەرا پزیشک و بسپۆرێن بوارێ ساخلەمیێ و جڤاکی دا کر، لدۆر گرنگیا هوشیاریا ساخلەمی دیارکر "هوشیاریا ساخلەمیێ بۆ هەر تاکەکێ جڤاکی گرنگە، نابیت بسپۆرێن ڤی بواری بتنێ خزمەتێن چارەسەریێ پێشکێشبکەن، بەلکو پێدڤیە ئارمانجا وان ئەو بیت کو هوشیاریا ساخلەمیێ لدەف زۆربەیا وەلاتیان بلندبیت وبشێن هند ساخلەمیا خۆ بپارێزن کو زوی ب زوی پێدڤی کلینیک و نەخۆشخانا نەبن".

ژ لایێ خۆ ڤە د. ئوسامە عەبدوللا، بەرپرسێ لقا دهۆک یێ رێکخراوا IFMSA باس ل پرۆژێن پاشەرۆژی یێن رێکخراوێ و پشتەڤانی و هەڤکاریا زانکۆیا دهۆک کر دیارکر کو هشیاریا ساخلەمیێ و بلندکرنا ئاستێ قوتابیێن ڤی بواری ئارمانجا سەرەکیا وانە.