ل رۆژا چوارشەمبی رێکەڤتی ٢٥ـی چریا ئێكێ ٢٠٢٣، كلینیكا یاسایی و رامیاری ل كۆلیژا یاسا ب ھەڤكاری ل گەل دەستەیا سەربەخۆ یا مافێن مرۆڤی – نڤێسینگوەھا دھۆك، وۆركشۆپەك ل دۆر "رولێ رێنماکارا د بەرهنگاربوونا ئالودەبوون ب مادێن هوشبەر ل قوتابخانا" ل سەنتەرێ رەوشەنبیری و جڤاكی یێ زانكۆیا دھۆك ئەنجامدا.
ئارمانجا وۆركشۆپی ئاڤاكرنا شیانێن رێنماكارا ل قوتابخانا د بەرھنگاربوونا دیاردا ئالودەبوون ب مادێن ھوشبەر بوو، وۆركشۆپی دوو تەوەر بخۆڤەدگرتن، تەوەرێ ئێكێ لایەنێ دەروونی و كارتێكرنا وی ل سەر ئالودەبوویێ ب مادێن ھوشبەر بوو، تەوەرێ دوو، لایەنێ جڤاكی و كارتێكرنا مادێن هوشبەر ل سەر تاکە کەسی و خێزانێ و جڤاکی بخۆڤەدگرت.
ل دەستپێكێ د. نەوزاد سامی ئەحمەد رێکخەرێ ساخلەمیا دەروونی ل ساخلەمیا پارێزگەها دهوکێ باس ل مەترسی و زێدەبوونا رێژا بکارئینانا مادێن هوشبەر دناڤ جڤاکی دا كر و دیاركر، كو گرنگە ڤەکۆلەر و بسپۆرێن دەروونی رولێ خۆ دهشيارکرنا قوتابیان دا دناڤ قوتابخانان دا هەبیت، داكو ئەگەر کەسەک توشی ڤان مادا بوو، ھەر زووی بهێنە چارەسەرکرن و هشيارکرن، هەروەسا دیاركر، هەر تێکچونەکا دەروونی ل دەف تاکەکی مەترسیەکە بۆ توشبوونێ ب مادێن هوشبەر و هەر توشبوونەک ب مادێن هوشبەر ژی ئەگەرەکە بۆ تێکجوونا دەروونی یا وی تاکی و زیانێن زۆر بۆ ساخلەمیا وی هەنە.
ژلایێ خۆڤە د. زوبەیدا سەید صالح سەرۆک پشكا جڤاكناسی ل كۆلیژا زانستێن مرۆڤایەتی یا زانکۆیا دهۆک باس ل بابەتێ كاریگەریا جڤاكی یا ئالودەبوون ب مادێن ھوشبەر كر و دیاركر كو ئالودەبوون ب مادێن هوشبەر گەلەک ئاریشێن جڤاکی پەیدادكەت وەکی "هەلوەشاندنا خێزانێ، کوشتن و خۆکوشتن، دەستدرێژیا سێکسی و گەلەک ئاریشێن دی"، دیسان ناڤبری دیاركر كو دیاردا ئالودەبوون ب مادێن ھوشبەر پتر دناڤ گەنجان دا پەیدا دبیت و جھێ خۆ ل ل قوتابخان و زانکویا كریە، لەورا نە ب تنێ یا گرنگە ل قوتابخانە و زانکویا كار بۆ بەرھنگاربوونا وێ بھێتە كرن بەلكۆ پێدڤیە ناڤەندێن فێركرنێ رۆل د هشيارکرنا جڤاکی دا هەبیت.
هەژی ئاماژەدانێ یە، د چەند سالێن بووریدا بکارئینانا مادێن ھوشبەر ل عيراقێ و ھەرێما كوردستانێ بەرەڤ زێدەبوونێ چوویە، لەورا لەورا زنکویا دهۆک كو خۆ ب خۆدانا ئاریشێن جڤاكێ د زانیت، پێشەنگە ب گێرانا کور و سمینارو وۆرکشوپا بۆ هشيارکرنا جڤاکی ژ مەترسیا ب کارئینانا مادێن ھوشبەر و لێگەریان ل رێكێن بەرھنگاربوونێ و چارەسەركرنێ.
راگەھاندنا زانكۆیا دھۆك؛ ٢٦ـی چریا ئێكێ ٢٠٢٣
راپۆرت : روندک فاضل
فۆتو: محەمەد عبدالکریم