ب ئامادەبوونا سەرۆكێ زانكۆیا دهۆك وهاریكارێن سەرۆكی و رێڤەبەرێن پشكێن كارگیری و راگر و مامۆستایێن كۆلیژێن زانكۆیێ وهەروەسا مێهڤانێن ژ دەرڤەی زانكۆیێ ژ جێگرێ پارێزگارێ دهۆكێ  نوینەرێن ژمارەکا زانکۆیان ل هەرێمێ و نوینەرێن سازیێن میری ل پارێزگەها دهۆکێ، زانکۆیا دهۆک سەرکەڤتنا خۆ یا سێ سالیا بكارئینانا سیستەمێ ئەلیكترونیێ رێڤەبرنا زانكۆیێ، eUMS، راگەهاند د چالاكیەكێ دا كو ل سەنتەری كۆنفرانسان برێڤەچوو ل 7ـی كانوونا دووێ، 2025.

 ل دستپێکێ، سەرۆکێ زانکۆیا دهۆک، د. داوود سلێمان ئەتروشی، پشتی بخێرهاتنا مێهڤانا و سوپاسیا ستافێ سەرئێخستنا سیستەمێ eUMS  كری، پەیڤەک پێشکێش کر وتێدا گۆت: "ئەڤە نە بتنێ راگەهاندنەکە و سەرکەڤتنەکە بۆ زانکۆیا دهۆک بەلکۆ مەرەم ژێ پرۆژەکێ ستراتیژیە پێدڤیە هەمی سازیێن ئەكادیمی و پەروەردەیی و حکومی ونە حکومی پەیرەوكەن، چونکە گەنج و نفشێ نۆكە یێ د ناڤ سەردەمێ دیجیتالی دا دژیت، پێدڤیە ئەم خۆ دگەل قوتابیێ نوی بگونجینین."

هەر دیسان باسی سالۆخەتێن باش یێن سیستەمێ eUMS یێ زانکۆیا دهۆک کر کو سێ سالە سەر برێڤە دچیت، د. داوود ئەتروشی دیاركر: "کاروبار لەزتر برێڤە دچن ودگەهن، روتین زۆر کێمترە، کار زۆر زەلالترە وبەرچاڤترە، دیسان کۆمکرنا داتایان و دۆکیومێنتکرن ب ئێک کلیکە."

دهێتە زانین کو ل دەستپێکا رێڤەبرنا نوی یا زانکۆیا دهۆک بەری سێ سالا تەکەز ل سەر ڤی پرۆژێ دیجیتالکرنا رێڤەبرنا زانکۆیێ هاتیە كرن. پشتی ڤەکۆلین و کارێ رژد پرۆژە هەر زوی کەڤتە کاری.

ل دویڤ دا، هاریکارێ سەرۆکێ زانکۆیا دهۆک، د. لقمان هادی حەسەن، کو سەرپەرشتێ پرۆژەی یە، د پێشكێشكرنەكێ دا، شرۆڤەکا تێر و تەسەل دا هەمی پرۆژەی وهەمی سەکتەران و باس كر: "پرۆکرام یێ دیجیتاڵیە د ناڤبەرا مامۆستا وقوتابی و بەرۆڤاژی، دیسان مامۆستا و راگریا کولیژێ ومامۆستا وکارگیریا زانکۆیێ وهەمی رێڤەبەریێن زانکۆیێ پێکڤە گرێددەت ول ئێک نێزیک دکەت و کاری سڤک و ئاسان دکەت وخزمەتا پروسێسا خواندنا ئەکادیمی بۆ قوتابیێن زانکۆیێ وقوتابیێن خواندنا بلند وهەمی ستافێ زانکویێ دكەت."

