ل رۆژا پێنجشەمبی رێكەڤتی ١٧ـی چریا ئێكێ ٢٠٢٤، ب ئامادەبوونا سەرۆكێ هەرێما كوردستانێ، رێزدار نیچیرڤان بارزانی، زانكۆیا دهۆك ئاهەنگا دەرچوونا قوتابیێن گەرا ٢٩ـێ یا سالا خواندنێ ٢٠٢٣ – ٢٠٢٤ ل یاریگەها یانا دهۆك یا وەرزشی گێرا. ئاهەنگا دەرچوونێ ب ئامادەبوونا جڤاتا زانكۆیا دهۆك و مامۆستا و قوتابیێن دەرچووی و مێهڤانێن ژدەرڤەی زانكۆیێ ژ كەسوكارێن قوتابیان و سەرۆكێن زانكۆیێن هەرێما كوردستانێ و بەرپرسێن سازیێن میری و حزبی و كەسایەتیێن ئاینی برێڤەچوو.

رێورەسمێن ئاهەنگا دەرچوونا گەرا ٢٩ـێ ب هاتنا ژوورا مەوكبێن قوتابیێن دەرچووی دەستپێكر، كو ٥٠٥١ قوتابی بوون، ٢٠٦٧ ژ وان قوتابیێن نێر و ٢٩٨٤ ژ وان قوتابیێن مێ ژ ٧١ پشكێن زانستی ژ ١٩ كۆلیژێن زانكۆیا دهۆك بوون. پشتی خواندنا چەند ئایەتێن قورئانا پیروز، سەرۆكێ زانكۆیا دهۆك، د. داوود سلێمان ئەتروشی، پەیڤەك پێشكێشكر كو تێدا پیرۆزباهیا هەمی دەرچوویان كر وگۆت: " ئه‌ڤرۆ هوین نه‌بتنێ ده‌رچوویێن زانكۆیێ نه‌، به‌لكو هوین سه‌ركردێن سوبه‌هی و پاشه‌رۆژێنه‌‌. هوین نه‌هاتینه‌ ئاماده‌كرن داكو ته‌نها ژ رویێ ئه‌كادیمی ڤه د سه‌ركەڤتی بن‌، به‌لكی دا كو هوین ببنه‌ پێشه‌نگ و داهێنه‌ر د هه‌ر رێكه‌ك و پیشه‌یه‌كێ هوین د ژیانا خو دا هه‌لبژێرن"

.

ل دویڤ دا، سەرۆكێ زانكۆیا دهۆك روناهی ئیخستە سەر دەستكەڤت و كارێن زانكۆیێ یێن د سالا بوری دا بدەستڤەئیناین وەكی دارێژتنا پلانا ستراتیژی و بدەستڤەئینانا متمانەبەخشینێ ژ لایێ كۆلیژا پزیشكی یا زانكۆیا دھۆك ڤە و پرۆژێ دیجیتالكرنا زانكۆیێ و ڤەكرنا سەنتەرێ خواندنێن فیدرالیزمێ وڤەكرنا باخچێ رووەكی د ناڤا زانكۆیێ دا، زێدەباری ئەنجامدانا چالاكیێن زانستی ب شێوەیەكێ بەردەوام. دیسان سەرۆكێ زانكۆیێ دیاركر و گوت: "هه‌ڤته‌ریب ل گه‌ل ڤان ده‌ستكه‌ڤتا، حكومه‌تا هه‌رێما كوردستانێ پشته‌ڤانیه‌كا مەزن یا كه‌رتێ خواندنا بلند و ڤه‌كۆلینێن زانستی و زانكۆیا دهۆك كریه‌، ژ وانا دانانا به‌رێ بنیاتی و ئاڤاكرنا كۆلیژا په‌روه‌ردا بنیات ل ئامێدیێ. هه‌روه‌سا دامەزراندنا زێده‌تر ژ ٤٠٠٠ مامۆستایێن وانه‌بێژ و دیجیتالكرنا سیسته‌مێ كارگێری و دارایی یێ وه‌زاره‌تێ و زانكۆیان، کو كارێ مه‌ زۆر ئاسان کریە‌."

پشتی پێشكێشكرنا ڤان پەیڤان ژ لایێ سەرۆكێ زانكۆیێ ڤە، نوینەرێ قوتابیان ل جڤاتا زانكۆیا دهۆك دا ب ناڤێ قوتابیێن دەرچوو پەیڤەك پێشكێشكر و تێدا جەخت ل سەر دامەزراندنا دەرچوویێن زانكۆیێ و پەیداكرنا دەلیڤێن كاری د كەرتێن جیاواز دا كر.

