٢٧ـی تەباخا ٢٠٢٦، نڤیسینگەها راگەهاندنا زانکۆیێ | ب خۆشحالی ڤە رادگەهینین کو زانکۆیا دهۆک پشکداری کەمپینا جیهانی یا ژینگەهپارێزیێ یا (Ecosia) بوو، و ب ڤێ چەندێ زانکۆیێن کوردستانێ (زانکۆیا زاخۆ، پەیمانگەها پۆلیتەکنیک ل زاخۆ، زانکۆیا ئەمریکی ل سلێمانیێ، و نوکە زانکۆیا دهۆک) دبنە ئێکەمین زانکۆ ل سەر ئاستێ ڕۆژهەڵاتا ناڤین کو پشکداری ڤێ کەمپینێ دبن.

ئیکۆسیا (Ecosia) بزوێنەرەکێ لێگەڕیانێ یە (Search Engine) کو ب ڕێیا لێگەڕیانێن بکارهێنەران یێن رۆژانە ل ئینتەرنێتێ دار دهێنە چاندن. ب ئەنجامدانا هەر ٤٥ لێگەڕیانان (بۆ نموونە: لێگەڕیان بۆ کرینا پەرتووکان یان هەر تشتەکێ دی)، دارەک ل وەلاتەکی ل سەرانسەری جیهانێ ب ناڤێ کوردستانێ دێ هێتە چاندن. هەر چەند سەرەدانێن مە ب ڕێکا لینکێ تایبەت یێ گرێدای ب کوردستانێ ڤە زێدەتر ببن، دێ پتر دار ب ناڤێ کوردستانێ هێنە چاندن و خزمەتا ژینگەهێ هێتە کرن.

سەبارەت ب بەرنامەیێ کەمپینێ ل زانکۆیا دهۆک، تیمێ ئیکۆسیا دێ ستافێ خۆ کۆم کەت و سمیناران ل سەر ئاستێ هەمی کۆلێژان پێشکێش کەت بۆ دانەناسیا پرۆژەی. هەروەسا دێ مێزێن زانیاریان هێنە دانان بۆ هۆشیارکرنێ ل سەر بابەتێ پەنجەمۆرا کاربۆنی (Carbon Footprint) و نیشاندانا ڕێکەکا دیجیتاڵی بۆ مامۆستا و قوتابیان کا دێ چەوا ب ڕێکا لێگەڕیانێن ئینتەرنێتێ داران چینن. د هەمان دەم دا، دێ ڤیدیۆیێن تایبەت بۆ مالپەڕ و سۆشیاڵ میدیایا زانکۆیێ هێنە دروستکرن ب هەڤکاری دگەل مالپەڕێ کەمپینێ ل سەر ئاستێ کوردستانێ.

بۆ ڤێ مەرەمێ، ئەم دێ تیمەکێ خۆبەخش کۆمڤە کەین دا کو ژمارەیەکا باش یا قوتابی و مامۆستایان ببنە ئەندام، و ل دوماهیا کەمپینێ باوەرنامە دێ ب سەر ڤی ستافی دا هێنە دابەشکرن. ئەڤ کەمپینە دێ ل زانکۆیا دهۆک بەردەوام بیت و کۆلێژ ب کۆلێژ دێ هێتە بڕێڤەبرن هەتا ب دوماهی دهێت.

داخوازێ ژ هەمی ستافێ ئەکادیمی، کارگێڕی و قوتابیان دکەین کو ڤی لینکێ ل خوارێ (ئەپلیکەیشنێ ئیکۆسیا) دابەزینن و بۆ هەمی لێگەڕیانێن خۆ بکاربینن، دا کو پێکڤە ب ڕێیا دیجیتاڵی خزمەتا ژینگەها جیهانێ بکەین و ناڤێ کوردستانێ ل جیهانێ دیارتر بکەین.

ئەڤە لینکێ تایبەت یێ کوردستانێ یە، ژ ڤێرە دابەزینە:

https://ecosia.co/krd

نڤیسینگەها راگەهاندنا زانکۆیێ ٢٧ـی تەباخا ٢٠٢٦