ب هەلکەڤتا ٦٩ سالییا دامەزراندنا ئێکەتیا قوتابی و لاوێن دویمۆکراتا کوردستانێ، ئەوا پاشی بوویە دوو رێکخراو، د. داوود سلێمان ئەترووشی پەیامەکا پیرۆزباهیێ ئاراستەی ڤان هەردوو رێکخراوان و هەمی قوتابی و لاوێن کوردستانێ و ب تایبەت قوتابی و لاوێن زانکۆیا دهۆک کر. د ڤێ پەیامێ دا سەرۆکێ زانکۆیا دهۆک باس ل گرنگیا ڤان رێکخراوان د دیرۆک و نوکەیا کوردستانێ دا کر و دیارکر: "ئەڤ هەردوو رێکخراوە، وەکو نوینەرێن راستەقینەیێن قوتابی و لاوان، بووینە چەتر بۆ دەنگ و داخوازی و پێداویستیێن قوتابیان، و د قوناغێن جودایێن دیرۆکێ دا داینەمۆیێن هێزا هزری و ئاڤاکەرا کارامەیی و شیانێن قوتابیێن کوردستانێ بووینە، لسەر بنەمایێ کۆمەکا پرەنسیپێن سەردەمیانەیێن گونجای دگەل جیهانا نوی".

هەر د ڤێ پەیامێ دا، کو د فەیسبووکێ تاکەکسی دا هاتیە بەلاڤکرن، سەرۆکێ زانکۆیا دهۆک داخواز ژ ئێکەتیا قوتابیان کر کو بەردەوام هاندانا قوتابیان بکەت بۆ پتر بلندکرنا ئاستێ زانین و شارەزایی و دەستهەلیێ لدەف قوتابیان و راگەهاند: " زانین هێزە و گەلەک بزەحمەتە مللەتێن زانا بهێنە داگیرکرن و بندەستکرن".

د. داوود ئەترووشی باس ل گرنگیا پشتەڤانیا ئێکەتیا قوتابیێن کوردستانێ ل پلان و سیاسەتێن نوی یێن زانکۆیا دهۆک کر و گۆت: " پێدڤیە ئێکەتیا قوتابیان بەردەوام پشتەڤانیا سیاسەت و دید و پلانێن نوی یێن زانکۆیا دهۆک بکەت، چونکو ئارمانج ژ ڤان پلان و سیاسەتان، ئاڤاکرنا قوتابییەکێ سەردەمیانە و زانا و هوشیار و داهێنەرە، کو ببیتە شەنگستەکێ بهێز بۆ پتر ئاڤاکرن و پێشڤەبرنا کوردستانێ".

دەقێ پەیاما پیرۆزباهیێ

پیرۆزباهی...

ب هەلکەڤتا ٦٩ـەمین سالڤەگەرا دامەزراندنا ئێکەتیا قوتابیێن کوردستانێ و هەروەسا ئێکەتیا لاوێن دیمۆکراتا کوردستانێ، ب گەرمی پیرۆزباهیێ ل هەمی قوتابی و لاوێن کوردستانێ دکەم، ب تایبەتی قوتابی و لاوێن زانکۆیا دهۆک. هوین هەلگرێن ئالایێ زانست و خەبات و داهێنانێ نە و پاشەرۆژا ڤی وەلاتی ب هەوەیێن خۆشتڤی دێ باشتر و گەشتر بیت.

دامەزراندنا ئێکەتیا قوتابی و لاوێن دیمۆکراتا کوردستانێ، ئەوا پاشی بوویە دوو رێکخراو، بەردەوامیدان بوو، بۆ خەبات و شۆرەش و سەرهلدانێن گەلێ کورد دژی داگیرکرن و چەوساندنێ. لەورا ل سالا ١٩٥٣یێ و ب راسپاردا بابێ رۆحیێ نەتەوا کورد (مەلا مستەفایێ بارزانی) ئەڤ رێکخراوە هاتە دامەزراندن بۆ پێگەهاندنا رڤشتەکێ رەوشەنبیر و هوشیار و زانا و خەباتکەر، داکو بەرەڤانیێ ژ ئاخا خۆ و مافێن خۆ بکەن. ئەڤ چەندەژی دویربینییەکا بارزانیێ نەمر بوویە و جەنابێ وی زانیە کو د پاشەرۆژێ دا ئێدی قەلەم و زانین دێ بنە چەکێن سەردەمی و گەنجێن هوشیار و زانا و داهێنەر دێ شەرێ ئاڤەدانکرن و پێشڤەبرنا کوردستانێ کەن.

ئەڤ هەردوو رێکخراوە، وەکو نوینەرێن راستەقینەیێن قوتابی و لاوان، بووینە چەتر بۆ دەنگ و داخوازی و پێداویستیێن قوتابی و لاوان، و د قوناغێن جودایێن دیرۆکێ دا داینەمۆیێن هێزا هزری و ئاڤاکەرێن کارامەیی و شیانێن قوتابی و لاوێن کوردستانێ بووینە، لسەر بنەمایێ کۆمەکا پرەنسیپێن سەردەمیانەیێن گونجای دگەل جیهانا نوی. لەورا زانست و خەبات و داهێنان و هەروەسا نویبوون و بەردەوامی بنەما و درویشمێن وان بووینە کو د ڤی سەردەمی ژی دا، ئەڤ پرەنسیپە بۆ مە وەکو سەرۆکاتیا زانکۆیا دهۆک بنەما و درویشمێن سەرەکینە.

پێدڤیە ئێکەتیا قوتابیێن کوردستانێ بەردەوام هاندانا قوتابیان بکەت کو برسیێن زانینێ بن و بێ راوەستیان بزاڤێ بکەن شیان و شارەزاییێن خۆ د بوارێ بسپۆریێن خۆ دا و هەروەسا زانینا پێدڤی بۆ ژیانێ، ئاڤابکەن. چونکو زانین هێزە و گەلەک بزەحمەتە مللەتێن زانا بهێنە داگیرکرن و بندەستکرن. هەروەسا ئەڤ زانین و شەهرەزایی و دەستهەلیە دبنە ئەگەر کو پشتی دەرچوونا قوتابی ژ زانکۆیێ، بشێن دەلیڤەیێن جودایێن کارکرنێ و خزمەتکرنا وەلاتی بدەستخۆڤە بینن.

ژ لایەکێ دی ڤە، پێدڤیە ئێکەتیا قوتابیان بەردەوام پشتەڤانیا سیاسەت و دید و پلانێن نوی یێن زانکۆیا دهۆک بکەت، چونکو ئارمانج ژ ڤان پلان و سیاسەتان، ئاڤاکرنا قوتابییەکێ سەردەمیانە و زانا و هوشیار و داهێنەرە، کو ببیتە شەنگستەکێ بهێز بۆ پتر ئاڤاکرن و پێشڤەبرنا کوردستانێ.

دووبارە پیرۆزباهیێ ل هەمی قوتابی و لاوێن خۆشتڤی دکەین و هەر سەرفەراز بن.

د. داوود سلێمان ئەترووشی
سەرۆکێ زانکۆیا دهۆک
١٨/٢/٢٠٢٢