مامۆستایەکێ زانکۆیا دهۆک بۆ سەرۆکاتیا کۆمارا عیراقێ خۆ بەربژارکر
مامۆستایێ کولیژا پزیشکی ل زانکۆیا دهۆک پرۆفیسۆر د. کەمال عەزیز قەیتولی بۆ جارا دووێ بەربژارکرنا خۆ بۆ سەرۆکاتیا کۆمارا عیراقا فیدرال راگەهاند، کو ل سالا ٢٠١٨ ژی بۆ هەمان پۆست خۆ بەربژارکربوو.
د. کەمال عەزیز قەیتولی ل سالا ١٩٥٤ ل بەغدا ژدایکبوویە و ل سالا ١٩٧٢ خواندنا ئامادەیی ل وی باژێری بداوی ئینایە و ل ١٩٧٦ باوەرناما بەکالۆریۆسێ ل پشکا کیمیایێ ل زانکۆیا بەغدا وەرگرتیە. پاشی ب مەرەما تمامکرنا خواندنێ، بەر ب وەلاتێ بریتانیا چوویە و ل سالا ١٩٧٨ ماستەر ب زانستێن پراکتیکی و ل ١٩٨٢ دکتۆرا ب کیمیایا پزیشکی ل زانکۆیا گلاسکۆ وەرگرتینە.
ل ١٩٨٢ تا ١٩٩١، وەکو ڤەکۆلەر ل زانکۆیا گلاسکۆ کارکریە، پاشی بوویە شیرەتکارێ ساخلەمیێ ل بریتانیا. د. قەیتولی ل سالا ١٩٩٧ تا ٢٠٠٢، هەروەسا ل ٢٠٠٩ تاکو ٢٠١١ ل زانکۆیا مەلایا ل مالیزیا کارکریە. دیسان ژ سالا ٢٠٠٣ تاکو ٢٠٠٧ نوینەرێ حکوومەتا هەرێما کوردستانێ بوو ل وەلاتێن رۆژهەلاتا دویر، ژ وانا چین و مالیزیا.
ژ سالا ٢٠١٢ تا نوکە، د. کەمال عەزیز قەیتولی مامۆستایە ل کولیژا پزیشکی یا زانکۆیا دهۆک و وەکو ئەکادیمیەکێ چالاک و سەرکەڤتی کارێ خۆ دکەت، کو سەرپەرشتیا چەندین نامێن ماستەر و دکتۆرایێ کریە و چەندین دەلیڤێن خواندنێ ل زانکۆیێن بیانێ بۆ مامۆستا و قوتابیێن زانکۆیا دهۆک بدەستڤەئیناینە.