كولیژا زانستێن مروڤایەتی
کوربەندێ ناڤخوى
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
سالا خواندنێ : 2021-2022
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ناڤ و نیشانێ کوربەندى : ئەنفال و كەلا نزاركێ دبیردانكا مەدا
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مێژوویا ئەنجامدانێ : 23-02-2022
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
دەمژمێر : 12:00 نیڤرو
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ژمارا ئامادەبوویان : 40
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
جهێ ئەنجامدانا کوربەندى : کەلها نزارکێ
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
کورتیەک لسەر کوربەندی :
ئەڤرۆ رێکەڤتی 23/2/2022 سەنتەرێ ڤەكۆلینێن جینۆسایدێ و سەنتەرێ بێشكچی بۆ ڤەكۆلینێن مرۆڤایەتی و پشكا سیاسەتا گشتی ل كولیژا زانستێن مرۆڤایەتی ل زانكۆیا دهۆك، ب هەڤكاری دگەل رێڤەبەریا گشتی یا كاروبارێن شەهید و ئەنفالكریان، رێڤەبەریا گشتی یا رەوشەنبیری و هۆنەری ل پارێزگەها دهۆكێ و رێكخراوا 88 یا ناساندنا تاوانێن ئەنفالێ، كۆربەندەك ب هەلكەڤتا سالڤەگەرا 34 یا ئەنفالان لژێر ناڤێ (ئەنفال و كەلا نزاركێ دبیردانكا مەدا) ل كەلا نزاركێ ل دهۆكێ سازكر.
د. داوود سلێمان ئەترووشی سەرۆکێ زانکۆیا دهۆک د پەیڤا کۆربەندی دا باس ل گرنگیا ساخکرنا بیرەوەریا ئەنفالێن دژی گەلێ کوردستانێ کر و گۆت: "ئەنفال نەیادە، بەلكو بەدیادە، ساخڤەكرنا وێ گرنگیەكا مەزن هەیە و نابیت نفشێ نوی ژ ڤێ دەردەسەری و چەوساندنا مللەتێ كورد بێ ئاگەهـ بیت، نابیت ئەڤ رووبەرێ دیرۆكیێ كوردستانێ بهێتە ژبیركرن، ئەنفال دیرۆكەكا رەشە ب سەرێ مللەتێ مە هاتی، كەد و كار و ڤەكۆلین لدۆر ڤی رووبەرێ رەشێ دیرۆكا مە، گرنگیەكا مەزن هەیە".
د. داوود سلێمان ئەترووشی ئاماژە دا قۆناغا پشتی سەرهلدانێ و گرنگیا بەرسڤدانا هەولێن قڕکرنا کوردان ب زانینێ و گۆت: "پشتی سەرهلدانا سالا 1991ێ و وی كەتوارێ پەیدابووی، كا چەوا دوژمنێن مە بزاڤێن بنبركرن و جینۆسایدێ و قركرنێ دژی ڤی مللەتی بكارئیناین، هەر ب هەمان هێز و پتر، پرۆسێسا ئاڤابوونا ئەزموونەكا نوی دەستپێكریە، باشترین و مەزنترین بەرسڤ بۆ چەكی زانینە! زانین هێزێ پەیدادكەت، هێز ژی ژ لایێ خۆ ڤە گوهۆرینێ پەیدادكەت، هێز بەرهەمێ زانینێ یە و تو چەند یێ زانا بی، هند یێ بهێزی و دێ هند گوهۆرین و پێشڤەبرنێ كەی".