 ناڤبری درێژی دا پێشكێشكرنێ و باس ل ئاسانیا کۆمکرنا داتایان کر، دیسان دیاركر كو قوتابی دشێت هەمی زانیاریان بدەستخۆڤەبینیت بێ کو سەرەدانا جهەکی بکەت وەك ژڤانێن ئەزمۆنان و نمرە و نەئامادەبوونا خۆ، و هەر تشتەكێ دیێ گرێدایی پرۆسەیا خواندنێ بۆ قوتابی دهێتە هنارتن. دیسان، قوتابی دشێت راستەوخۆ بچیتە ناڤ پەرتووکخانا ناڤەندی دا پەرتووكان دەستنیشان كەت و تۆمارکەت وبزڤرینت. ژ لایەكێ دی ڤە، ماموستا دشێن پلانا خو یا ئەکادیمی وزانستی دارێژن وپێشکێشی راگریێن كۆلیژان و قوتابیان بکەن.

 هەر د ڤێ هەلکەفتێ دا، روینشتنەکا گەنگەشێ، هاتە سازکرن ب رێڤەبەریا د. شهین عبدوللا، و پشكداریا د. ئیسماعیل ئەمین، سەرۆكێ پێڤاژۆیا بۆلۆنیا و پەرەپێدانا پرۆگرامی ل زانكۆیا دهۆك، و د. هەڤال یوسف، سەرۆكێ پێڤاژۆیا بۆلۆنیا ل كۆلیژا زانست، و د. گۆدار جادر ئیبراهیم، رێڤەبەرێ جێبەجێكارێ  كۆمپانیا AWROSOFT ICT Solutions یا كو زانكۆیا دهۆك هەڤكاری دگەل كری ژبۆ پرۆگرامكرنا سیستەمێ ئەلیكترونی بۆ زانكۆیێ. ل دەسپتێکی، د. گۆدار جادر باسی ڤی سیستەمی کر وچەوانیا رێڤەچوونا ڤێ پروسێسێ وچەوانیا چارەسەرکرنا ب لەز یا هەر شاشیەکێ یان ژی ئاستەنگەكێ یا كو رووبرروی بكارئینانا سیستەمی بیت.

د. ئیسماعیل ئەمین ژی باس ل سالوخەتێن سەرکەفتی یێن سیستەمێ eUMS کر  ژوانا ژی کێمکرنا رۆتینی د مامەلێن رۆژانە دا و زەلالیا کاری و سڤکرنا کارێ ماموستای و بەردەستكرنا داتایێن باش و راستەقینە بۆ قوتابیان.

و ژ لایێ خۆ ڤە، د. هەڤال یوسف ب پێشكێشكرنەكێ شرۆڤەک بو ئامادەبوویان دا دیاركرن ل دۆر چەوانیا ئەنجامدانا کاری د ناڤ سیستەمێ eUMS و تەكەز ل سەر گرنگیا ڤێ پروسێسێ  كر بو پێڤاژۆیا بۆلۆنیا.

 ل دوماهیا ڤێ روینشتنی ژی، دانوستاندنێن ئاڤاكەر د ناڤبەرا ئامادەبوویان و بەرپرس وسەرپەرشتێن ڤی سیستەمی برێڤەچوون.

بۆ دیتنا گۆتارا سەرۆكێ زانكۆیا دهۆك، لینكێ ل خوارێ كلیك بكە:

https://www.youtube.com/watch?v=ePYqlshoM2Y

بۆ دیتنا پێشكێشكرنا هاریكاری سەرۆكێ زانكۆیێ، د. لوقمان هادی، لینكی ل خوارێ كلیك بكە:

https://www.youtube.com/watch?v=4JWeGCXO0js

بۆ دیتنا وێنەیێن ئاهەنگێ لینکێ ل خوارێ کلیک بکە:

https://drive.google.com/drive/folders/1kqyTx2Tcnqrwpd5woeFDEj-jpQmDHjpz?usp=sharing

بۆ زانیاریێن زێدەتر  ل دور سیستەمێ ئەلکترونیێ رێڤەبرنا زانکۆیێ لینکێ ل خوارێ کلیک بکە:

https://youtu.be/8ljmzM42dI4?si=p2Jqrv19iT4nhlyW

راگەهاندنا زانكۆیا دهۆك، 8ـی كانوونا دووێ، 2025

سەباح ئەترۆشی

فۆتۆ: مەحەمەد عەبدولكەریم، عەلی بانكی