ژ لایێ خو ڤە، سەرۆكێ هەرێما كوردستانێ، رێزدار نیچیرڤان بارزانی، پەیڤەك پێشكێشكر و پیرۆزباهیەكا گەرم ل دەرچوویان كر و دەستخۆشی ل مامۆستایێن زانكۆیا دهۆك و خێزانێن دەرچوویان كر بۆ ماندویبوونا هەر لایەكی د ئەركێ خو دا دا كو قوتابی بگەهنە ئەڤێ رۆژێ.

سەرۆكێ هەرێمێ د درێژاهیا پەیڤا خۆ دا رۆلێ دەرچوویان و زانست و زانینێ بلند نرخاند و سەرنجا دەرچوویان راكێشا وێ چەندێ و گۆت: "ئه‌ڤ ئێڤارييه‌ نه‌ بتنێ ئاهه‌نگا ده‌رچوونێ یە، به‌لكى قۆناغ و ده‌سپێكه‌كا نوييه‌ بۆ كاروانێ هه‌وه‌، يێ تژى ده‌سكه‌فت و ته‌حه‌دى يێت كو دێ هێنه‌ پێشييا هه‌وه‌." سەرۆكێ هەرێمێ بەردەوامی دا پەیڤا خو و گۆت ژی: "وه‌رگرتنا باوه‌ڕنامێ ل زانكۆيا دهۆكێ، ده‌سكه‌فته‌كێ جهێ شانازى و سه‌ربلنديێيه‌. به‌لێ ژبير نه‌كه‌ن، باوه‌ڕنامه‌ نه‌ بتنێ نيشانا سه‌ركه‌فتنا هه‌وه‌ يا پيشه‌يى و ئه‌كاديمييه‌، ئه‌ڤه‌ به‌رپرسيارييه‌كا مه‌زنه‌ دكه‌ڤيته‌ سه‌ر ملێ هه‌وه‌، داكو زانست و زانينا هه‌وە فێربووین، بۆ خزمه‌تا جڤاكێ و ئاڤاكرنا پاشه‌ڕۆژه‌كا باشتر و گه‌شتر، بكار بينن."

رێورەسمێن ئاهەنگا دەرچوونێ ب سویندخوارنا دەرچوونێ یا كو دەرچوویان ڤەگێرای ل دویڤ هاریكارێ سەرۆكێ زانكۆیێ بۆ كاروبارێن قوتابیان، د. نەبەز ئیبراهیم، بەردەوام بوو، ئەو سویندە هێمایێ دلسۆزیێ و پیشەییێ یە د كارێن داهاتی دا.

برگا دۆماهیێ ل دۆر دانا باوەرنامێن بەكالوریۆسێ بۆ دەرچوویان بوو ل سەر داخوازا هاریكارێ سەرۆكێ زانكۆیێ بۆ كاروبارێن زانستی، د. لوقمان هادی، سەرۆكی زانكۆیێ ب دلخۆشی باوەرنامە پێشكێشی دەرچوویا كر پشتی ب جهئینانا وان بۆ هەمی ئەرك و مەرجێن پێدڤی بۆ وەرگرتنا باوەرنامێن بەكالۆریۆسێ. ب ڤی شێوەی، قوتابیێن دەرچوو ب فەرمی بوونە هەلگرێن باوەرنامێن بەكالۆریۆسێ و بەرەڤ قوناغەكا دی یا ژیانا پیشەیی ڤە چوون.

هەژی ئاماژەدانێ یە؛ د درێژاهیا ٣٢ سالێن دامەزراندنا زانكۆیا دهۆك دا هەر ژ سالا ١٩٩٢ـێ، ٦٠٢٢٩ قوتابی ژ زانكۆیا دهۆك دەرچووینە د بوارێن زانستی یێن جودا دا باوەرنامە وەرگرتینە.

https://drive.google.com/drive/folders/1F7GkmydTcI57C1-gc6ifuavgxqZjBbQG?usp=sharing

راگەھاندنا زانكۆیا دھۆك؛ ١٨ـی چریا ئێكێ ٢٠٢٤

فاطمة محمود

فۆتۆ: علی بانكی، هەرمان جانگیر، حسێن تتمی