ئەڤرۆ رۆژا سێشەمبی رێکەڤتی ١٠ـی چریا ئێکێ ٢٠٢٣، و ل ناڤەندا قوتابیان ل زانکۆیا دهۆک، رۆژا جیهانی یا ساخلەمیا دەروونی ب چەندین چالاکیێن جودا ژ لایێ پشکا دەروونناسی یا کولیژا زانستێن مرۆڤایەتی ل زانکۆیا دهۆک بەرز هاتە راگرتن.
دهێتە زانین، سالانە ل ١٠ـی چریا ئێکێ، رۆژا جیهانیا ساخلەمیا دەروونی ل سەرانسەری جیهانێ بەرز دهێتە راگرتن، کو هەلکەڤتەکا جیهانیە و ئارمانج ژێ هشیارکرنا خەلکیە ل دۆر مژارێن دەروونی و جەختکرنە ل سەر چاڤدێریا دەروونی. ئەڤ هەلکەڤتا ناڤدەولەتی ل سالا ١٩٩٢ـێ و ب دەستپێشخەریەکا رێکخراوا ساخلەمیا جیهانی (WHO) هاتیە دەستنیشانکرن، ب مەرەما هاندانا دانوستاندنێن گشتی ل دۆر ساخلەمیا دەروونی، هەروەسا بلندکرنا ئاستێ هشیاریێ ل دۆر ئاستەنگێن روی ب روی کەسانێن تووشبووی ب نەخۆشیێن دەروونی دبن. ئارمانجەکا دی ب ڤێ هەلکەڤتێ، جەختکرنە ل سەر گرنگیا پێشکێشکرنا پشتەڤانیا دەروونی یا جڤاکی بۆ کەسانێن پێدڤی و ئاسانکرنا بدەستڤەئینانا خزمەتێن پشتەڤانی و چارەسەریا دەروونی.
راگەهاندنا زانکۆیا دهۆک؛ ١٠ـی چریا ئێکێ ٢٠٢٣
فۆتۆ: عەلی بانکی