گرنگیدان ب ئاڤاهیێن کەڤنار وشینواری ژ بابەتێن گرنگێن مامۆستا و قوتابیێن زانکۆیا دهۆکە، ئەڤە بو ماوێ پێنچ سالە کولیژا ئەندازیاری ل زانکۆیا دهۆک مژویلی ئەکادیمیکرنا نویژەنکرنا ئاڤاهیێن شینواری وکەڤنارە ل پارێزکەها دهۆک. ب ڤێ مەرەمێ وۆرکشۆپەک لدۆر چەوانیا چارەسەرکرنا شەها لناڤ ئاڤاهیان کو دبیتە ئەگەرێ هەرفین وژناڤچوونا ئاڤاهیێن کاڤنار، ل سەنتەرێ رەشەنبیری یێ زانکۆیا دهۆک ب هەڤکاری و پشتەڤانیا رێکخراوێن Elucidare و World Monuments Fund هاتە ئەنجامدان.
د. شرین یۆنس، مامۆستا بسپۆر د ئەندازیاریا شینواری دا، دا زانین "د ڤێ وۆرکشۆپێ دا مە مامۆستا و قوتابیێن ماستەرێ ودکتۆرایێ پشکدارکرینە ب مەرەما هندێ ل قۆناغا بهێت ئەندازیارێن مە د ڤی بواری دا نامێن ماستەرێ و دکتۆرایێ هەبن بۆ پتر ئەکادیمیکرنا نویژەنکرن وپاراستنا شینواران".
ناڤبری دیار کر ژی "ژ سالا ٢٠١٨ێ تا نوکە مە سێ قۆناغ دەربازکرینە ودبیت هێشتا قۆناغ مابن و کونفرانسەکێ تێروتەسەل ئەنجامبدەین و راسپاردێن زانستی پێشکێشی لایەنێن پەیوەندیدار بکەین بۆ پاراستنا شینوار و ئاڤاهیێن گرێدای شارستانیا مە".
ناڤبری ئاماژە دا هندێ کو گەلەک کەس ب کرێتکرنا ڤان ئاڤاهیان رابووینە و چیمەنتۆ بکارئینایە یان هندەک بەرێن دگەل دیزاینێ ئاڤاهی نەگونجن بکارئیناینە، نموونەک باس کر کو چیمەنتۆیا دروست بۆ ڤان ئاڤاهیان جۆرەکێ بەرایە د ناڤ ئاگری دا دهێتە حەلاندن، ئەو بەر ل ئامێدیێ هەنە وچمەنتۆیا وێ بۆ تری 100 سالان خۆ رادگریت.