پرۆژێن هەڤكاریێ دناڤبەرا كۆلیژا زانستێن ئەندازیارایا چاندنێ و رێكخراوا GIZ یا ئەلمانى

پ. هـ. د. روفائیل شلیمون توما

رێڤەبەرێ پرۆژا دگەل رێكخراوێن بیانى ل كۆلیژا زانستێن ئەندازیاریا چاندنێ - زانكویا دهوك

د چارچووڤێ خزمەت و چالاكیێن خۆ، كۆلیژا ئەندازیاریا چاندنێ چەندین پرۆژێن تایبەتمەند ئەنجامداینە دگەل رێكخراواGIZ یا ئەلمانى ب هەماهەنگى دگەل حكومەتا هەرێما ڤان بودنبرگ ل وەلاتێ ئەلمانیا هەر ژدەستپێكا سالا 2017، ل نیسانا سالا 2017 پرۆژێ ئێكێ دەستپێكر پشتى پ. ه. د. روفائیل شلیمون توما پرۆپۆزەلەكێ پێشكەفتى پێشكێشى وێ رێكخراوێ كرى، پرۆژە ل ژێر ڤى ناڤونیشانى بوو:

“Capacity Development and vocational training in vegetable gardening and orchards for Syrian refugees at Domiz 1 and persons from host communities around Duhok، in Kurdistan Region of Iraq”

ئەڤ پرۆژە پێكهاتبوو ژ دانانا بیست خانیێن پلاستیكى بۆ پەنابەرێن رۆژئاڤا ل كەمپا دومیز، بۆ ئەنجامدانا ڤى پرۆژەى هەشت مامۆستایێن بەركەتى هاتنە ژێگرتن ژ پشكێن جودا جودا ل كۆلیژێ داكو سەرپەرشتیا زانستى بكەن دگەل پێشكێش كرنا ووركشۆپ و راهێنانێن پراكتیكى بۆ جوتیاران، نێزیكى 431 جوتیار هاتنە راهێنانێ ل سەر چاوانیا بەرهەمئینانا بروكلى و باجان سورك و باجان رەشك و خیار وفلفلا دخانیێن پلاستیكى دا، بەرهەمەكێ ئێكجار باش هاتە بدەستڤەئینان و بوویە ژێدەرێ ژیانێ بۆ چەندین خێزانێن ئەڤان جوتیاران، دیسا بۆ جارا ئێكێ ل دهۆكێ، بەرهەمێ خۆمالى یێ بروكلى هاتە بدەستڤەئینان بێ بكارئینانا كەرەستێن كیمیاویێن كۆژەك.

دیسا ل شەش گۆندێن دەڤەرا سەرسنكێ (تاژیكا، ئاشاوا، سەرسنكێ، گەرەگو، چەلوكێ و سكرینێ)، 498 جوتیار و ل سێ گۆندێن دەڤەرا بەروارى یا (دیرێ و دێریشكێ و مایێ) 212 جوتیار هاتنە راهێنان ل سەر چاوانیا چاندن و چاڤدێریا دارێن سێڤا و دیسا چاوانیا بەرهەمئینانا شەربەتا 100% سروشتى یا سێڤا بێى كو چ كەرەستێن كیمیاوى بهێنە بكارئینان، دیسا چەندین ووركشۆپ هاتنە پێشكێش كرن بۆ ڤان گۆندان ل سەر چاوانیا چێكرنا خەللا سێڤا یا سروشتى.

بۆ ڤێ مەرەمێ، چەندین ئامیرە و پێتڤیێن چاندنێ و چێكرنا شەربەتا سرۆشتى و خەللى هاتنە بەلاڤكرن ل سەر جوتیارێن گۆندێن ناڤبرى،. پشتى ب دووماهى هاتنا پرۆژەى باوەرنامێن پشكداریێ هاتنە بەلاڤكرن ل سەر هەمى پشكداران.