لدۆر ئەگەرێن هەلبژارتنا کەلا نزارکێ بۆ ئەنجامدانا ڤی کۆربەندی سەرۆکێ زانکۆیا دهۆک گۆت: "هەلبژارتنا كەلا نزاركێ بۆ ساخكرنا ڤێ رەشیادێ ئەگەرێن خۆ هەبوون، زانكۆیا دهۆك دگەل رێڤەبەری و رێكخراوێن گرنگیێ ب ڤی بابەتی ددەن پرۆژەیەكێ ستراتیژی بۆ ڤێ كەلێ هەیە، مە پلان هەنە كو ئەڤ كەلە ببیتە مۆزەخانەیەكا نیشتیمانی یا جینۆسایدێ دژی مللەتێ كورد، چونكو ڤێ كەلێ پەیوەندیەكا خورت ب بیردانكا مە كوردان ڤە هەیە، ئەو تاوانێن حكوومەتا بەعس د چارچووڤێ ئەنفالێن رەش دا دژی ڤی مللەتی ئەنجامدان، نابیت بهێنە ژبیركرن، پێدڤیە ئەڤ كەلە ببیتە جهەك بۆ ڤێ قۆناغا رەشا دیرۆكا مللەتێ مە، داكو بۆ نفشێ نوی و هەروەسا رایا گشتیا جیهانی لدۆر ڤێ قۆناغا دیرۆكی ئاشنا ببن".
د. داوود ئەترووشی دیار ژی كر كو وەكو زانكۆیا دهۆك گەلەك درژن بیرەوەریا ئەنفالان بەردەوام ڤەبكۆلن و گۆت: "ئەڤە 10 سالە زانكۆیا دهۆك وەكو نەریتەك ڤێ هەلكەڤتێ ساخدكەت، و بۆ پتر زانستیكرنا كاركرنێ لدۆر بابەتێ جینۆسایدێ، ل سالا 2018ێ سەنتەرەكێ تایبەت ب ڤەكۆلینێن جینۆسایدێ دامەزراند، هەروەسا جینۆساید وەكو پرۆگرامەك ل زۆربەیا پشكێن زانستیێن زانكۆیا دهۆك دهێتە خواندن". ئاشكرا ژی كر كو ل دویماهیا ئادارا ئەڤ سالە، زانكۆیا دهۆك دێ كۆنفراسێ نێڤدەولەتیێ سێیێ لدۆر جینۆسایدێ ئەنجامدەت و هژمارەكا ڤەكۆلینێن زانستی د كۆنفرانسی دا دێ هێنە پێشكێشكرن.
لدویڤدا رێڤەبەرێ سەنتەرێ ڤەكۆلینێن جینۆسایدێ ل زانكۆیا دهۆك د. سالم جاسم باس ل گرنگیا مۆزەخانا نشتیمانیا جینۆسایدێ یا كەلا نزاركێ كر، و گۆت: "بەری دوو سالان، ب هاریكاریا رێڤەبەریا شەهید و ئەنفالكریان و رێڤەبەریا گشتی یا رەوشەنبیری و هۆنەری و رێكخراوا 88 یا ناساندنا تاوانێن ئەنفالێ دەست ب دروستکرنا پرۆژێ مۆزەخانا كەلا نزاركێ كریە ژبەر گرنگیا ڤی بابەتی. مۆزەخانە، واتە بیردانك ب شێوەكێ گشتی، و داكو ئەو كارەسات و جینۆساید نەهێنە ژبیركرن، و نفشێ نوی لدۆر ئاشناببن ئەڤ پرۆژە پێشكێشكریە".
د. سالم جاسم هەروەسا گۆت: "13 گۆر دڤێ كەلێ ڤە هەنە، ئەڤ كەسە ب بلۆكا ل ناڤا گۆرەپانا كەلێ هاتبوونە شەهیدكرن، لەورا ڤی پرۆژەی پەیوەندی ب هەبوونا مللەتێ كورد ڤە هەیە، نوكە دوو تیم بۆ كۆمكرنا بەلگە و دوكیۆمێنتێن ئەنفال و جینۆسایدان كاردكەن و بۆ مۆزەخانێ ژی دێ هێنە بكارئینان".
ل دویماهیا كۆربەندی پانێلەك ب پشكداریا وان كەسا هاتە برێڤەبرن ئەوێن دڤێ كەلێ دا ئەشكەنجە و دەردەسەری ب چاڤێن خۆ دیتین و هەر ئێكی چیرۆکا دەردەسەری خۆ بۆ ئامادەبوویان ڤەگێرا".
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