د چارچووڤێ هەمان پرۆژەى دا، هەر هەشت مامۆستایێن راهێنەر دگەل رێڤەبەرێ پرۆژەى، ب گەشتەكا زانستى چوونە وەلاتێ ئەلمانیا ب سەرپەرشتیا شیرەتكارێ ئەلمانیێ شارەزا د. مایكل ارنست، د ڤێ گەشتێ دا سەرەدانا زانكۆیا هونهایم ل باژێرێ شتوتگارت هاتە كرن و ل پشكا بیستانكارى، چەندین پرۆژە و لابۆر و زەڤیێن هەمەرەنگ هاتنە دیتن دگەل گێرانا ووركشۆپەكێ تایبەت ل سەر بەرهەمئینانا رووەكى ل زانكۆیا ناڤبرى.

پرۆژێ دووێ ب ناڤ و نیشانێن:

“Promotion and consideration of vegetable production in Domiz 1 greenhouses for Syrian refugees and apple juice production for host community farmers in Kurdistan Region- Iraq”.

پشتى ئەنجامێن گەلەك باش هاتینە ب دەستڤەئینان ل پروَژێ ئێكێ دا، پرۆژێ دووى وەك بەردەوامى بوو بۆ پرۆژێ ئێكێ بۆ ماوێ شەش هەیڤان ڤەكێشا، د ڤى پرۆژەى دا 11 خانیێن نوى هاتنە دانان و بەرهەمئینانا بەردەوام و هەمى جوتیار شیان پشتبەستنێ ل سەر خۆ بكەن پشتى ئەوان پێزانینێن ب بها ژ مامۆستایێن كۆلیژا زانستێن ئەندازیارایا چاندنێ وەرگرتین.

دەرئەنجامێ سەرەدانا شاندێ سەرپەرشتێ ڤان هەردوو پروَژان بۆ وەزارەتا چاندنێ یا هەرێما ڤان بودنبرگ ل وەلاتێ ئەلمانیا، پروَژێ سیێ هاتە پەسەندكرن ژ بۆ دانانا خانیەكێ شیشەى یێ هەڤچەرخ دناڤا كۆلیژا زانستێن ئەندازیاریا چاندنێ دا دگەل گێرانا ووركشۆپێن زانستى بۆ چەندین ئەندازیارێن چاندنێ یێن چالاك ژ هەولێر و ئاكرێ و زاخۆ و شێلادزێ و دهۆكێ دگەل گەشتەكا زانستى بۆ حەفت ئەندازیارێن چاندنێ بۆ وەلاتێ ئەلمانیا.

كۆلیژا زانستێن ئەندازیارایا چاندنێ یا بەردەوامە ل سەر هەماهەنگى و هەڤكاریێ دگەل رێكخراو و زانكویێن بیانى و ل بەرە ل ڤان نێزیكان دوو پرۆژێن مەزن بهێنە ئەنجامدان یێ ئێكێ دگەل كومپانیا كرتوپە ب هەماهەنگى دگەل كومپانیا IBP یا هولەندى بوَ هاریكاریا وان دوارێ پێشڤەبرنا چاندنا پەتاتان دا ل كوردستانێ.

پرۆژێ دووێ دێ دگەل كومپانیا KH ل كوردستانێ و كومپانیا HZPC یا هولەندى ب هەماهەنگى دگەل رێڤەبەریا گشتى یا چاندنێ ل پارێزگەها دهۆكێ ب سپۆنسەریا قونسلخانا هولەندى ل هەولێرێ، ئەڤ پرۆژە دگەل دوو پروَژێن دیتر هاتینە ژێگرتن ژ 45 پرۆژا ئەوێن هاتینە پێشكێش كرن بۆ قونسلخانا ناڤبرى.

------------------------------------

د کۆڤارا (پەیاما زانکۆیێ) هژمار ٢٣ دا بەلاڤبوویە